ഹാമിൽട്ടൺ: ഒന്റാറിയോ സർക്കാരിന്റെ വിദ്യാഭ്യാസ ഫണ്ടായ OSAP ലഭിക്കാത്തതിനെ തുടർന്ന് ഹാമിൽട്ടൺ മാർക്ക കോളജിലെ വിദ്യാർത്ഥികൾക്ക് അധ്യയന വർഷത്തിന്റെ ആദ്യ ദിനം തന്നെ കാമ്പസിൽ നിന്നും മടങ്ങേണ്ടി വന്നതായി പരാതി. മൂന്നാം വർഷ പഠനത്തിനെത്തിയ നിരവധി വിദ്യാർത്ഥികളാണ് ഫണ്ടിംഗ് റിലീസ് ചെയ്യാത്തതിനാൽ പ്രതിസന്ധിയിലായത്. പ്രവിശ്യാ സർക്കാരിന്റെ പുതുക്കൽ നടപടികൾ വൈകുന്നതാണ് ഈ ധനസഹായം ലഭിക്കാൻ താമസമാകുന്നതിന് പ്രധാന കാരണം.
ഒരു വർഷത്തെ കോഴ്സിന് ട്യൂഷൻ ഫീസും പഠന സാമഗ്രികളും ഉൾപ്പെടെ ഏകദേശം 17,000 ഡോളർ ചെലവ് വരുന്നുണ്ട്. പൂർണ്ണമായും OSAP സഹായത്തെ ആശ്രയിച്ച് പഠനം നടത്തുന്ന വിദ്യാർത്ഥികൾക്ക് സ്വന്തം നിലയിൽ ഈ വലിയ തുക അടയ്ക്കാൻ സാധിക്കില്ല. മുൻ വർഷങ്ങളിൽ ഓഗസ്റ്റ് അവസാനത്തോടെ ഫണ്ട് വിവരങ്ങൾ ലഭിക്കാറുണ്ടായിരുന്നെങ്കിലും, ഇത്തവണ വ്യക്തമായ മറുപടി ലഭിക്കാത്തത് വിദ്യാർത്ഥികളുടെ തുടർപഠനത്തെയും തൊഴിൽ പദ്ധതികളെയും പ്രതികൂലമായി ബാധിച്ചിരിക്കുകയാണ്.
Also Read: സെപ്റ്റംബർ 23 മുതൽ 29 വരെ! കാനഡയിലെ 10 പ്രധാന ആനുകൂല്യങ്ങൾ ഉടൻ അക്കൗണ്ടുകളിലേക്ക്
2026–27 അധ്യയന വർഷത്തേക്കുള്ള OSAP അംഗീകാരങ്ങൾ സർക്കാരിന്റെ പരിശോധനയിലാണെന്ന് വെള്ളിയാഴ്ച അയച്ച ഇമെയിലിൽ മാർക്ക കോളജ് അധികൃതർ സ്ഥിരീകരിച്ചു. ബാധിതരായ വിദ്യാർത്ഥികളുമായി നിലവിലെ വിവരങ്ങൾ പങ്കുവെച്ചിട്ടുണ്ടെന്നും, കോഴ്സ് നേരത്തെ ആരംഭിക്കാൻ ആഗ്രഹിക്കുന്നവർക്കായി ബദൽ പേയ്മെന്റ് പദ്ധതികൾ അവതരിപ്പിച്ചിട്ടുണ്ടെന്നും കോളജ് വ്യക്തമാക്കി. എന്നാൽ ബാധ്യതകൾ നിലനിൽക്കുന്നതിനാൽ എന്നുമുതൽ ക്ലാസുകളിൽ തിരിച്ചെത്താൻ കഴിയുമെന്ന കാര്യത്തിൽ വിദ്യാർത്ഥികൾക്ക് ഇപ്പോഴും അനിശ്ചിതത്വം തുടരുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
