ഹാളിഫാക്സ്: ഇറാന് നേരെ മുൻ അമേരിക്കൻ പ്രസിഡന്റ് ഡൊണാൾഡ് ട്രംപ് ആരംഭിച്ച സൈനിക നീക്കങ്ങളും മിഡിൽ ഈസ്റ്റിലെ സംഘർഷങ്ങളും കാരണം കാനഡയിലെ നോവ സ്കോഷ്യ പ്രവിശ്യയിൽ കടുത്ത ഇന്ധന വിലക്കയറ്റം. പ്രവിശ്യയിൽ പെട്രോൾ, ഡീസൽ, വീടുകൾ ചൂടാക്കാനുപയോഗിക്കുന്ന ഇന്ധനം എന്നിവയ്ക്ക് തീവിലയായതോടെ
മിഡിൽക്ലാസ് ആളുകളുടെ കുടുംബ ബജറ്റ് പൂർണ്ണമായും താളംതെറ്റിയിരിക്കുകയാണ്. മറ്റ് കനേഡിയൻ പ്രവിശ്യകളെ അപേക്ഷിച്ച് നോവ സ്കോഷ്യ സ്വന്തം ആവശ്യങ്ങൾക്കായി പെട്രോളിയം ഉൽപ്പന്നങ്ങളെയാണ് പൂർണ്ണമായും ആശ്രയിക്കുന്നത്. ഇത്തരത്തിൽ കൂടുതലായി ആശ്രയിക്കുന്നത് മൂലം പ്രവിശ്യ ഇപ്പോൾ വൻ പ്രതിസന്ധിയിലാക്കിയിരിക്കുകയാണ്.
എണ്ണ വിതരണം തടസ്സപ്പെടുമോ?
നോവ സ്കോഷ്യയിലേക്ക് ഇന്ധനമെത്തിക്കുന്ന പ്രമുഖ റിഫൈനറിയായ ‘സെന്റ് ജോൺ’ പ്രധാനമായും അമേരിക്ക, നൈജീരിയ, സൗദി അറേബ്യ എന്നിവിടങ്ങളിൽ നിന്നാണ് ക്രൂഡ് ഓയിൽ ഇറക്കുമതി ചെയ്യുന്നത്. ഫെബ്രുവരിയിൽ യുദ്ധം തുടങ്ങിയതോടെ പേർഷ്യൻ ഉൾക്കടൽ വഴിയുള്ള എണ്ണക്കപ്പലുകളുടെ യാത്ര അപകടത്തിലായി.
സൗദി അറേബ്യ പൈപ്പ്ലൈൻ വഴി ചെങ്കടൽ തീരത്തെത്തിച്ചാണ് നിലവിൽ കപ്പലുകളിൽ എണ്ണ കയറ്റി അയക്കുന്നത്. എന്നാൽ ഇവിടെയും യെമനിലെ ഹൂതി വിമതരുടെ ആക്രമണ ഭീഷണിയുള്ളത് ആശങ്ക വർദ്ധിപ്പിക്കുന്നുണ്ട്. എണ്ണ ലഭ്യതയിലുണ്ടാകുന്ന തടസ്സം ഒഴിവാക്കാൻ ന്യൂഫൗണ്ട്ലാൻഡിൽ നിന്നും വിദേശ കപ്പലുകൾ വഴി റിഫൈനറിയിലേക്ക് എണ്ണയെത്തിക്കാൻ അധികൃതർ ശ്രമം തുടങ്ങിയിട്ടുണ്ട്.
വിലക്കയറ്റം മിഡിൽക്ലാസുക്കാരെ ബാധിക്കുന്നത് എങ്ങനെ?
എണ്ണയുടെ വരവ് പൂർണ്ണമായി നിലച്ചിട്ടില്ലെങ്കിലും അന്താരാഷ്ട്ര വിപണിയിൽ എണ്ണവില കുതിച്ചുയർന്നത് നോവ സ്കോഷ്യയിലെ ജനങ്ങളുടെ പോക്കറ്റടിക്കുകയാണ്. കഴിഞ്ഞ വർഷത്തെക്കാൾ ലിറ്ററിന് വലിയ വിലവർദ്ധനവാണ് രേഖപ്പെടുത്തിയത്. ഒരു ചെറിയ ട്രക്ക് ഉപയോഗിക്കുന്നയാൾക്ക് ഇന്ധനച്ചെലവിനത്തിൽ മാത്രം മാസം തോറും 300 ഡോളറിലധികം (ഏകദേശം 25,000 രൂപ) അധികമായി ചെലവാകുന്നു. ഹീറ്റിംഗ് ഓയിലിന് ലിറ്ററിന് 73 സെന്റോളമാണ് കൂടിയത്. ഒരു സാധാരണ കുടുംബത്തിന് ഇത്തവണ 830 ഡോളറോളം (ഏകദേശം 69,000 രൂപ) അധികമായി നൽകേണ്ടി വരുന്നു. ഡീസൽ വിലയിൽ ലിറ്ററിന് 93 സെന്റിന്റെ ഭീമമായ വർദ്ധനവാണുണ്ടായത്. വലിയ ഡീസൽ വാഹനങ്ങൾ ഓടിക്കുന്ന ട്രക്ക് ഡ്രൈവർമാർക്ക് പ്രതിമാസം 1,200 ഡോളറിലധികം (ഒരു ലക്ഷത്തോളം രൂപ) അധികച്ചെലവ് വരുന്നു.
വില ഉടൻ കുറയില്ല; കാരണം ഇവയാണ്
ഇന്ധനവില പഴയ നിലയിലേക്ക് ഉടൻ തിരിച്ചെത്തില്ലെന്നാണ് സാമ്പത്തിക വിദഗ്ദ്ധർ ചൂണ്ടിക്കാണിക്കുന്നത്. ട്രംപിന്റെ വ്യാപാര നയങ്ങൾ കാരണം കനേഡിയൻ ഡോളറിന്റെ മൂല്യം ഇടിഞ്ഞത് എണ്ണ ഇറക്കുമതി ചെലവേറിയതാക്കി. യുദ്ധം കാരണം കപ്പൽ ഗതാഗതത്തിനുള്ള ഇൻഷുറൻസ് തുക കുത്തനെ കൂട്ടി. റഷ്യൻ എണ്ണ ശുദ്ധീകരണ ശാലകൾക്ക് നേരെ ഉക്രെയ്ൻ നടത്തുന്ന ഡ്രോൺ ആക്രമണങ്ങൾ കാരണം ആഗോള വിപണിയിൽ എണ്ണ ലഭ്യത കുറഞ്ഞു.
വാഹനങ്ങൾ ഉപയോഗിക്കാത്തവരെയും ഈ പ്രതിസന്ധി നേരിട്ട് ബാധിക്കും. ഡീസൽ വില ഉയർന്നതോടെ ചരക്കുകൂലി വർദ്ധിക്കുകയും, അത് വിപണിയിൽ ഭക്ഷണസാധനങ്ങളുടെയും മറ്റ് അവശ്യവസ്തുക്കളുടെയും വിലക്കയറ്റത്തിന് വഴിവെക്കുകയും ചെയ്യും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
