ബീജിംഗ്: ചൈനയിലെ ഷാങ്സി പ്രവിശ്യാ തലസ്ഥാനമായ തയ്യുവാൻ നഗരത്തിലെ 40 നിലകളുള്ള ബഹുനില കെട്ടിടത്തിലുണ്ടായ വൻ തീപിടുത്തത്തിൽ 14 പേർ കൊല്ലപ്പെട്ടു. സംഭവത്തിൽ 25 ഓളം പേർക്ക് പരിക്കേറ്റിട്ടുണ്ട്. ഇതിൽ 9 പേരുടെ നില ഗുരുതരമാണെന്നാണ് ഔദ്യോഗിക വിവരങ്ങൾ വ്യക്തമാക്കുന്നത്.
ഞായറാഴ്ച വൈകുന്നേരത്തോടെയാണ് നഗരമധ്യത്തിലെ തിരക്കേറിയ പ്രധാന റോഡിൽ സ്ഥിതി ചെയ്യുന്ന കെട്ടിടത്തിൽ തീപിടുത്തമുണ്ടായത്. കെട്ടിടത്തോട് ചേർന്നുള്ള താഴത്തെ അനുബന്ധ ഭാഗത്തിന്റെ നാലാം നിലയിൽ നിന്നാണ് തീ പടർന്നതെന്നാണ് പ്രാഥമിക നിഗമനം. തുടർന്ന് ഹോട്ടലുകൾ പ്രവർത്തിക്കുന്ന എട്ടാമത്തെയും ഒമ്പതാമത്തെയും നിലകളിലേക്ക് തീ വേഗത്തിൽ വ്യാപിക്കുകയായിരുന്നു. ഷോപ്പിംഗ് കോംപ്ലക്സ്, ഹോട്ടലുകൾ, വാടക അപ്പാർട്ട്മെന്റുകൾ, ട്യൂഷൻ സെന്ററുകൾ എന്നിവയടക്കം വിവിധ ആവശ്യങ്ങൾക്കായി ഉപയോഗിക്കുന്ന വലിയൊരു മിക്സഡ്-യൂസ് കെട്ടിടത്തിലാണ് ദുരന്തമുണ്ടായത്.
സംഭവം നടന്നയുടൻ തീയണക്കാനും ആളുകളെ രക്ഷപ്പെടുത്താനുമായി അഗ്നിശമന സേനാംഗങ്ങൾ സ്ഥലത്തെത്തി. ക്രെയിനുകൾ ഉപയോഗിച്ചാണ് മുകളിലെ നിലകളിലേക്ക് പടർന്നുപിടിച്ച തീ നിയന്ത്രണവിധേയമാക്കിയത്. മണിക്കൂറുകൾ നീണ്ട പരിശ്രമത്തിനൊടുവിൽ തീയണക്കാൻ സാധിച്ചതായി അധികൃതർ അറിയിച്ചു. പരിക്കേറ്റ 38 ഓളം പേരെ ഉടൻ തന്നെ സമീപത്തെ ആശുപത്രികളിൽ പ്രവേശിപ്പിച്ചു.
ALSO READ: ആഗോളതാപനം നിയന്ത്രണം വിടുന്നു: ലോകത്തെ കാത്തിരിക്കുന്നത് വൻ ദുരന്തമോ?
രാത്രി എട്ടരയോടെ പ്രദേശത്ത് രക്ഷാപ്രവർത്തനം പൂർത്തിയായതായി അധികൃതർ വ്യക്തമാക്കി. തീപിടുത്തത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. സംഭവത്തിൽ ചൈനീസ് ഭരണകൂടം സമഗ്രമായ അന്വേഷണം പ്രഖ്യാപിച്ചിട്ടുണ്ട്. ഈ വ്യവസായ നഗരത്തിലുണ്ടായ ദുരന്തം പ്രദേശവാസികൾക്കിടയിൽ വലിയ നടുക്കമാണ് സൃഷ്ടിച്ചിരിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
