ബീജിങ്: അന്താരാഷ്ട്ര വിപണിയിൽ സ്വർണവില വൻതോതിൽ ഇടിഞ്ഞിട്ടും തങ്ങളുടെ കരുതൽ ശേഖരം വീണ്ടും ഉയർത്തി ചൈനീസ് കേന്ദ്രബാങ്കായ പീപ്പിൾസ് ബാങ്ക് ഓഫ് ചൈന. കഴിഞ്ഞ ഒക്ടോബർ മാസത്തിൽ മാത്രം 25.8 മെട്രിക് ടൺ (8,30,000 ഔൺസ്) സ്വർണമാണ് ചൈന പുതുതായി വാങ്ങിക്കൂട്ടിയത്. ശനിയാഴ്ച പുറത്തുവിട്ട ഔദ്യോഗിക കണക്കുകൾ പ്രകാരം ചൈന തുടർച്ചയായ 24-ാം മാസമാണ് വിപണിയിൽ നിന്ന് സ്വർണം ശേഖരിക്കുന്നത്.
കഴിഞ്ഞ മാസങ്ങളിൽ ആഗോള വിപണിയിൽ സ്വർണവില കുത്തനെ കുറഞ്ഞത് മുതലെടുത്താണ് ചൈന വാങ്ങലിന്റെ വേഗത കൂട്ടിയത്. ഈ വർഷത്തെ ആദ്യ 10 മാസങ്ങളിൽ മാത്രം 129 ടൺ സ്വർണം ബാങ്ക് വാങ്ങി. വേൾഡ് ഗോൾഡ് കൗൺസിലിന്റെ കണക്കനുസരിച്ച് ജൂലൈ മുതൽ സെപ്റ്റംബർ വരെയുള്ള മൂന്നാം പാദത്തിൽ ലോകത്ത് ഏറ്റവും കൂടുതൽ സ്വർണം വാങ്ങിയ കേന്ദ്രബാങ്കും ചൈനയുടേതാണ്. ഈ കാലയളവിൽ ലോകമെമ്പാടുമുള്ള കേന്ദ്രബാങ്കുകൾ ആകെ 321 ടൺ സ്വർണം ശേഖരിച്ചു. വിപണിയിലെ പൊതുവായ മന്ദതയ്ക്കിടയിലും ഈ വാങ്ങലുകൾ സ്വർണവില വൻതോതിൽ താഴേക്ക് പോകാതെ പിടിച്ചുനിർത്താൻ സഹായിക്കുന്നുണ്ട്.
അന്താരാഷ്ട്ര വിപണിയിൽ ഒക്ടോബറിൽ സ്വർണവില ഔൺസിന് 4,000 ഡോളറിന് താഴെയെത്തിയിരുന്നു. 2008-ലെ സാമ്പത്തിക പ്രതിസന്ധിക്ക് ശേഷം ഒക്ടോബർ മാസത്തിൽ ഉണ്ടാകുന്ന ഏറ്റവും വലിയ വിലയിടിവാണിത്. ഇറാൻ യുദ്ധത്തിന് ശേഷം വർദ്ധിച്ച ഊർജ്ജച്ചെലവും പണപ്പെരുപ്പവും നിയന്ത്രിക്കാൻ വിവിധ രാജ്യങ്ങൾ പലിശനിരക്ക് ഉയർത്തിയതാണ് സ്വർണത്തിന് തിരിച്ചടിയായത്. എങ്കിലും സമീപ ദിവസങ്ങളിലെ യു.എസ് ഇടക്കാല തെരഞ്ഞെടുപ്പിന് ശേഷം വിലയിൽ ചെറിയ തിരിച്ചു വരവ് പ്രകടമായിട്ടുണ്ട്.
ALSO READ: 8 ഡോളറുമായി കാനഡയിലെത്തിയ ഇന്ത്യക്കാരൻ; സെയിൽസ്മാനിൽ നിന്ന് ഐഡിബിഐ ബാങ്കിന്റെ അമരക്കാരനിലേക്ക്
കേന്ദ്രബാങ്ക് വൻതോതിൽ സ്വർണം വാങ്ങുന്നത് ചൈനയിലെ സാധാരണക്കാരെയും സ്വാധീനിക്കുന്നുണ്ട്. ബാങ്കിന്റെ പിന്തുണയുള്ളതിനാൽ ഭാവിയിൽ വില ഉയരുമെന്ന പ്രതീക്ഷയിൽ ഒക്ടോബറിൽ നിരവധിയാളുകളാണ് രാജ്യത്ത് സ്വർണം വാങ്ങിയത്. നിലവിലെ സാമ്പത്തിക അനിശ്ചിതത്വങ്ങൾ മറികടക്കാനും വിദേശനാണ്യ ശേഖരം സുരക്ഷിതമാക്കാനുമാണ് ചൈന തുടർച്ചയായി സ്വർണം വാങ്ങുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
