ഓട്ടവ: നൂറു വർഷങ്ങൾക്ക് മുൻപ് കാനഡയിൽ നിന്ന് മെക്സിക്കോയിലേക്ക് കുടിയേറിപ്പാർത്ത കർഷക കുടുംബങ്ങളുടെ പിൻഗാമികളായ ആയിരക്കണക്കിന് ആളുകൾക്ക് കനേഡിയൻ പൗരത്വത്തിനും പാസ്പോർട്ടിനും അർഹത ലഭിക്കുന്നു. കാനഡ തങ്ങളുടെ പൗരത്വ നിയമത്തിൽ വരുത്തിയ ചരിത്രപരമായ ഭേദഗതിയാണ് മെക്സിക്കോയിൽ ജീവിക്കുന്ന കനേഡിയൻ വംശജർക്ക് ഇപ്പോൾ വലിയ അനുഗ്രഹമായിരിക്കുന്നത്. 1922 മാർച്ചിൽ മാനിറ്റോബ, സാസ്കാച്വൻ എന്നീ കനേഡിയൻ പ്രവിശ്യകളിൽ നിന്ന് മതസ്വാതന്ത്ര്യവും മാതൃഭാഷാ വിദ്യാഭ്യാസവും സംരക്ഷിക്കുന്നതിനായി പതിനായിരത്തോളം വരുന്ന മെനോനൈറ്റ് വംശജർ മെക്സിക്കോയിലെ ചിഹ്വാഹ്വ, ദുരംഗോ എന്നീ മേഖലകളിലേക്ക് കുടിയേറിയിരുന്നു. ഇവർ സ്ഥാപിച്ച കാർഷിക കോളനികൾ പിന്നീട് മെക്സിക്കോയിലെ പ്രമുഖ നഗരങ്ങളായി വളരുകയും തലമുറകളായി ഇവർ അവിടെ തുടർന്നുപോരുകയും ചെയ്യുന്നുണ്ട്.
മുൻപ് നിലവിലിരുന്ന നിയമപ്രകാരം കാനഡയ്ക്ക് പുറത്ത് ജനിക്കുന്ന ഒന്നാം തലമുറയിലെ കുട്ടികൾക്ക് മാത്രമേ പാരമ്പര്യമായി കനേഡിയൻ പൗരത്വം ലഭിച്ചിരുന്നുള്ളൂ. എന്നാൽ പുതിയ ഭേദഗതിയോടെ ഈ നിയന്ത്രണം പൂർണ്ണമായും നീക്കം ചെയ്തു. ഇതനുസരിച്ച്, തലമുറകൾ എത്ര കഴിഞ്ഞാലും തങ്ങളുടെ രക്തബന്ധം ഒരു കനേഡിയൻ പൂർവ്വികനിലേക്ക് നീളുന്നുവെന്ന് കൃത്യമായ രേഖകൾ വഴി തെളിയിക്കാൻ സാധിച്ചാൽ ആ വ്യക്തിക്ക് കനേഡിയൻ പൗരത്വത്തിന് അർഹതയുണ്ടായിരിക്കും. തങ്ങളുടെ പൂർവ്വികർ 1947-ന് മുൻപ് കാനഡയിൽ ജനിച്ചവരോ അവിടെ സ്ഥിരതാമസമാക്കിയവരോ ആണെങ്കിൽ പോലും ആ പാരമ്പര്യം വച്ച് പുതിയ തലമുറയ്ക്ക് പൗരത്വത്തിനായി അപേക്ഷിക്കാവുന്നതാണ്.
ALSO READ: കാനഡ പൗരത്വ അപേക്ഷകളിൽ കരുതൽ വേണം!; തെറ്റുകൾ ഒഴിവാക്കാൻ മുന്നറിയിപ്പ്
മെക്സിക്കൻ പൗരത്വം ഉപേക്ഷിക്കാതെ തന്നെ ലഭിക്കുന്ന ഈ കനേഡിയൻ ഇരട്ട പൗരത്വം വഴി നിരവധി ആനുകൂല്യങ്ങളാണ് ഇവരെ തേടിയെത്തുന്നത്. കാനഡയിൽ എപ്പോൾ വേണമെങ്കിലും വിസയോ വർക്ക് പെർമിറ്റോ ഇല്ലാതെ ജീവിക്കാനും ജോലി ചെയ്യാനും സാധിക്കുന്നതിനോടൊപ്പം അമേരിക്കയിലേക്ക് വിസയില്ലാതെ യാത്ര ചെയ്യാനും ഇവർക്ക് അവസരം ലഭിക്കും. കൂടാതെ കാനഡയിൽ താമസിക്കാത്ത പക്ഷം മെക്സിക്കോയിലെ വരുമാനത്തിന് കാനഡയ്ക്ക് നികുതി നൽകേണ്ടതില്ല എന്ന പ്രത്യേകതയുമുണ്ട്. കുടുംബപ്പേരിൽ സവാത്സ്കി, ഫ്രൈസെൻ, പെന്നർ, വൈബ്, ക്ലാസൻ തുടങ്ങിയ പേരുകളുള്ളവർക്കും കനേഡിയൻ പശ്ചാത്തലമുള്ളവർക്കും ഈ പൗരത്വത്തിന് സാധ്യത കൂടുതലാണ്. പൂർവ്വികരുടെ കനേഡിയൻ രേഖകളും തലമുറകളെ ബന്ധിപ്പിക്കുന്ന ജനന സർട്ടിഫിക്കറ്റുകളും സഹിതം അപേക്ഷിച്ചാൽ കാനഡ ഇമിഗ്രേഷൻ വകുപ്പ് വഴി പൗരത്വ സർട്ടിഫിക്കറ്റും പാസ്പോർട്ടും കരസ്ഥമാക്കാം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
