ഓട്ടവ: കുടിയേറ്റക്കാർക്ക് തങ്ങളുടെ കുടുംബാംഗങ്ങളെ കാനഡയിലേക്ക് കൊണ്ടുവരാൻ നൽകിയിരുന്ന പ്രത്യേക ഇളവ് കേന്ദ്ര സർക്കാർ നിർത്തലാക്കി. അപേക്ഷ നൽകുന്ന സമയത്ത് പേര് വിവരങ്ങൾ ഉൾപ്പെടുത്താത്ത ബന്ധുക്കളെ പിന്നീട് സ്പോൺസർ ചെയ്യാൻ അനുവദിച്ചിരുന്ന നയമാണ് ഈ മാസം കാലാവധി തീർന്നതോടെ അവസാനിപ്പിച്ചത്. എന്നാൽ ഇതിന്റെ ആഘാതം പഠിച്ച ശേഷം ആവശ്യമെങ്കിൽ തിരുത്തൽ വരുത്തുമെന്ന് കനേഡിയൻ ഇമിഗ്രേഷൻ മന്ത്രി ലെന ദിയാബ് ബുധനാഴ്ച ഒട്ടാവയിൽ മാധ്യമങ്ങളോട് പറഞ്ഞു.
കാനഡയിൽ സ്ഥിരതാമസത്തിന് അപേക്ഷിക്കുമ്പോൾ മുഴുവൻ കുടുംബാംഗങ്ങളുടെയും വിവരങ്ങൾ കാണിക്കണമെന്നാണ് നിയമം. അല്ലാത്തപക്ഷം ഇവരെ പിന്നീട് കാനഡയിലേക്ക് കൊണ്ടുവരാൻ കഴിയില്ല. എന്നാൽ 2019 മുതൽ ഇതിൽ വലിയൊരു ഇളവ് നൽകിയിരുന്നു. അപേക്ഷ കൊടുത്ത ശേഷമുണ്ടായ കുട്ടികൾ, ജീവിച്ചിരിപ്പുണ്ടെന്ന് പിന്നീട് അറിഞ്ഞ ബന്ധുക്കൾ, എൽജിബിടിക്യു+ പങ്കാളികൾ എന്നിവർക്ക് ഈ നിയമം വലിയ അനുഗ്രഹമായിരുന്നു. സുരക്ഷാ കാരണങ്ങളാലാണ് പദ്ധതി നിർത്തിയതെന്നാണ് സർക്കാരിന്റെ പുതിയ വിശദീകരണം.
ALSO READ: കാനഡയിൽ OAS,GIS പെൻഷൻ വിതരണം നാളെ; ഒക്ടോബറിൽ തുക വീണ്ടും വർധിക്കും
എന്നാൽ ഇതിനെതിരെ ശക്തമായ പ്രതിഷേധവുമായി കനേഡിയൻ കൗൺസിൽ ഫോർ റെഫ്യൂജീസ് രംഗത്തെത്തിയിട്ടുണ്ട്. മാനുഷിക പരിഗണന വച്ച് പ്രത്യേക അപേക്ഷ നൽകാൻ വഴിയുണ്ടെങ്കിലും ഇതിന് 10 വർഷത്തിലധികം കാത്തിരിക്കേണ്ടി വരുമെന്ന് സംഘടന ചൂണ്ടിക്കാട്ടുന്നു. പദ്ധതി അവസാനിച്ചത് മൂലം ആർക്കെങ്കിലും ബുദ്ധിമുട്ടുകൾ ഉണ്ടായിട്ടുണ്ടോ എന്ന് പരിശോധിക്കാൻ ഉദ്യോഗസ്ഥർക്ക് നിർദേശം നൽകിയിട്ടുണ്ടെന്നും അതിന് ശേഷം വിഷയത്തിൽ അന്തിമ തീരുമാനമെടുക്കുമെന്നും മന്ത്രി വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
‘Canada Immigration Reviews End of Refugee Sponsorship Policy’
