ഫ്രോസൺ ഡെസേർട്ടിൽ കല്ലും പ്ലാസ്റ്റിക്കും; വിപണിയിൽ നിന്ന് തിരിച്ചുവിളിച്ച് കാനഡ ഫുഡ് ഇൻസ്‌പെക്ഷൻ ഏജൻസി

ഓട്ടവ: പ്ലാസ്റ്റിക്, ചെറിയ കല്ലുകൾ എന്നിവയുടെ സാന്നിധ്യം കണ്ടെത്തിയതിനെ തുടർന്ന് പ്രമുഖ ബ്രാൻഡിന്റെ ഫ്രോസൺ ഡെസേർട്ട് ഉൽപ്പന്നങ്ങൾ കാനഡ ഫുഡ് ഇൻസ്‌പെക്ഷൻ ഏജൻസി (CFIA) വിപണിയിൽ നിന്ന് തിരിച്ചുവിളിച്ചു. ctv ന്യൂസ് റിപ്പോർട്ട് ചെയ്തത് പ്രകാരം സെപ്റ്റംബർ 22-നാണ് ഏജൻസി ഇതുസംബന്ധിച്ച ഔദ്യോഗിക അറിയിപ്പ് പുറപ്പെടുവിച്ചത്. കശുവണ്ടി ഉപയോഗിച്ച് തയ്യാറാക്കുന്ന ‘So Delicious Dairy Free Salted Caramel’ എന്ന ഉൽപ്പന്നത്തിലാണ് പ്ലാസ്റ്റിക്, ചെറിയ കല്ലുകൾ പോലുള്ള വസ്തുക്കൾ കണ്ടെത്തിയത്. ഉപഭോക്താക്കളുടെ സുരക്ഷ മുൻനിർത്തിയാണ് കാനഡ സർക്കാർ ഈ അടിയന്തര നടപടി സ്വീകരിച്ചിരിക്കുന്നത്.

കശുവണ്ടി അടിസ്ഥാനമാക്കിയുള്ള 500 മില്ലിലീറ്റർ പാക്കറ്റുകളിലാണ് ഈ പ്രശ്നം കണ്ടെത്തിയിട്ടുള്ളത്. 2027 സെപ്റ്റംബർ 8, ഒക്ടോബർ 15, 16, കൂടാതെ 2028 ഫെബ്രുവരി 3, 25, മാർച്ച് 30, 31 എന്നീ ദിവസങ്ങൾ ‘Best Before’ തീയതിയായി രേഖപ്പെടുത്തിയ ഉൽപ്പന്നങ്ങളാണ് റീക്കോളിൽ ഉൾപ്പെട്ടിരിക്കുന്നത്. ഈ കൂട്ടത്തിൽപ്പെടുന്ന ഉൽപ്പന്നങ്ങൾ ഉപയോഗിക്കാനോ വിൽക്കാനോ വിതരണം ചെയ്യാനോ പാടില്ലെന്ന് ഭക്ഷണ സുരക്ഷാ ഏജൻസി കർശന നിർദേശം നൽകി.

ഉൽപ്പന്നത്തിന്റെ നിർമ്മാതാക്കളായ ഡാനോൺ ഇൻക്. (Danone Inc.) സെപ്റ്റംബർ 15-ന് അമേരിക്കയിലും സമാനമായ റീക്കോൾ പ്രഖ്യാപിച്ചിരുന്നു. ഡെസേർട്ടിൽ ചേർത്ത കശുവണ്ടിയിൽ ചെറിയ കല്ലുകൾ അടങ്ങിയിട്ടുണ്ടെന്ന ഉപഭോക്താക്കളുടെ പരാതിയെ തുടർന്നാണ് കമ്പനി അന്വേഷണം നടത്തിയത്. തുടർന്ന് വിഷയം യു.എസ്. ഫുഡ് ആൻഡ് ഡ്രഗ് അഡ്മിനിസ്ട്രേഷനെ (FDA) അറിയിക്കുകയും വിപണിയിൽ നിന്ന് ഉൽപ്പന്നങ്ങൾ മാറ്റാൻ തീരുമാനിക്കുകയുമായിരുന്നു.

അതേസമയം, നിശ്ചിത തീയതികൾ അല്ലാത്ത മറ്റ് ഉൽപ്പന്നങ്ങൾ സുരക്ഷിതമാണെന്നും അവ വിപണിയിൽ ലഭ്യമാണെന്നും കമ്പനി അറിയിച്ചു. ഇനി വിതരണം ചെയ്യുന്ന പുതിയ ഉൽപ്പന്നങ്ങളിൽ ഈ പ്രശ്നം ഉണ്ടാകില്ലെന്നും പൂർണ്ണമായ ഗുണനിലവാരം ഉറപ്പാക്കിയിട്ടുണ്ടെന്നും കമ്പനി വ്യക്തമാക്കിയിട്ടുണ്ട്. വിപണിയിൽ നിന്ന് സുരക്ഷിതമല്ലാത്ത പാക്കറ്റുകൾ മാറ്റുന്ന പ്രവർത്തനങ്ങൾ പുരോഗമിക്കുകയാണ്.

Also Read: കാനഡയിൽ OAS,GIS പെൻഷൻ വിതരണം നാളെ; ഒക്ടോബറിൽ തുക വീണ്ടും വർധിക്കും

ഇതിന് മുൻപും സമാനമായ രീതിയിൽ ഈ ഉൽപ്പന്നത്തിന് കാനഡയിൽ നിരോധനം വന്നിരുന്നു. 2026 ജനുവരി 2-നാണ് CFIA മുൻപ് ഇതേ ബ്രാൻഡിന്റെ ഉൽപ്പന്നങ്ങൾ തിരിച്ചുവിളിച്ചത്. അന്ന് 2026 ഫെബ്രുവരി 13 മുതൽ 2027 ജൂലൈ 10 വരെ കാലാവധിയുള്ള ഉൽപ്പന്നങ്ങളെയായിരുന്നു റീക്കോൾ ബാധിച്ചിരുന്നത്. തുടർച്ചയായി ഇത്തരം സംഭവങ്ങൾ ഉണ്ടാകുന്നത് അധികൃതർ ഗൗരവത്തോടെയാണ് കാണുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq