നിക്ഷേപകരെ സ്വാഗതം ചെയ്ത് കാർണി; ടൊറന്റോയിൽ ഇൻവെസ്റ്റ്‌മെന്റ് സമ്മിറ്റിന് തുടക്കം

ഓട്ടവ: കാനഡയിലേക്ക് വൻതോതിൽ വിദേശ നിക്ഷേപങ്ങൾ ആകർഷിക്കുക എന്ന ലക്ഷ്യത്തോടെ സംഘടിപ്പിക്കുന്ന പ്രഥമ ‘കാനഡ ഇൻവെസ്റ്റ്‌മെന്റ് സമ്മിറ്റിന്’ ടൊറന്റോയിൽ തുടക്കമായി. പ്രധാനമന്ത്രി മാർക്ക് കാർണിയുടെ നേതൃത്വത്തിൽ നടക്കുന്ന ഈ ഉച്ചകോടിയിൽ കേന്ദ്ര കാബിനറ്റ് മന്ത്രിമാരും വിവിധ പ്രവിശ്യകളിലെ പ്രീമിയർമാരും പങ്കെടുക്കുന്നുണ്ട്. ആർട്ട് ഗാലറി ഓഫ് ഒന്റാറിയോയിൽ നടക്കുന്ന പ്രൗഢഗംഭീരമായ ഗാല ഡിന്നറോടെ ആരംഭിക്കുന്ന ഉച്ചകോടിയുടെ ഭാഗമായി ലോകമെമ്പാടുമുള്ള നൂറുകണക്കിന് വ്യവസായ പ്രമുഖരും അസറ്റ് മാനേജർമാരുമാണ് കാനഡയിലെത്തിയിരിക്കുന്നത്. അടുത്ത അഞ്ച് വർഷത്തിനുള്ളിൽ രാജ്യത്തേക്ക് ഒരു ട്രില്യൺ ഡോളറിന്റെ വിദേശ നിക്ഷേപം കൊണ്ടുവരിക എന്ന പ്രധാനമന്ത്രി കാർണിയുടെ വൻ പദ്ധതിയുടെ പ്രധാന ചുവടുവെപ്പാണ് ഈ സമ്മിറ്റ്.

ഉച്ചകോടിക്ക് മുന്നോടിയായി ഞായറാഴ്ച സംഘടിപ്പിച്ച സ്വീകരണ ചടങ്ങിൽ നിരവധി പ്രധാന കരാറുകൾ ഇതിനകം തന്നെ ഒപ്പുവെച്ചതായി പ്രധാനമന്ത്രി വെളിപ്പെടുത്തി. ഊർജ്ജം, ഇൻഫ്രാസ്ട്രക്ചർ, അപൂർവ്വ ധാതുക്കൾ (critical minerals), ആർട്ടിഫിഷ്യൽ ഇന്റലിജൻസ്, അത്യാധുനിക നിർമ്മാണ മേഖല എന്നിവയിലാണ് പ്രധാനമായും നിക്ഷേപ അവസരങ്ങൾ ഉള്ളത്. കാനഡയ്ക്ക് ആവശ്യത്തിന് വിഭവങ്ങളും സാങ്കേതികവിദ്യയും കഴിവുറ്റ മനുഷ്യവിഭവശേഷിയുമുണ്ടെന്ന് ചൂണ്ടിക്കാട്ടിയ കാർണി, മറ്റെവിടെയും കാണാൻ കഴിയാത്ത “വിശ്വാസ്യത” യാണ് കാനഡയുടെ ഏറ്റവും വലിയ കരുത്തെന്ന് അമേരിക്കൻ പ്രസിഡന്റ് ഡൊണാൾഡ് ട്രംപിനെ പരോക്ഷമായി വിമർശിച്ചുകൊണ്ട് കൂട്ടിച്ചേർത്തു. കുവൈറ്റ്, മലേഷ്യ, നെതർലാൻഡ്‌സ്, സിംഗപ്പൂർ, ഖത്തർ, നോർവേ, ജപ്പാൻ, ഓസ്ട്രേലിയ തുടങ്ങിയ രാജ്യങ്ങളിൽ നിന്നുള്ള പ്രതിനിധികൾ ഉച്ചകോടിയിൽ പങ്കെടുക്കുന്നുണ്ടെന്നും ഒന്റാറിയോയിൽ മാത്രം 15 വൻകിട പദ്ധതികൾ നിക്ഷേപകർക്കായി തുറന്നുകൊടുക്കുമെന്നും പ്രീമിയർ ഡഗ് ഫോർഡ് വ്യക്തമാക്കി.

Also Read: ഐസ്‌ക്രീം മുതൽ പ്രതിരോധ മേഖല വരെ; താരിഫിനിടയിലും കാനഡയിൽ തദ്ദേശീയ വ്യവസായങ്ങൾക്ക് മുന്നേറ്റം

അതേസമയം, ഉച്ചകോടിക്കെതിരെ ശക്തമായ പ്രതിഷേധവുമായി തൊഴിലാളി യൂണിയനുകളും തദ്ദേശീയ നേതാക്കളും പരിസ്ഥിതി-ഭവന സംരക്ഷണ പ്രവർത്തകരും രംഗത്തെത്തിയിട്ടുണ്ട്. രാജ്യത്തിന്റെ സാമ്പത്തിക ഭാവി വൻകിട സി.ഇ.ഒമാരുടെ കൈകളിൽ ഏൽപ്പിക്കുന്നതിൽ ആശങ്ക പ്രകടിപ്പിക്കുന്ന പ്രതിഷേധക്കാർ, പൊതുസേവന മേഖലകളുടെ സ്വകാര്യവൽക്കരണത്തിലും പരിസ്ഥിതി പ്രശ്നങ്ങളിലും പ്രതിഷേധം രേഖപ്പെടുത്താൻ “ദി മെനി വേഴ്സസ് ദി മണി” (The Many vs. The Money) എന്ന ബാനറുമേന്തി സമ്മിറ്റ് വേദികളിലേക്ക് മാർച്ച് നടത്താനും പ്രതിനിധികളെ നേരിട്ട് തടയാനും പദ്ധതിയിടുന്നു. രണ്ടുദിവസം നീളുന്ന ഈ ഉച്ചകോടിയുടെ സമാപന സമ്മേളനത്തിൽ മുൻ കൺസർവേറ്റീവ് പ്രധാനമന്ത്രി സ്റ്റീഫൻ ഹാർപ്പർ സംസാരിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq