ഒന്റാറിയോ : ഊർജ്ജ മേഖലയിൽ സ്വയംപര്യാപ്തത കൈവരിക്കണമെന്ന രാജ്യത്തിന്റെ പ്രഖ്യാപിത നിലപാടുകൾക്ക് തിരിച്ചടിയായി കാനഡയുടെ പുതിയ ആണവ വികസന പദ്ധതി. ഒന്റാറിയോയിൽ നിർമ്മാണം ആരംഭിക്കുന്ന കാനഡയിലെ ആദ്യ സ്മോൾ മോഡുലാർ റിയാക്ടറുകൾക്ക് (SMR) ആവശ്യമായ പ്രൊസസ്സ് ചെയ്ത യുറേനിയം ഇന്ധനത്തിനായി രാജ്യം ഇനി അമേരിക്ക, ഫ്രാൻസ്, ബ്രിട്ടൻ എന്നീ രാജ്യങ്ങളെ ആശ്രയിക്കേണ്ടി വരും. ലോകത്തിലെ രണ്ടാമത്തെ വലിയ യുറേനിയം ഉത്പാദകരായ കാനഡ, കഴിഞ്ഞ അര നൂറ്റാണ്ടിലധികമായി തങ്ങളുടെ സ്വന്തം Candu റിയാക്ടറുകൾ വഴി ആഭ്യന്തര ഇന്ധന ശൃംഖല നിലനിർത്തിപ്പോന്നിരുന്നു. എന്നാൽ പുതിയ നീക്കം ഈ സ്വയംപര്യാപ്തതാ നയത്തിന് വിരുദ്ധമാണെന്ന വിമർശനം ശക്തമായിട്ടുണ്ട്.
ഒന്റാറിയോയിലെ ക്ലാരിംഗ്ടണിലുള്ള ഡാർലിംഗ്ടൺ ന്യൂ ന്യൂക്ലിയർ പ്രൊജക്റ്റിന്റെ ഭാഗമായി നിർമ്മിക്കുന്ന നാല് ‘BWRX-300’ എസ്.എം.ആറുകളിൽ ആദ്യത്തേത് 2030 ഓടെ പ്രവർത്തനം ആരംഭിക്കുമെന്നാണ് ഒന്റാറിയോ പവർ ജനറേഷൻ (OPG) പ്രതീക്ഷിക്കുന്നത്. യു.എസ്-ജപ്പാൻ സഹകരണത്തോടെ രൂപകൽപ്പന ചെയ്ത ഈ റിയാക്ടറുകളിൽ പ്രകൃതിദത്ത യുറേനിയത്തിന് പകരം ശുദ്ധീകരിച്ച യുറേനിയമാണ് ആവശ്യമായി വരുന്നത്. കാനഡയിലെ സസ്കാച്ചെവനിൽ നിന്ന് ഖനനം ചെയ്തെടുക്കുന്ന യുറേനിയം പ്രൊസസ്സിംഗിനായി അമേരിക്ക, ഫ്രാൻസ്, ബ്രിട്ടൻ എന്നിവിടങ്ങളിലെ സ്ഥാപനങ്ങളിലേക്ക് അയക്കുകയും പിന്നീട് ഇന്ധന അസംബ്ലികൾ നിർമ്മിച്ച് തിരിച്ചെത്തിക്കുകയുമാണ് ചെയ്യുന്നത്.
ആഭ്യന്തരമായി വാണിജ്യാടിസ്ഥാനത്തിൽ ഉപയോഗിക്കാവുന്ന റിയാക്ടർ സാങ്കേതികവിദ്യ കാനഡയിൽ ലഭ്യമല്ലാത്തതിനാലാണ് വിദേശ സാങ്കേതികവിദ്യ തെരഞ്ഞെടുത്തതെന്നാണ് ഒന്റാറിയോ ഊർജ്ജ മന്ത്രി സ്റ്റീഫൻ ലെച്ചെയുടെ വിശദീകരണം. ഒന്നിലധികം വിദേശ രാജ്യങ്ങളിൽ നിന്ന് ഇന്ധനം ലഭ്യമാക്കുന്നത് വഴിയും വിതരണ ശൃംഖലയിലെ തടസ്സങ്ങൾ ഒഴിവാക്കാൻ സാധിക്കുമെന്നും അദ്ദേഹം വ്യക്തമാക്കി. എന്നാൽ, ഇന്ധന ശുദ്ധീകരണ പ്രക്രിയ പൂർണ്ണമായും വിദേശ രാജ്യങ്ങളുടെ കൈകളിലാകുന്നത് ഭാവിയിൽ നയതന്ത്ര തർക്കങ്ങളോ രാഷ്ട്രീയ അസ്ഥിരതകളോ ഉണ്ടായാൽ കാനഡയുടെ ഇന്ധന ലഭ്യതയെ തന്നെ ബാധിക്കുമെന്ന് യോർക്ക് യൂണിവേഴ്സിറ്റിയിലെ പ്രൊഫസർ മാർക്ക് വിൻഫീൽഡ് ഉൾപ്പെടെയുള്ള ഊർജ്ജ വിദഗ്ദ്ധർ മുന്നറിയിപ്പ് നൽകുന്നു.
സ്വന്തമായി യുറേനിയം ശുദ്ധീകരണ കേന്ദ്രങ്ങൾ സ്ഥാപിക്കുകയാണ് ഈ ഭീഷണി ഒഴിവാക്കാനുള്ള പോംവഴിയെങ്കിലും അതിന് ശതകോടിക്കണക്കിന് ഡോളറിന്റെ ചെലവും അന്താരാഷ്ട്ര സുരക്ഷാ മാനദണ്ഡങ്ങളും ആവശ്യമാണ്. നിലവിൽ ഒന്റാറിയോ കൂടാതെ സസ്കാച്ചെവൻ, ന്യൂ ബ്രൺസ്വിക്ക്, ആൽബർട്ട തുടങ്ങിയ പ്രവിശ്യകളും ഇത്തരം റിയാക്ടർ പദ്ധതികൾ പരിഗണിക്കുന്നുണ്ട്. അതെ സമയം ജി-7 (G7) രാജ്യങ്ങളിൽ ആദ്യമായി നിർമ്മിക്കുന്ന ഈ സ്മോൾ മോഡുലാർ റിയാക്ടറുകൾ സാമ്പത്തികമായി ലാഭകരമാണോ എന്നതിലും, ഇതിൽ നിന്ന് പുറന്തള്ളുന്ന ആണവ അവശിഷ്ടങ്ങളുടെ നിർമ്മാർജ്ജനച്ചെലവിലും കൂടുതൽ വ്യക്തത വരേണ്ടതുണ്ടെന്ന് വിദഗ്ദ്ധർ ചൂണ്ടിക്കാണിക്കുന്നു.
Will be built in Canada, but fuel from abroad! New reactor plans in Ontario spark controversy
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
