നോവ സ്കോഷ്യയിൽ കാട്ടുതീ പടരുന്നു. വെസ്റ്റ് ഡൽഹൗസിയിൽ പടർന്നുപിടിച്ച തീ 300 ഹെക്ടറിൽ നിന്ന് 406 ഹെക്ടറിലേക്ക് വ്യാപിച്ചു. ഇതിനെ തുടർന്ന് കൂടുതൽ സ്ഥലങ്ങളിൽ നിന്ന് ആളുകളെ ഒഴിപ്പിക്കാൻ അധികൃതർ ഉത്തരവിട്ടു. ലോംഗ് ലേക്കിൽ പടർന്ന തീ നിയന്ത്രണ വിധേയമല്ലാത്തതിനാൽ 33 പ്രവിശ്യാ അഗ്നിശമന സേനാംഗങ്ങളും 10 പ്രാദേശിക ഫയർഫോഴ്സ് ഉദ്യോഗസ്ഥരും ചേർന്ന് കഠിനപ്രയത്നത്തിലൂടെ തീയണയ്ക്കാൻ ശ്രമിച്ചു.
അഗ്നിശമന സേനാ വിഭാഗം നൽകിയ മുന്നറിയിപ്പ് പ്രകാരം, വെസ്റ്റ് ഡൽഹൗസി റോഡിലെ 4094 മുതൽ 5315 വരെയുള്ള വിലാസങ്ങളിൽ താമസിക്കുന്ന ആളുകൾക്ക് വ്യാഴാഴ്ച രാവിലെ തന്നെ ഒഴിപ്പിക്കൽ ഉത്തരവ് നൽകിയിരുന്നു. കൂടാതെ വ്യാഴാഴ്ച രാത്രിയും കൂടുതൽ പ്രദേശങ്ങളിൽ നിന്ന് ആളുകളെ ഒഴിപ്പിക്കാൻ ഉത്തരവിട്ടു. ഒഴിപ്പിക്കൽ ഉത്തരവ് ഉടനടി പാലിക്കണമെന്നാണ് അധികൃതർ മുന്നറിയിപ്പ് നൽകിയിരിക്കുന്നത്. ഇവിടെ തുടരുന്നത് ജീവനോ സ്വത്തിനോ അപകടമുണ്ടാക്കിയേക്കാം, എന്നും അവർ വ്യക്തമാക്കി.
ഒഴിഞ്ഞുപോയ എല്ലാവരും ബ്രിഡ്ജ്ടൗൺ ഫയർ ഹാളിലെ റിസപ്ഷൻ സെന്ററിൽ രജിസ്റ്റർ ചെയ്യണമെന്ന് അധികൃതർ ആവശ്യപ്പെട്ടു. ഇത് എല്ലാവരുടെയും സുരക്ഷ ഉറപ്പാക്കാനും രാത്രി താമസ സൗകര്യം ആവശ്യമുണ്ടോയെന്ന് മനസ്സിലാക്കാനും സഹായിക്കുമെന്നും അധികൃതർ കൂട്ടിച്ചേർത്തു.
കാട്ടുതീ കാരണം അന്നാപൊളിസ് കൗണ്ടിയിൽ വായുവിന്റെ ഗുണനിലവാരം കുറഞ്ഞതായി അധികൃതർ അറിയിച്ചു. ഇതിനാൽ 65 വയസ്സിന് മുകളിലുള്ളവരും, ഗർഭിണികളും, കുട്ടികളും, നിലവിൽ രോഗങ്ങളുള്ളവരും പുറത്തുപോകാതിരിക്കാൻ ശ്രദ്ധിക്കണം. കൂടാതെ, നിയന്ത്രണമില്ലാതെ തുറന്ന സ്ഥലങ്ങളിൽ കത്തിക്കുന്ന തീ, പടക്കങ്ങൾ, കാട്ടിൽ പ്രവേശിക്കുന്നത് എന്നിവയ്ക്ക് പ്രവിശ്യയിൽ ഉടനീളം വിലക്ക് ഏർപ്പെടുത്തിയിട്ടുണ്ട്. ഈ നിയമങ്ങൾ ലംഘിക്കുന്നവർക്ക് 25,000 ഡോളർ വരെ പിഴ ചുമത്തുമെന്നും അധികൃതർ അറിയിച്ചു.
West Dalhousie continues to burn: Damage is severe in the province, people are evacuated
