ഹാലിഫാക്സ് : നോവ സ്കോഷ്യയിൽ സ്വന്തമായി പൊലീസ് സംവിധാനമുള്ള ചെറു നഗരങ്ങൾക്ക് ആശ്വാസമായി സർക്കാരിന്റെ പുതിയ തീരുമാനം. എട്ട് ചെറിയ മുനിസിപ്പാലിറ്റികളിലെ ആർ.സി.എം.പി (റോയൽ കനേഡിയൻ മൗണ്ടഡ് പോലീസ്) നിർണായക പ്രതികരണ സേവനങ്ങൾക്കായി വർഷം തോറും 1 മില്യൺ ഡോളർ വീതം ചിലവഴിക്കാൻ പ്രവിശ്യ സർക്കാർ തീരുമാനിച്ചു. ഇതോടെ ചെറിയ മുനിസിപ്പൽ പൊലീസ് സേവനങ്ങൾക്കായി പ്രത്യേക ഫണ്ട് കണ്ടെത്തേണ്ട ഭാരമാണ് ഒഴിവാകുന്നത്.
രണ്ട് വർഷം മുമ്പ് പ്രവിശ്യ നടപ്പിലാക്കിയ പുതിയ മാനദണ്ഡങ്ങൾ പ്രകാരം എല്ലാ പൊലീസ് ഏജൻസികളും എമർജൻസി റെസ്പോൺസ് ടീം, ക്രൈസിസ് നെഗോസിയേഷൻ, സ്ഫോടകവസ്തു നിർമാർജനം തുടങ്ങിയ സജ്ജീകരണങ്ങൾ ഉറപ്പാക്കേണ്ടതുണ്ട്. എന്നാൽ ഇത്തരം പ്രത്യേക സേവനങ്ങൾക്കായി ചെറിയ മുനിസിപ്പാലിറ്റികൾ ആർ.സി.എം.പിയുമായി കരാറിലെടുക്കേണ്ടി വരുമെന്ന ആശങ്ക നിലനിന്നിരുന്നു. ഇതിനാണ് പുതിയ പ്രഖ്യാപനത്തിലൂടെ പരിഹാരമായിരിക്കുന്നത്.
ആളുകൾ കുറഞ്ഞ എട്ട് മുനിസിപ്പൽ വകുപ്പുകൾക്കാണ് ഈ സഹായം ലഭിക്കുകയെന്ന് പ്രവിശ്യാ ജസ്റ്റിസ് മിനിസ്റ്റർ സ്കോട്ട് ആംസ്ട്രോങ് വ്യക്തമാക്കി. 2027-28 സാമ്പത്തിക വർഷം മുതൽ തുക ലഭ്യമാക്കി തുടങ്ങും. ദീർഘകാലമായി തുടരുന്ന ധാരണകൾ കൂടുതൽ ഔദ്യോഗികമാക്കുകയാണ് ഇതിലൂടെ ചെയ്യുന്നതെന്നും അദ്ദേഹം കൂട്ടിച്ചേർത്തു. വലിയ മുൻനിക്ഷേപമില്ലാതെ തന്നെ ചെറിയ നഗരങ്ങൾക്ക് ആവശ്യമായ സുരക്ഷ ഉറപ്പാക്കാൻ ഇത് സഹായിക്കും.
പ്രാദേശിക ഭരണകൂടങ്ങളുടെ സാമ്പത്തിക ബാധ്യത കുറയ്ക്കുന്നതാണ് പുതിയ തീരുമാനമെന്ന് ബ്രിഡ്ജ്വാട്ടർ മേയർ ഡേവിഡ് മിച്ച്വെൽ പ്രതികരിച്ചു. അത്യാഹിത ഘട്ടങ്ങളിൽ ഇത്തരം സേവനങ്ങൾ ആവശ്യമുള്ളപ്പോൾ ബജറ്റിനെക്കുറിച്ച് ആശങ്കപ്പെടേണ്ടി വരില്ലെന്ന് നോവ സ്കോഷ്യ ചീഫ്സ് ഓഫ് പോലീസ് അസോസിയേഷൻ പ്രസിഡന്റും സ്റ്റെല്ലാർട്ടൺ-വെസ്റ്റ്വിൽ പൊലീസ് മേധാവിയുമായ മാർക്ക് ഹോബെക്ക് പറഞ്ഞു. ചെറിയ നഗരങ്ങളിലെ പൊലീസ് സേവനങ്ങൾ പ്രതിസന്ധിയിലാകില്ലെന്ന് ഇത് ഉറപ്പുനൽകുന്നു.
പ്രവിശ്യയിലെ വലിയ നഗരങ്ങളായ ഹാലിഫാക്സ്, കേപ് ബ്രട്ടൻ റീജിയണൽ പൊലീസ് സേവനങ്ങൾ ഒഴികെയുള്ള മറ്റ് എട്ട് മുനിസിപ്പൽ വകുപ്പുകൾക്കാണ് ഈ സേവനം ലഭ്യമാകുക. ഈ ധനസഹായം വഴി ആർ.സി.എം.പിയുടെ എമർജൻസി റെസ്പോൺസ് ടീമിലേക്ക് കൂടുതൽ ഉദ്യോഗസ്ഥരെ ഉൾപ്പെടുത്തുമെന്ന് നോവ സ്കോഷ്യ ആർ.സി.എം.പി കമാൻഡിങ് ഓഫീസർ അസിസ്റ്റന്റ് കമ്മീഷണർ ഡാൻ മോറോ അറിയിച്ചു. എഫ്.ഐ.ടി ടീമുകളുടെ അംഗസംഖ്യ 24 ആയി ഉയർത്തുമെന്നും അദ്ദേഹം വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
