ഇരകൾക്ക് തിരിച്ചടിയാവുന്നു: ഇന്റിമേറ്റ് പാർട്ണർ വയലൻസ് കേസുകളിലെ പ്രത്യേക നഴ്സിംഗ് സേവനം നിർത്തലാക്കി നോവ സ്കോഷ്യ

നോവ സ്കോഷ്യ: ഇന്റിമേറ്റ് പാർട്നർ വയലൻസിന് (IPV) ഇരയാകുന്നവർക്കായി നോവ സ്കോഷ്യ ഹെൽത്ത് ആവിഷ്കരിച്ച പ്രത്യേക നഴ്സിംഗ് സഹായ പദ്ധതി നിർത്തലാക്കി. ലൈംഗികാതിക്രമത്തിന് ഇരയാകാത്ത പീഡിതർക്കായി നൽകിയിരുന്ന സേവനമാണ്, കോടതി നടപടികളിൽ അപ്രതീക്ഷിത പ്രത്യാഘാതങ്ങൾ ഉണ്ടാക്കിയതിനെ തുടർന്ന് അവസാനിപ്പിച്ചത്. സെക്ഷ്വൽ അസൾട്ട് നഴ്സ് എക്സാമിനർ (SANE) എന്നറിയപ്പെടുന്ന വിദഗ്ധ പരിശീലനം ലഭിച്ച നഴ്സുമാരാണ് ഈ പദ്ധതിയുടെ ഭാഗമായി പ്രവർത്തിച്ചിരുന്നത്.

ഒരു വർഷം മുൻപ് ആരംഭിച്ച ഈ പദ്ധതി പ്രകാരം, ലൈംഗിക പീഡനം നേരിടാത്ത ഗാർഹിക പീഡന ഇരകൾക്കും നഴ്സുമാരെ കാണാൻ അനുവാദമുണ്ടായിരുന്നു. എന്നാൽ നഴ്സിനും പോലീസിനും നൽകുന്ന മൊഴികളിലെ ചെറിയ വ്യത്യാസങ്ങൾ പോലും പ്രതിഭാഗം കോടതിയിൽ ഇരകൾക്കെതിരെ ആയുധമാക്കുന്നതായി നോവ സ്കോഷ്യ ഹെൽത്തിലെ വൈലൻസ് പ്രിവൻഷൻ വിഭാഗം ഡയറക്ടർ ജനൽ കൊമിയു അറിയിച്ചു. ഇരകളുടെ മൊഴികൾ കാലക്രമേണ മാറുന്നത് സ്വാഭാവികമാണെങ്കിലും ഇത് കോടതി നടപടികളെ പ്രതികൂലമായി ബാധിക്കുന്നതായി അവർ വ്യക്തമാക്കി.

ലൈംഗികാതിക്രമം നടക്കാത്ത കേസുകളിൽ ഡിഎൻഎ ശേഖരണം പോലുള്ള നടപടികൾ അനാവശ്യമാണെന്നും ആരോഗ്യവകുപ്പ് വിലയിരുത്തി. മൊഴികളിലെ വൈരുദ്ധ്യം സംബന്ധിച്ച് കോടതിയിൽ ചോദ്യം ചെയ്യപ്പെടുന്നത് ഇരകൾക്ക് കൂടുതൽ മാനസിക സമ്മർദ്ദമുണ്ടാക്കുന്നതായി പബ്ലിക് പ്രോസിക്യൂഷൻ സർവീസ് ഉൾപ്പെടെയുള്ള പങ്കാളികൾ അറിയിച്ചു. പീഡനത്തിന് ഇരയായവർ ഒരു തവണ വ്യക്തമായ മൊഴി നൽകുന്നതാണ് നിയമനടപടികൾക്ക് അനുയോജ്യമെന്നും അധികൃതർ ചൂണ്ടിക്കാട്ടി.

കഴിഞ്ഞ ഡിസംബറിൽ പദ്ധതി നിർത്തിയപ്പോൾ വിവിധ സംഘടനകൾ ആശങ്ക പ്രകടിപ്പിച്ചിരുന്നു. എന്നാൽ പദ്ധതി നിർത്തലാക്കിയതിന്റെ കാരണങ്ങൾ വ്യക്തമായതോടെ ഇത് യുക്തിസഹമാണെന്ന് കംബർലാൻഡ് കൗണ്ടി ട്രാൻസിഷൻ ഹൗസ് അസോസിയേഷൻ എക്സിക്യൂട്ടീവ് ഡയറക്ടർ ഡോൺ ഫെറിസ് പറഞ്ഞു. സ്ത്രീകൾ നൽകുന്ന മൊഴികളിലെ ചെറിയ പൊരുത്തക്കേടുകൾ പോലും അവർക്കെതിരെ ഉപയോഗിക്കപ്പെടുന്നുണ്ടെന്നും പീഡിതർക്ക് ആശുപത്രിയിൽ സ്വകാര്യത ഉറപ്പാക്കുന്നതടക്കമുള്ള മറ്റ് സൗകര്യങ്ങൾ തുടരണമെന്നും അവർ ആവശ്യപ്പെട്ടു.

നിലവിൽ ഗാർഹിക പീഡനം നേരിടുന്നവർക്ക് ആവശ്യമായ കമ്മ്യൂണിറ്റി സപ്പോർട്ട് സിസ്റ്റങ്ങൾ ലഭ്യമാകുമെന്ന് നോവ സ്കോട്ടിയ ഹെൽത്ത് ഉറപ്പുനൽകി. പദ്ധതിയോടനുബന്ധിച്ച് സാമ്പത്തിക വെട്ടിക്കുറയ്ക്കലുകളോ ജീവനക്കാരുടെ കുറവോ ഉണ്ടായിട്ടില്ലെന്നും എസ്.എ.എൻ.ഇ (SANE) നഴ്സുമാർ ലൈംഗികാതിക്രമ ഇരകളിൽ കൂടുതൽ ശ്രദ്ധ കേന്ദ്രീകരിക്കുമെന്നും അധികൃതർ വ്യക്തമാക്കി. ഗാർഹിക പീഡന കേസുകൾ വർദ്ധിച്ചുവരുന്ന സാഹചര്യത്തിൽ കൂടുതൽ ഫലപ്രദമായ രീതികൾ അവലംബിക്കുമെന്നും ആരോഗ്യവകുപ്പ് അറിയിച്ചു.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Victims suffer setbacks: Nova Scotia ends specialized nursing services in intimate partner violence cases