വൻകൂവർ : ബ്രിട്ടീഷ് കൊളംബിയയിലുള്ള കെലോണ നഗരത്തിലെ മേയർ തിരഞ്ഞെടുപ്പിൽ ടോം ഡയാസിന് തകർപ്പൻ വിജയം. കടുത്ത പോരാട്ടത്തിൽ എതിർസ്ഥാനാർത്ഥിയും മുൻ കൗൺസിലറുമായ റോൺ കന്നനെ മറികടന്നാണ് ടോം ഡയാസ് മേയർ പദവി നിലനിർത്തിയത്. പ്രാഥമിക ഫലങ്ങൾ പ്രകാരം ടോം ഡയാസ് 19,451 വോട്ടുകൾ നേടിയപ്പോൾ റോൺ കന്നന് 18,482 വോട്ടുകളാണ് ലഭിച്ചത്. 2022-ൽ പൊതുസുരക്ഷ മുൻനിർത്തി പ്രചാരണം നടത്തിയാണ് ഡയാസ് ആദ്യമായി മേയറായി തിരഞ്ഞെടുക്കപ്പെടുന്നത്. രണ്ടാം ഊഴത്തിലും പൊതുസുരക്ഷയ്ക്ക് തന്നെയാണ് പ്രാധാന്യം നൽകുന്നതെന്ന് വിജയിച്ചതിന് ശേഷം ഡയാസ് വ്യക്തമാക്കി. പരസ്യമായ മയക്കുമരുന്ന് ഉപയോഗം തടയുന്നതിന് ലഹരി വിമുക്ത ചികിത്സകൾക്ക് മുൻഗണന നൽകുന്ന സമീപനമാണ് സ്വീകരിക്കുക.
നഗരത്തിലെ ലഹരി ഉപയോഗ കേന്ദ്രം അടച്ചുപൂട്ടണമെന്ന് ആവശ്യപ്പെട്ട് നേരത്തെ അദ്ദേഹം ഫെഡറൽ സർക്കാരിന് കത്തെഴുതിയിരുന്നു. കൂടാതെ, കുതിച്ചുയരുന്ന പോലീസ് ചെലവുകൾ കുറയ്ക്കുന്നതിനായി ‘ടയേർഡ് പോലീസിങ്’, ഓക്സിലറി പോലീസിങ് രീതികൾ നടപ്പിലാക്കാനും തീരുമാനമുണ്ട്. ഡൗൺടൗൺ, റട്ട്ലാൻഡ് മേഖലകളിൽ 24 മണിക്കൂറും പട്രോളിങ് ഉറപ്പാക്കുന്നതിനായി പോലീസ്, ഫയർഫൈറ്റേഴ്സ്, ബൈലോ ഓഫീസർമാർ എന്നിവരുൾപ്പെടെ 75 മുൻനിര ഉദ്യോഗസ്ഥരെക്കൂടി നിയമിക്കും. ഗതാഗത മേഖലയിലും പാർപ്പിട രംഗത്തും വിപുലമായ പദ്ധതികളാണ് പുതിയ ഭരണസമിതി ലക്ഷ്യമിടുന്നത്.
ഗതാഗതക്കുരുക്ക് പരിഹരിക്കുന്നതിനായി ക്ലെമന്റ് ക്രോസ്ടൗൺ കണക്റ്റർ പദ്ധതിക്ക് മുൻഗണന നൽകുമെന്നും ഒകനാഗൻ തടാകത്തിന് കുറുകെ രണ്ടാമതൊരു പാലത്തിനായി പ്രവിശ്യാ സർക്കാരിൽ സമ്മർദ്ദം ചെലുത്തുമെന്നും അദ്ദേഹം ഉറപ്പുനൽകി. ബസുകളുടെ എണ്ണം 230 ആയി ഉയർത്താനും പദ്ധതിയുമുണ്ട്. ആദ്യമായി വീട് വാങ്ങുന്നവർക്ക് കുറഞ്ഞ ചെലവിൽ സ്വന്തമായി വീട് ലഭ്യമാക്കാൻ നികുതിയിളവുകൾ തുടരുമെന്നും നഗരസഭാ പ്രവർത്തനങ്ങളിൽ സുതാര്യതയും കൃത്യതയും ഉറപ്പാക്കുമെന്നും ഡയാസ് കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
