തണ്ടർ ബേ: തണ്ടർ ബേ പ്രദേശത്തേക്ക് വിദേശ തൊഴിലാളികൾക്ക് സ്ഥിരതാമസം നേടാനായി 150 പ്രൊവിൻഷ്യൽ ഇമിഗ്രേഷൻ ക്വാട്ട അനുവദിച്ചതായി തണ്ടർ ബേ കമ്മ്യൂണിറ്റി ഇക്കണോമിക് ഡെവലപ്‌മെന്റ് കമ്മീഷൻ അറിയിച്ചു. ഒക്‌ടോബർ 21-ന് തങ്ങളുടെ ഔദ്യോഗിക വെബ്‌പേജിലൂടെയാണ് കമ്മീഷൻ ഈ പ്രധാന പ്രഖ്യാപനം നടത്തിയത്.
ഒന്റാരിയോ ഇമിഗ്രന്റ് നോമിനി പ്രോഗ്രാമിന്റെ ഭാഗമായ ‘റീജിയണൽ ഇക്കണോമിക് ഡെവലപ്‌മെന്റ് ത്രൂ ഇമിഗ്രേഷൻ’ സംരംഭത്തിലൂടെയാണ് ഈ തൊഴിലാളികളെ തെരഞ്ഞെടുക്കുന്നത്. ഗ്രേറ്റർ ടൊറന്റോ പ്രദേശത്തിന് പുറത്തുള്ള മേഖലകളിലെ രൂക്ഷമായ തൊഴിൽ ക്ഷാമം പരിഹരിക്കുകയാണ് ഈ പദ്ധതിയുടെ പ്രധാന ലക്ഷ്യം.
മുൻപത്തെ ഘട്ടത്തിൽ തണ്ടർ ബേക്ക് 200 നോമിനേഷനുകളാണ് അനുവദിച്ചിരുന്നതെങ്കിൽ, 2027-ലേക്ക് ഇത് 50 എണ്ണം കുറച്ച് 150 ആക്കി പുനർനിർണ്ണയിച്ചു. 2026-2027 കാലയളവിലെ ഈ പദ്ധതി 2027 ഡിസംബർ 31 വരെ തുടരും. തണ്ടർ ബേയെക്കൂടാതെ ഗ്രേറ്റർ സഡ്ബറി, കെനോറ ഡിസ്ട്രിക്റ്റ്, നിപ്പിസിംഗ് ഡിസ്ട്രിക്റ്റ്, റെയ്നി റിവർ ഡിസ്ട്രിക്റ്റ്, റെൻഫ്രൂ കൗണ്ടി എന്നീ അഞ്ച് പ്രദേശങ്ങളും ഈ സംരംഭത്തിൽ പങ്കാളികളാണ്.
ഈ പദ്ധതി വഴി സ്ഥിരതാമസത്തിന് അപേക്ഷിക്കാൻ അപേക്ഷകർക്ക് OINP ഇമിഗ്രേഷൻ പാത്ത്‌വേയുടെ കുറഞ്ഞ യോഗ്യതകൾ വേണം. നിർദ്ദിഷ്ട കമ്മ്യൂണിറ്റി അതിർത്തിക്കുള്ളിലെ തൊഴിലുടമയിൽ നിന്ന് യോഗ്യമായ ജോബ് ഓഫർ കൈപ്പറ്റുകയും വേണം. തുടർന്ന് തൊഴിലുടമ ജോബ് ഓഫർ രജിസ്റ്റർ ചെയ്ത് 30 ദിവസത്തിനുള്ളിൽ എക്സ്പ്രഷൻ ഓഫ് ഇന്ററസ്റ്റ് പ്രൊഫൈൽ തയ്യാറാക്കി ഒന്റാരിയോ ഇമിഗ്രന്റ് നോമിനി പ്രോഗ്രാമിന്റെ റീജിയണൽ ഡ്രോ വഴി തെരഞ്ഞെടുക്കപ്പെടേണ്ടതുണ്ട്.
ALSO READ: കാനഡയിൽ നിന്ന് ഈ വർഷം പുറത്താക്കിയത് ഇത്രയും ഇന്ത്യക്കാരെ; വീണ്ടും ചർച്ചയായി കണക്കുകൾ
ഇങ്ങനെ തെരഞ്ഞെടുക്കപ്പെടുന്നവർക്ക് പ്രൊവിൻഷ്യൽ നോമിനേഷനായി അപേക്ഷിക്കാം. നോമിനേഷൻ ലഭിച്ചാൽ കനേഡിയൻ ഫെഡറൽ ഗവൺമെന്റിന് മുന്നിൽ സ്ഥിരതാമസത്തിനായി അപേക്ഷ സമർപ്പിക്കാവുന്നതാണ്. നിലവിൽ ഒന്റാരിയോ വർക്ക്ഫോഴ്‌സ് പ്രയോറിറ്റി സ്ട്രീം വഴി മാത്രമാണ് റീജിയണൽ ഇക്കണോമിക് ഡെവലപ്‌മെന്റ് ത്രൂ ഇമിഗ്രേഷൻ പദ്ധതിയിലേക്ക് യോഗ്യത നേടാനാകുന്നത്. തൊഴിലുടമകൾക്ക് ഈ പദ്ധതിയെക്കുറിച്ചുള്ള കൂടുതൽ വിവരങ്ങൾ അറിയുന്നതിനും കൺസൾട്ടേഷനുകൾക്കുമായി immigration.ontario@ontario.ca എന്ന ഇമെയിൽ വിലാസത്തിൽ ബന്ധപ്പെടാവുന്നതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
