ഓട്ടവ: കാനഡയിലെ എക്സ്പ്രസ് എൻട്രി സിസ്റ്റത്തിൽ തൊഴിൽ ഓഫറുകളുമായി ബന്ധപ്പെട്ട് നിർണ്ണായക മാറ്റങ്ങൾ നടപ്പിലാക്കി ഇമിഗ്രേഷൻ, റെഫ്യൂജീസ് ആന്റ് സിറ്റിസൺഷിപ്പ് കാനഡ. പുതിയ നിർദ്ദേശങ്ങൾ പ്രകാരം എക്സ്പ്രസ് എൻട്രി തൊഴിൽ ഓഫറുകളിൽ നിന്നുള്ള ലേബർ മാർക്കറ്റ് ഇംപാക്ട് അസസ്മെന്റ് (LMIA) ആവശ്യകത പൂർണ്ണമായും ഒഴിവാക്കി. ഇതിന് പകരമായി, ഉദ്യോഗാർത്ഥികൾക്ക് ലഭിക്കുന്ന ജോലി ഓഫറുകളുടെ യഥാർത്ഥ അവസ്ഥ ഇമിഗ്രേഷൻ ഉദ്യോഗസ്ഥർ നേരിട്ട് പരിശോധിച്ച് ഉറപ്പുവരുത്തുന്ന പുതിയ സംവിധാനമാണ് ഏർപ്പെടുത്തിയിരിക്കുന്നത്.
പഴയ ലേബർ മാർക്കറ്റ് ഇംപാക്ട് അസസ്മെന്റ് (LMIA) രീതിക്ക് പകരം, ഒൻപത് പ്രത്യേക മാനദണ്ഡങ്ങൾ അടിസ്ഥാനമാക്കിയാണ് ഇനി ഓരോ തൊഴിൽ ഓഫറും വിലയിരുത്തുന്നത്. ഇതിനായി തൊഴിലുടമയുടെ സ്ഥാപനം നിലവിൽ സജീവമായി പ്രവർത്തിക്കുന്നുണ്ടോ, അവിടെ യഥാർത്ഥത്തിൽ പുതിയ ജീവനക്കാരുടെ ആവശ്യമുണ്ടോ, കരാറിലെ വ്യവസ്ഥകൾ പൂർണ്ണമായി പാലിക്കാൻ സ്ഥാപനത്തിന് ശേഷിയുണ്ടോ തുടങ്ങിയ കാര്യങ്ങൾ വിശദമായി പരിശോധിക്കും. ഇതിനുപുറമേ, അപേക്ഷകന്റെ പ്രൊഫഷണൽ യോഗ്യതകളും മുൻകാല പരിചയവും കൃത്യമാണോ എന്നും, തൊഴിലുടമ നിയമപരമായ എല്ലാ നിർദ്ദേശങ്ങളും പാലിക്കുന്നുണ്ടോ എന്നും ഇമിഗ്രേഷൻ ഓഫീസർ നേരിട്ട് പരിശോധിച്ച് ബോധ്യപ്പെടേണ്ടതുണ്ട്.
അഞ്ചു പ്രധാന മാനദണ്ഡങ്ങൾക്ക് പുറമെ രേഖാമൂലമുള്ള കൃത്യമായ ജോബ് ഓഫർ, ആഴ്ചയിൽ കുറഞ്ഞത് 30 മണിക്കൂർ വരുന്ന തുടർച്ചയായ ഫുൾ ടൈം ജോലി, ശരിയായ എൻഒസി എന്നിവ നിർബന്ധമാണ്. പുതിയ ലേബർ മാർക്കറ്റ് ഇന്റഗ്രേഷൻ അനുസരിച്ച് തൊഴിൽ വേതന പരിധി അടിസ്ഥാനമാക്കി 50, 70, അല്ലെങ്കിൽ 100 എന്നിങ്ങനെ ബോണസ് സിആർഎസ് പോയിന്റുകൾ ലഭ്യമാകും. എന്നാൽ ഈ ഉയർന്ന വേതന പട്ടികയിൽ ഉൾപ്പെടാത്ത തസ്തികകളിലെ തൊഴിൽ ഓഫറുകൾക്ക് സിആർഎസ് ബോണസ് പോയിന്റുകൾ ലഭിക്കുകയില്ല.
എക്സ്പ്രസ് എൻട്രി സിസ്റ്റത്തിൽ നിന്ന് എൽഎംഐഎ ഒഴിവാക്കിയത് താൽക്കാലിക വർക്ക് പെർമിറ്റുകളെ ബാധിക്കില്ലെന്ന് അധികൃതർ വ്യക്തമാക്കി. വിദേശ തൊഴിലാളികളെ താൽക്കാലികമായി നിയമിക്കുന്നതിന് തൊഴിലുടമകൾ നിലവിലുള്ള വർക്ക് പെർമിറ്റ് നിയമങ്ങൾ തന്നെ പാലിക്കേണ്ടതുണ്ട്. സ്ഥിര താമസ വിസയ്ക്കുള്ള എക്സ്പ്രസ് എൻട്രി യോഗ്യതയും വർക്ക് പെർമിറ്റ് അപേക്ഷകളും രണ്ട് വ്യത്യസ്ത നിയമ ചട്ടക്കൂടുകൾക്ക് കീഴിലാണ് പ്രവർത്തിക്കുന്നത്.
ജോബ് ഓഫറിൽ എന്തെങ്കിലും മാറ്റങ്ങളോ റദ്ദാക്കലുകളോ ഉണ്ടായാൽ, അക്കാര്യം അപേക്ഷകർ ഉടനടി IRCC-യെ അറിയിക്കേണ്ടതാണ്. ഒരു കാരണവശാലും തെറ്റായ വിവരങ്ങൾ നൽകുകയോ പ്രധാന വിവരങ്ങൾ മറച്ചുവെക്കുകയോ ചെയ്യരുത്. ഇത് നിങ്ങളുടെ അപേക്ഷ നിരസിക്കപ്പെടുന്നതിനും, അടുത്ത അഞ്ച് വർഷത്തേക്ക് കാനഡയിലേക്ക് പ്രവേശിക്കുന്നതിൽ നിന്ന് വിലക്കപ്പെടുന്നതിനും കാരണമാകും. അതുകൊണ്ട്, പുതിയ സിആർഎസ് (CRS) കാൽക്കുലേറ്റർ മാറ്റങ്ങൾ അനുസരിച്ച് ഉദ്യോഗാർത്ഥികൾ തങ്ങളുടെ പ്രൊഫൈലുകൾ എത്രയും പെട്ടെന്ന് കൃത്യമായി അപ്ഡേറ്റ് ചെയ്യണമെന്ന് അധികൃതർ കർശനമായി നിർദ്ദേശിക്കുന്നുണ്ട്.
Also Read: NLPNP/AIP ഡ്രോ: 2026 നവംബറിൽ നടന്ന 2 നറുക്കെടുപ്പുകളുടെ വിശദാംശങ്ങൾ അറിയാം
മൂന്നാം കക്ഷി ഏജൻസികളെ ആശ്രയിക്കാതെ ഇമിഗ്രേഷൻ ഓഫീസർമാർ നേരിട്ട് പരിശോധന നടത്തുന്നതോടെ യഥാർത്ഥ ജോബ് ഓഫറുകൾ ഉള്ളവർക്ക് കൂടുതൽ അവസരം ലഭിക്കും. സിസ്റ്റം അപ്ഡേഷൻ പൂർത്തിയാകുന്നത് വരെ എക്സ്പ്രസ് എൻട്രി പ്രൊഫൈലുകൾ സമർപ്പിക്കാൻ ഐആർസിസി താത്കാലിക മാർഗ്ഗനിർദ്ദേശങ്ങൾ പുറപ്പെടുവിച്ചിട്ടുണ്ട്. കാനഡ കുടിയേറ്റ രംഗത്ത് സുതാര്യതയും കാര്യക്ഷമതയും വർദ്ധിപ്പിക്കാൻ പുതിയ ഭേദഗതികൾ സഹായിക്കുമെന്നാണ് ഇമിഗ്രേഷൻ വകുപ്പിന്റെ വിലയിരുത്തൽ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
