നോവ സ്കോഷ്യ: അമെർസ്റ്റ് നഗരത്തിൽ ഡെബിറ്റ്, ക്രെഡിറ്റ് കാർഡ് മോഷണങ്ങൾ വ്യാപകമാവുന്നതായി പോലീസ് മുന്നറിയിപ്പ്. കടകളിൽ വെച്ചോ, വീടിന് സമീപത്തുവെച്ചോ ശ്രദ്ധതിരിച്ച് കാർഡ് കൈക്കലാക്കി പണം തട്ടുന്ന ‘പിൻ ചെക്കിങ്’ എന്ന പുതിയ തട്ടിപ്പ് വ്യാപകമായതിനെ തുടർന്നാണ് അധികൃതരുടെ ഇടപെടൽ. കഴിഞ്ഞ കുറച്ച് ആഴ്ചകളായി ഇത്തരത്തിലുള്ള നിരവധി സംഭവങ്ങൾ റിപ്പോർട്ട് ചെയ്യപ്പെട്ടതായി അമെർസ്റ്റ് പോലീസ് ഡിപ്പാർട്ട്മെന്റ് പുറത്തിറക്കിയ വാർത്താക്കുറിപ്പിൽ പറയുന്നു.
എന്താണ് ‘പിൻ ചെക്കിങ്’? കടകളിൽ വെച്ച് ഡെബിറ്റ് അല്ലെങ്കിൽ ക്രെഡിറ്റ് കാർഡ് ഉപയോഗിച്ച് പണം നൽകുമ്പോൾ, ഉപഭോക്താവിന്റെ പിന്നിൽ വളരെ അടുത്ത് നിലയുറപ്പിച്ച ശേഷം രഹസ്യമായി പിൻ നമ്പർ ചോർത്തുന്നതാണ് ഈ രീതി. പിൻ നമ്പർ മനസ്സിലാക്കിയ ശേഷം, സംഘാംഗങ്ങൾ ശ്രദ്ധമാറ്റുന്ന തന്ത്രങ്ങളിലൂടെ കാർഡ് കൈക്കലാക്കുകയും, അത് ഉപയോഗിച്ച് വ്യാജ ഇടപാടുകൾ നടത്തുകയോ പണം പിൻവലിക്കുകയോ ചെയ്യും. ഇരകളെ കടകളിൽ വെച്ചും, പാർക്കിങ് സ്ഥലങ്ങളിൽ വെച്ചും, ചിലപ്പോൾ വീടുകളിൽ വെച്ചും ഈ സംഘങ്ങൾ പിന്തുടർന്ന് ആക്രമിക്കുന്നുണ്ട്.
അടുത്തിടെ നടന്ന ഒരു സംഭവത്തിൽ, സാധനങ്ങൾ വാങ്ങി തിരികെ കാറിനരികിലെത്തിയ ഒരു സ്ത്രീ ഷോപ്പിംഗ് കാർട്ട് തിരികെ വെക്കാനായി ബാഗ് കാറിനുള്ളിൽ വെച്ച് പോയിരുന്നു. കാർട്ടിനരികിൽ നിന്ന് തിരികെ വരുമ്പോൾ, അവരുടെ കാറിന്റെ സൈലൻസറിന് കേടുപാടുകളുണ്ടെന്ന് പറഞ്ഞ് ഒരാൾ സഹായം വാഗ്ദാനം ചെയ്തു. ഇവർ സംസാരിക്കുന്നതിനിടെ, രണ്ടാമതൊരാൾ കാറിനുള്ളിൽ കയറി ബാഗ് പരിശോധിക്കുകയും ഡെബിറ്റ് കാർഡ് മോഷ്ടിക്കുകയും ചെയ്തു. അൽപ്പസമയത്തിന് ശേഷം കാറിനുള്ളിൽ കയറിയപ്പോഴാണ് ബാഗ് തുറന്ന നിലയിൽ കണ്ടതും കാർഡ് നഷ്ടപ്പെട്ടതും സ്ത്രീ അറിയുന്നത്.
മറ്റൊരു സംഭവത്തിൽ, കടയിൽ വെച്ച് പിൻ ചോർത്തപ്പെട്ട ഒരാളെ സംഘം വീട്ടിലേക്ക് പിന്തുടർന്നു. വീട്ടിലെത്തിയപ്പോൾ ഒരാൾ കാണാതായ നായയെ തിരയുകയാണെന്ന് പറഞ്ഞ് ഇദ്ദേഹത്തെ സമീപിച്ചു. ഫോണിൽ നായയുടെ ‘പിങ്’ ലൊക്കേഷൻ കാണിച്ചും കൈയ്യിൽ ലീഷ് പിടിച്ചുമൊക്കെയാണ് ഇയാൾ ഇരയെ കബളിപ്പിക്കാൻ ശ്രമിച്ചത്. ഇദ്ദേഹം സംസാരിച്ച് നിൽക്കുന്നതിനിടെ രണ്ടാമത്തെയാൾ ഇരയുടെ പേഴ്സ് മോഷ്ടിക്കാൻ ശ്രമിച്ചു.
പൊതുജനങ്ങൾക്കായി പോലീസ് ചില സുരക്ഷാ നിർദ്ദേശങ്ങൾ നൽകിയിട്ടുണ്ട്.
വ്യക്തിപരമായ സാധനങ്ങൾ എല്ലായ്പ്പോഴും കൂടെ കൊണ്ടുപോകുക, പിൻ നമ്പർ അടിക്കുമ്പോൾ മറ്റൊരാൾ കാണാത്ത രീതിയിൽ കൈകൊണ്ട് മറയ്ക്കുക, അസാധാരണമായ സഹായ വാഗ്ദാനങ്ങൾ നൽകി അടുപ്പം സ്ഥാപിക്കുന്നവരെ സൂക്ഷിക്കുക, സംശയാസ്പദമായ എന്തെങ്കിലും ശ്രദ്ധയിൽപ്പെട്ടാൽ ഉടൻ പോലീസിനെ അറിയിക്കുക എന്നിവയാണ് പ്രധാന നിർദ്ദേശങ്ങൾ. അമെർസ്റ്റ് പോലീസ് ഡിപ്പാർട്ട്മെൻ്റുമായി 902-667-7227 എന്ന നമ്പറിലോ, ക്രൈം സ്റ്റോപ്പേഴ്സുമായി 1-800-222-8477 എന്ന നമ്പറിലോ ബന്ധപ്പെടാവുന്നതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
