നോവ സ്കോഷ്യ: കാനഡയിൽ കാട്ടുതീ ഭീഷണി വർധിക്കുന്ന സാഹചര്യത്തിൽ, വനങ്ങളിൽ തീപിടിത്ത സാധ്യത കുറയ്ക്കാൻ സഹായിക്കുന്ന നൂതന സാങ്കേതികവിദ്യയുമായി ഒരു നോവ സ്കോഷ്യയിലെ കമ്പനി രംഗത്ത്. പ്രകൃതി ദുരന്തങ്ങൾക്കും കൊടുങ്കാറ്റിനും ശേഷം വനങ്ങളിലും ജനവാസ മേഖലകളിലും അടിഞ്ഞുകൂടുന്ന മരങ്ങളുടെയും മറ്റും അവശിഷ്ടങ്ങൾ നീക്കം ചെയ്താണ് ഇവർ കാട്ടുതീ നിയന്ത്രിക്കാൻ വഴിയൊരുക്കുന്നത്. BioBurn Pros Inc. എന്ന സ്ഥാപനമാണ് മൊബൈൽ സംവിധാനത്തിലൂടെ തീപിടിത്ത സാധ്യത കുറയ്ക്കുന്നതിനുള്ള മാതൃക അവതരിപ്പിച്ചത്.
വലിയ കാറ്റിന് ശേഷം അവശിഷ്ടങ്ങൾ വനങ്ങളിൽ ദ്രവിക്കാതെ കിടക്കുന്നത് കാട്ടുതീക്ക് എളുപ്പം പടരാനുള്ള ഇന്ധനമായി മാറും. ഈ അവശിഷ്ടങ്ങൾ നീക്കം ചെയ്യുന്നത് തീപിടിത്ത സാധ്യത ഗണ്യമായി കുറയ്ക്കുന്നു. കമ്പനി ഉപയോഗിക്കുന്നത് ഒരു ‘എയർ കർട്ടൻ ബർണർ’ ആണ്. ഇത് കുറഞ്ഞ സമയത്തിനുള്ളിൽ വലിയ അളവിലുള്ള അവശിഷ്ടങ്ങൾ കരിച്ചു കളയാൻ സഹായിക്കുന്നു. ഈ പ്രക്രിയ പുക രഹിതവും കാർബൺ ന്യൂട്രലും ആണെന്ന് കമ്പനി അവകാശപ്പെടുന്നു. ഇത് പരിസ്ഥിതി സൗഹൃദമായ ഒരു മാലിന്യ സംസ്കരണ രീതിയാണ്. അവശിഷ്ടങ്ങൾ കത്തിയമരുമ്പോൾ ബാക്കിയാവുന്നത് ബയോചാർ (Biochar) എന്ന ജൈവവളമാണ്. ഇത് മണ്ണിനും കൃഷിക്കും ഉപയോഗപ്രദമാണ്.
ഈ സാങ്കേതികവിദ്യ ഉപയോഗിച്ച് മരങ്ങൾക്കിടയിലെ ‘കാനോപ്പി ഇന്ധനം’ (Canopy Fuel) നീക്കം ചെയ്യാൻ സാധിക്കും. അതുവഴി തീപിടിത്തം ഉണ്ടായാൽ പോലും അത് മുകളിലേക്ക് പടരുന്നത് തടയാൻ സാധിക്കുമെന്ന് BioBurn Pros Inc. പ്രസിഡൻ്റ് ജോ ലൂയിസ് പറയുന്നു. ഹാലിഫാക്സ് ആസ്ഥാനമായി പ്രവർത്തിക്കുന്ന ഈ കമ്പനി നിലവിൽ ആൽബർട്ട, ബ്രിട്ടീഷ് കൊളംബിയ തുടങ്ങിയ തീപിടിത്ത സാധ്യതയുള്ള മറ്റ് കനേഡിയൻ പ്രവിശ്യകളിലേക്കും തങ്ങളുടെ പ്രവർത്തനം വ്യാപിപ്പിച്ചിട്ടുണ്ട്. പ്രാദേശിക അഗ്നിശമന വകുപ്പുകളിൽ നിന്നും പ്രകൃതി വിഭവ വകുപ്പുകളിൽ നിന്നും കമ്പനിക്ക് വലിയ പിന്തുണയാണ് ലഭിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
The technology a Nova Scotia company is using to reduce the risk of forest fires
