ഒന്റാരിയോ; അമേരിക്കൻ പ്രസിഡന്റ് ഡൊണാൾഡ് ട്രംപ് കാനഡൻ ഉൽപ്പന്നങ്ങൾക്ക് 50 ശതമാനം വരെ പുതിയ താരിഫ് ഏർപ്പെടുത്തുമെന്ന മുന്നറിയിപ്പ് നൽകിയ സാഹചര്യത്തിൽ, ഗോർഡി ഹോവ് ഇന്റർനാഷണൽ ബ്രിഡ്ജിന്റെ കാനഡ-അമേരിക്ക സംയുക്ത ഉദ്ഘാടനാഘോഷം ഒഴിവാക്കാൻ കാനഡ സർക്കാർ തീരുമാനിച്ചു. ഇരു രാജ്യങ്ങളും ചേർന്നുള്ള ആഘോഷം നിലവിലെ സാഹചര്യത്തിൽ ഉചിതമല്ലെന്ന് ഫെഡറൽ ഇൻഫ്രാസ്ട്രക്ചർ മന്ത്രി ഗ്രെഗർ റോബർട്സന്റെ ഓഫീസ് അറിയിച്ചു.
പകരം, വെള്ളിയാഴ്ച കാനഡയുടെ ആഭിമുഖ്യത്തിൽ മാത്രം പ്രത്യേക ചടങ്ങ് സംഘടിപ്പിക്കാനാണ് തീരുമാനം. അതേസമയം, പാലം മുൻകൂട്ടി പ്രഖ്യാപിച്ചതുപോലെ അടുത്ത തിങ്കളാഴ്ച ഗതാഗതത്തിനായി തുറക്കും. അമേരിക്കൻ മദ്യത്തിന് ചില പ്രവിശ്യകൾ ഏർപ്പെടുത്തിയ വിലക്ക്, കാനഡയുടെ സപ്ലൈ-മാനേജ്ഡ് ഡയറി സംവിധാനം, അമേരിക്കൻ വാഹനങ്ങൾക്കുള്ള ക്വോട്ട തുടങ്ങിയ വിഷയങ്ങൾ ചൂണ്ടിക്കാട്ടിയാണ് ട്രംപ് പുതിയ താരിഫ് ഭീഷണി ഉയർത്തിയത്.
ഇതിന് പിന്നാലെ പ്രധാനമന്ത്രി മാർക്ക് കാർണി ചൊവ്വാഴ്ച ട്രംപുമായി ടെലിഫോണിൽ സംസാരിക്കുകയും ഇരു രാജ്യങ്ങളും വ്യാപാര ചർച്ചകൾ കൂടുതൽ വേഗത്തിലാക്കാൻ ധാരണയിലെത്തുകയും ചെയ്തു. ഇതേ ദിവസമാണ് സംയുക്ത ഉദ്ഘാടന പരിപാടി റദ്ദാക്കാനുള്ള തീരുമാനം എടുത്തതെന്നും ക്ഷണിക്കപ്പെട്ടവരെ വിവരം അറിയിച്ചതായും റിപ്പോർട്ടുകളുണ്ട്.
മിഷിഗണിനെയും ഒന്റാരിയോയെയും ബന്ധിപ്പിക്കുന്ന 6.4 ബില്യൺ ഡോളർ ചെലവിൽ നിർമ്മിച്ച ഗോർഡി ഹോവ് ഇന്റർനാഷണൽ ബ്രിഡ്ജിന്റെ ഉദ്ഘാടനം നേരത്തെയും നീണ്ടുപോയിരുന്നു. പാലവുമായി ബന്ധപ്പെട്ട കരാർ വീണ്ടും ചർച്ച ചെയ്യണമെന്ന് ട്രംപ് ഭരണകൂടം ആവശ്യപ്പെട്ടതിനെ തുടർന്നായിരുന്നു അത്.
തുടർന്ന് നടന്ന ചർച്ചകൾക്കൊടുവിൽ ജൂലൈ 10-ന് പുതിയ ധാരണ പ്രഖ്യാപിച്ചെങ്കിലും വരുമാനവിഹിതവും കടബാധ്യത തിരിച്ചടവുമായി ബന്ധപ്പെട്ട ചില കാര്യങ്ങളിൽ ഇപ്പോഴും വ്യക്തതയില്ലെന്നാണ് റിപ്പോർട്ടുകൾ. പാലത്തിന്റെ ഉടമസ്ഥാവകാശം കാനഡ സർക്കാരും മിഷിഗൺ സംസ്ഥാനവും സംയുക്തമായാണ് വഹിക്കുന്നത്.
Tariff dispute escalates; Canada withdraws from the joint inauguration of the Gordie Howe Bridge.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
