ഓട്ടവ: കാനഡയിലും അമേരിക്കയിലും വിൽപ്പന നടത്തിയ INMO Smart Glass AIR3 എഐ സ്മാർട്ട് ഗ്ലാസുകൾ പൊള്ളലേൽക്കാനുള്ള അപകടസാധ്യതയെ തുടർന്ന് തിരിച്ചുവിളിച്ച് ഹെൽത്ത് കാനഡ. ctv ന്യൂസ് റിപ്പോർട്ട് ചെയ്തത് അനുസരിച്ച്, ഈ ഗ്ലാസുകൾ കൈവശമുള്ളവർ ഉടൻ തന്നെ ഉപയോഗം നിർത്തണമെന്നാണ് മുന്നറിയിപ്പ്. ദീർഘനേരം ഉപയോഗിക്കുമ്പോൾ ഗ്ലാസിന്റെ ഇടത് ഭാഗം അമിതമായി ചൂടാകാൻ സാധ്യതയുണ്ടെന്നാണ് ഹെൽത്ത് കാനഡയുടെ റീക്കോൾ നോട്ടീസിൽ പറയുന്നത്. അപകടസാധ്യത ഒഴിവാക്കാൻ ഉപഭോക്താക്കൾ ഉൽപ്പന്നം ഉപയോഗിക്കുന്നതിന് മുമ്പ് firmware 3.16-ലേക്ക് അപ്ഡേറ്റ് ചെയ്യണമെന്നും അധികൃതർ നിർദേശിച്ചു.
ഗ്ലാസിന്റെ വലത് വശത്ത് കാണുന്ന AIR3 എന്ന ലേബലിലൂടെ ഈ മോഡൽ എളുപ്പത്തിൽ തിരിച്ചറിയാം. വീഡിയോ കാണാനും ഭാഷകൾ മാറ്റി മനസ്സിലാക്കാനും ജോലികൾ വേഗത്തിൽ തീർക്കാനും സഹായിക്കുന്ന എഐ സാങ്കേതികവിദ്യയുള്ള സ്മാർട്ട് ഗ്ലാസുകളാണിവ. ആമസോൺ, കിക്സ്റ്റാർട്ടർ, inmoxr.com എന്നീ വെബ്സൈറ്റുകൾ വഴി 900 മുതൽ 1,300 വരെ യുഎസ് ഡോളർ വിലയ്ക്കാണ് ഈ സ്മാർട്ട് ഗ്ലാസുകൾ വിറ്റിരുന്നത്.
2025 ഡിസംബർ മുതൽ 2026 ഓഗസ്റ്റ് വരെയുള്ള കാലയളവിൽ കാനഡയിൽ 120 യൂണിറ്റുകളും അമേരിക്കയിൽ 1,643 യൂണിറ്റുകളും വിറ്റഴിച്ചതായി ഉൽപ്പാദകരായ INMO സ്ഥിരീകരിച്ചു. ഉപഭോക്തൃ സുരക്ഷ മുൻനിർത്തി ഹെൽത്ത് കാനഡ, യു.എസ്. കൺസ്യൂമർ പ്രൊഡക്റ്റ് സേഫ്റ്റി കമ്മീഷൻ (CPSC), നിർമ്മാതാക്കളായ INMO International Technology Limited എന്നിവർ ചേർന്നാണ് ഇപ്പോൾ ഈ റീക്കോൾ പ്രഖ്യാപിച്ചിരിക്കുന്നത്.
കാനഡയിൽ സെപ്റ്റംബർ 17 വരെ സംഭവവുമായി ബന്ധപ്പെട്ട് പരിക്കുകളൊന്നും റിപ്പോർട്ട് ചെയ്തിട്ടില്ലെന്ന് ഹെൽത്ത് കാനഡ അറിയിച്ചു. എന്നാൽ, അമേരിക്കയിൽ AIR3 ഗ്ലാസുകൾ അമിതമായി ചൂടായതായി 10 പരാതികൾ ലഭിച്ചിട്ടുണ്ട്. ഇതിൽ ഗ്ലാസ് ഉപയോഗിച്ചവരുടെ മുഖത്തും ഇടത് ചെവിയുടെ ഭാഗത്തും ചെറിയ തോതിൽ പൊള്ളലേറ്റ അനുഭവങ്ങൾ റിപ്പോർട്ട് ചെയ്തിട്ടുണ്ടെന്ന് യു.എസ്. സുരക്ഷാ കമ്മീഷൻ വ്യക്തമാക്കി.
Also Read: വേർപിരിഞ്ഞാൽ ലാഭം? ആൽബർട്ട സ്വതന്ത്ര രാജ്യമായാൽ സാമ്പത്തികമായി നേട്ടമുണ്ടകുമെന്ന് ATC
ഉൽപ്പന്നം കൈവശമുള്ളവർ ഗ്ലാസിന്റെ ഫോട്ടോ, ഓർഡർ നമ്പർ, വാങ്ങിയ പ്ലാറ്റ്ഫോം എന്നിവയുടെ വിവരങ്ങൾ സഹിതം inmoxr.com വഴി കമ്പനിയെ ഉടൻ ബന്ധപ്പെടണമെന്ന് INMO നിർദേശിച്ചു. അതേസമയം, തിരിച്ചുവിളിച്ച ഇത്തരം അപകടകരമായ ഉൽപ്പന്നങ്ങൾ കാനഡയിൽ വീണ്ടും വിതരണം ചെയ്യുകയോ വിൽക്കുകയോ സൗജന്യമായി കൈമാറുകയോ ചെയ്യുന്നത് കാനഡ കൺസ്യൂമർ പ്രൊഡക്റ്റ് സേഫ്റ്റി ആക്ട് പ്രകാരം കടുത്ത കുറ്റകരമാണെന്നും ഹെൽത്ത് കാനഡ ഓർമ്മിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
