വാഷിങ്ടൺ: സുഡാൻ സൈനിക മേധാവി അബ്ദുൽ ഫത്താഹ് അൽ-ബുർഹാനും അമേരിക്കയും തമ്മിലുള്ള ബന്ധത്തിൽ കടുത്ത ഉരസൽ. യു.എസ്. മുന്നോട്ടുവെച്ച വെടിനിർത്തൽ കരാർ അംഗീകരിക്കാൻ തയ്യാറാകാത്തതിനെത്തുടർന്ന് ബുർഹാന് അമേരിക്ക വിസ നിഷേധിച്ചതായി റിപ്പോർട്ട്. ഐക്യരാഷ്ട്രസഭ ജനറൽ അസംബ്ലിയിൽ പങ്കെടുക്കാനായി ന്യൂയോർക്കിലേക്ക് തിരിക്കാനിരിക്കെയാണ് ഈ അടിയന്തര നടപടി.
അമേരിക്കൻ അംബാസഡറും ആഫ്രിക്കൻ കാര്യ ഉപദേഷ്ടാവുമായ മസാദ് ബൂലോസ് മുന്നോട്ടുവെച്ച 90 ദിവസത്തെ വെടിനിർത്തൽ കരാർ അംഗീകരിച്ചാൽ മാത്രമേ വിസ നൽകൂ എന്ന നിലപാടിലാണ് യു.എസ്. അധികൃതർ. എന്നാൽ, ഈ ‘എടുക്കുക അല്ലെങ്കിൽ തള്ളുക’ എന്ന സമീപനം അംഗീകരിക്കാനാവില്ലെന്ന് സുഡാൻ വ്യക്തമാക്കി. വെടിനിർത്തൽ നിർദേശങ്ങളിൽ മാറ്റങ്ങളും കൂടുതൽ ചർച്ചകളും ആവശ്യമാണെന്നാണ് സുഡാന്റെ നിലപാട്.
വിസ നിഷേധിക്കപ്പെട്ടതിനെ തുടർന്ന് ബുർഹാൻ തന്റെ യാത്രാ പദ്ധതി മാറ്റിവെച്ചു. സംഭവത്തിൽ സുഡാൻ സർക്കാർ കടുത്ത അതൃപ്തി രേഖപ്പെടുത്തി. ഇത് അന്താരാഷ്ട്ര നിയമങ്ങളുടെയും യു.എൻ. കൺവെൻഷന്റെയും ലംഘനമാണെന്ന് സുഡാൻ അധികൃതർ കുറ്റപ്പെടുത്തി. യു.എൻ. പൊതുസഭയിൽ ബുർഹാന് പകരം വിദേശകാര്യ മന്ത്രി മൊഹീൽഡിൻ സലേം സംസാരിക്കുമെന്ന് സുഡാൻ വൃത്തങ്ങൾ അറിയിച്ചു.
വിഷയത്തിൽ ഇടപെടണമെന്ന് ആവശ്യപ്പെട്ട് സുഡാന്റെ യു.എൻ. അംബാസഡർ അൽ-ഹാരിത് ഇഡ്രിസ് അൽ-ഹാരിത് യു.എൻ. സെക്രട്ടറി ജനറൽ അന്റോണിയോ ഗുട്ടെറസിന് ഔദ്യോഗികമായി കത്തയച്ചു. അംഗരാജ്യമായ സുഡാന്റെ രാഷ്ട്രത്തലവന് ജനറൽ അസംബ്ലിയിൽ നേരിട്ട് പങ്കെടുക്കാനുള്ള അവസരം നിഷേധിക്കുന്നത് അംഗീകരിക്കാനാവില്ലെന്ന് കത്തിൽ വ്യക്തമാക്കുന്നു. സംഭവത്തിൽ സെക്രട്ടറി ജനറൽ ആശങ്ക പ്രകടിപ്പിച്ചിട്ടുണ്ട്.
സുഡാൻ സൈന്യവും അർധസൈനിക വിഭാഗമായ റാപ്പിഡ് സപ്പോർട്ട് ഫോഴ്സും (ആർ.എസ്.എഫ്.) തമ്മിൽ 2023 ഏപ്രിൽ മുതൽ തുടരുന്ന ആഭ്യന്തരയുദ്ധം ലോകത്തിലെ ഏറ്റവും വലിയ മാനുഷിക പ്രതിസന്ധികളിലൊന്നാണെന്നാണ് യു.എൻ. വിശേഷിപ്പിച്ചത്. ഇതിനിടെ, ഡാർഫൂർ മേഖലയിലെ ആയുധ ഉപരോധം രാജ്യമാകെ വ്യാപിപ്പിക്കാനുള്ള യു.എസ്. നീക്കവും സുഡാൻ സൈന്യവും വാഷിങ്ടണും തമ്മിലുള്ള ഭിന്നത കൂടുതൽ രൂക്ഷമാക്കിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
