ഹാലിഫാക്സ്: നോവ സ്കോഷ്യ പ്രവിശ്യയിൽ വായു നിലവാരം മെച്ചപ്പെടുത്തുന്നതിനായി പുതിയ നിയമങ്ങൾ വരുന്നു. ജൂൺ 1 മുതൽ പ്രാബല്യത്തിൽ വരുന്ന പുതിയ ഉത്തരവ് പ്രകാരം വായു മലിനീകരണമുണ്ടാക്കുന്ന വസ്തുക്കളുടെ പട്ടിക സർക്കാർ വിപുലീകരിച്ചു. നിലവിൽ നിയന്ത്രണമുള്ള 6 വസ്തുക്കൾക്ക് പുറമെ 20 എണ്ണത്തിനെ കൂടി പുതുതായി ഉൾപ്പെടുത്തിയതോടെ ആകെ നിയന്ത്രിത മലിനീകരണകാരികളുടെ എണ്ണം 26 ആയി ഉയർന്നു. 1995-ന് ശേഷം ആദ്യമായാണ് വായു മലിനീകരണ നിയന്ത്രണ നിയമത്തിൽ ഇത്രയും വലിയൊരു മാറ്റം പ്രവിശ്യാ സർക്കാർ കൊണ്ടുവരുന്നത്.
പരിസ്ഥിതി-കാലാവസ്ഥാ വ്യതിയാന മന്ത്രി തിമോത്തി ഹാൾമാൻ വ്യാഴാഴ്ചയാണ് ഈ സുപ്രധാന പ്രഖ്യാപനം നടത്തിയത്. പുതിയ നിയമം നിലവിൽ വരുന്നതോടെ നിർമ്മാണ ശാലകൾ, വൈദ്യുതി നിലയങ്ങൾ, ഖനികൾ, ക്വാറികൾ എന്നിവിടങ്ങളിൽ നിന്നുള്ള പുകയും പൊടിപടലങ്ങളും കൃത്യമായ പരിശോധനയ്ക്ക് വിധേയമാക്കേണ്ടി വരും. പരിസ്ഥിതി അനുമതിയുള്ള എല്ലാ കമ്പനികളും തങ്ങളുടെ വായു നിലവാര പരിശോധന റിപ്പോർട്ടുകളും പുറന്തള്ളുന്ന മലിനീകരണത്തിന്റെ വിവരങ്ങളും ഇനി മുതൽ കൃത്യമായി സർക്കാരിന് കൈമാറണം. വായു ഗുണനിലവാര വിദഗ്ധർ ഈ വിവരങ്ങൾ പരിശോധിച്ച് നിയമലംഘനം നടക്കുന്നുണ്ടോ എന്ന് ഉറപ്പുവരുത്തും.
അമോണിയ, മെർക്കുറി, ലെഡ്, ആഴ്സനിക്, ബെൻസീൻ, ഫോർമാൽഡിഹൈഡ്, കൂടാതെ ശ്വാസകോശത്തിന് ദോഷകരമായ സൂക്ഷ്മ പൊടിപടലങ്ങൾ എന്നിവയുൾപ്പെടെയുള്ളവയാണ് പുതുതായി നിയന്ത്രണമേർപ്പെടുത്തിയ പട്ടികയിലുള്ളത്. ജനങ്ങളുടെ ആരോഗ്യം സംരക്ഷിക്കുന്നതോടൊപ്പം തന്നെ മികച്ച ശമ്പളമുള്ള തൊഴിലവസരങ്ങൾ നൽകുന്ന വ്യവസായ മേഖലകളെ തളർത്താതെ മുന്നോട്ട് കൊണ്ടുപോകാനാണ് സർക്കാർ ശ്രമിക്കുന്നതെന്ന് മന്ത്രി തിമോത്തി ഹാൾമാൻ വ്യക്തമാക്കി.
ആസ്ത്മ, സി.ഒ.പി.ഡി തുടങ്ങിയ ശ്വാസകോശ രോഗങ്ങൾ തടയാൻ പുതിയ നിയമം വലിയ രീതിയിൽ സഹായിക്കുമെന്ന് ലങ് എൻ.എസ്.പി.ഇ.ഐ സി.ഇ.ഒ റോബർട്ട് മക്ഡൊണാൾഡ് പറഞ്ഞു. ശുദ്ധമായ വായു ശ്വസിക്കുന്നത് നോവ സ്കോഷിയയിലെ ജനങ്ങളുടെ ആരോഗ്യത്തിന് അത്യന്താപേക്ഷിതമാണെന്നും ഈ നിയമപരമായ നീക്കം പ്രവിശ്യയുടെ വായു നിലവാരത്തിൽ വലിയ മാറ്റമുണ്ടാക്കുമെന്നും ആരോഗ്യ വിദഗ്ധർ പ്രത്യാശ പ്രകടിപ്പിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Stronger air quality regulations coming to Nova Scotia in June
