സോഷ്യൽ മീഡിയ ഭീമന്മാർക്ക് കുരുക്ക്; മെറ്റയ്‌ക്കെതിരെ അമേരിക്കയിൽ ചരിത്രവിചാരണയ്ക്ക് തുടക്കം

വാഷിംഗ്‌ടൺ: കുട്ടികളെ ബോധപൂർവം ഫേസ്ബുക്കിനും ഇൻസ്റ്റാഗ്രാമിനും അടിമകളാക്കി ലാഭം കൊയ്യുന്നുവെന്ന ആരോപണത്തിൽ സോഷ്യൽ മീഡിയ ഭീമന്മാരായ മെറ്റയ്‌ക്കെതിരെ യു.എസിൽ ചരിത്രവിചാരണ ആരംഭിച്ചു. കാലിഫോർണിയയിലെ ഓക്‌ലൻഡ് ഫെഡറൽ കോടതിയിലാണ് കേസിന്റെ വാദം തുടങ്ങിയത്. അമേരിക്കയിലെ 29 സംസ്ഥാനങ്ങൾ ചേർന്നാണ് മെറ്റയ്‌ക്കെതിരെ നിയമപോരാട്ടത്തിന് ഇറങ്ങിയിരിക്കുന്നത്. ആരോപണങ്ങൾ തെളിയിക്കപ്പെടുകയാണെങ്കിൽ മെറ്റയ്ക്ക് വൻ തുക പിഴയൊടുക്കേണ്ടി വരുമെന്ന് മാത്രമല്ല, ഫേസ്ബുക്കിന്റെയും ഇൻസ്റ്റാഗ്രാമിന്റെയും പ്രവർത്തനങ്ങളിൽ വലിയ മാറ്റങ്ങൾ വരുത്തേണ്ടതായും വരും.

കാലിഫോർണിയ, കൊളറാഡോ, കെന്റക്കി, ന്യൂജേഴ്‌സി എന്നീ നാല് പ്രധാന സംസ്ഥാനങ്ങളാണ് കോടതിയിൽ ഹർജിക്കാരെ പ്രതിനിധീകരിച്ച് പ്രധാന വാദങ്ങൾ ഉന്നയിച്ചത്. കുട്ടികളെ ആപ്പുകളിൽ തളച്ചിടാൻ പാകത്തിലാണ് മെറ്റ ആപ്പുകൾ രൂപകൽപ്പന ചെയ്തിരിക്കുന്നതെന്നും ഇത് കുട്ടികളിൽ വിഷാദം, ഉത്കണ്ഠ, ആത്മഹത്യാ പ്രവണത എന്നിവ വളർത്തുന്നുവെന്നും പ്രോസിക്യൂഷൻ ആരോപിച്ചു. കുട്ടികളുടെ വ്യക്തിഗത വിവരങ്ങൾ ചോർത്തിയതിലൂടെ ഫെഡറൽ നിയമങ്ങളുടെ ലംഘനം നടന്നതായും സംസ്ഥാനങ്ങൾ ചൂണ്ടിക്കാട്ടി.

എന്നാൽ ആരോപണങ്ങളെ പൂർണമായും തള്ളുന്ന നിലപാടാണ് മെറ്റ സ്വീകരിച്ചത്. സോഷ്യൽ മീഡിയ ഉപയോഗവും കൗമാരക്കാരുടെ മാനസികാരോഗ്യ പ്രശ്നങ്ങളും തമ്മിൽ നേരിട്ട് ബന്ധമുണ്ടെന്ന് വ്യക്തമാക്കുന്ന തെളിവുകളില്ലെന്ന് മെറ്റയുടെ അഭിഭാഷകൻ പോൾ സ്മിറ്റ് വാദിച്ചു. സുരക്ഷിതമായ സേവനം നൽകാനാണ് കമ്പനി എപ്പോഴും ശ്രമിക്കുന്നതെന്നും സി.ഇ.ഒ മാർക്ക് സക്കർബർഗിനും ഇതേ നിലപാടാണുള്ളതെന്നും അദ്ദേഹം കോടതിയെ അറിയിച്ചു.

കേസിൽ മെറ്റ കുറ്റക്കാരാണെന്ന് കണ്ടെത്തിയാൽ വൻ തുക പിഴയായി ഒടുക്കേണ്ടി വരും. ഏകദേശം 1.4 ട്രില്യൺ ഡോളർ വരെ പിഴ വന്നേക്കാമെന്ന് മെറ്റ പറയുമ്പോൾ, പിഴത്തുക 200 ബില്യൺ ഡോളറോളം വരാമെന്നാണ് അറ്റോർണി ജനറൽമാർ വ്യക്തമാക്കുന്നത്. കൂടാതെ, ആപ്പുകളിലെ ലൈക് ബട്ടണുകൾ, ഇൻഫിനിറ്റ് സ്ക്രോളിംഗ് എന്നിവ ഒഴിവാക്കാനും 13 വയസ്സിൽ താഴെയുള്ള കുട്ടികൾക്ക് നിയന്ത്രണം ഏർപ്പെടുത്താനും കോടതി ഉത്തരവിട്ടേക്കും.

Also Read : കാനഡയ്ക്കുമേലുള്ള അധിക താരിഫ് നിർത്തിവെച്ച് ട്രംപ്; ചർച്ചകൾ പുരോഗമിക്കുന്നതായി മാർക്ക് കാർണി

മുൻ മെറ്റാ സേഫ്റ്റി എഞ്ചിനീയർ ആർതുറോ ബെജാറാണ് വിചാരണയിൽ ആദ്യ സാക്ഷിയായി ഹാജരായത്. മെറ്റയിലെ സുരക്ഷാ സംവിധാനങ്ങൾ അപൂർണമാണെന്ന് കമ്പനിക്കറിയാമായിരുന്നു എന്ന് അദ്ദേഹം മൊഴി നൽകി. ആറാഴ്ച നീണ്ടുനിൽക്കുന്ന വിചാരണയിൽ മെറ്റ സി.ഇ.ഒ മാർക്ക് സക്കർബർഗ്, ഇൻസ്റ്റാഗ്രാം തലവൻ ആദം മോസേരി എന്നിവരും സാക്ഷികളായി കോടതിയിലെത്തും. ആഗോളതലത്തിൽ തന്നെ സോഷ്യൽ മീഡിയ പ്ലാറ്റ്‌ഫോമുകളുടെ ഭാവി നിർണയിക്കുന്ന ഒന്നായാണ് വിചാരണയെ പ്രൊഫഷണലുകൾ വീക്ഷിക്കുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla