ടൊറന്റോ: ഗ്രേറ്റർ ടൊറന്റോ ഏരിയയിൽ (GTA) വായു മലിനീകരണം അതീവ ഗുരുതരമായി തുടരുന്നതിനിടയിൽ, പ്രദേശത്ത് കനത്ത ഇടിമിന്നലിനും ശക്തമായ കാറ്റിനും സാധ്യതയെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഒന്റാരിയോയുടെ വടക്കുപടിഞ്ഞാറൻ മേഖലയിലുണ്ടായ കാട്ടുതീയെത്തുടർന്ന് പടർന്ന പുക നഗരത്തെ പൂർണ്ണമായും മൂടിയ സാഹചര്യത്തിലാണ് പരിസ്ഥിതി മന്ത്രാലയമായ ‘എൻവയോൺമെന്റ് കാനഡ’ കടുത്ത ജാഗ്രതാ നിർദ്ദേശം പുറപ്പെടുവിച്ചത്.
മണിക്കൂറിൽ 110 കിലോമീറ്റർ വേഗതയുള്ള കാറ്റും ശക്തമായ മഴയും ആലിപ്പഴ വർഷവും ഉണ്ടാകുമെന്നാണ് പ്രവചനം. ഇതേത്തുടർന്ന് മിഷിഗൺ മേഖലയിൽ നിന്നുള്ള തണുത്ത കാറ്റ് ടൊറന്റോ ലക്ഷ്യമാക്കി നീങ്ങുന്നതിനാൽ ജനങ്ങൾ പരമാവധി വീടുകളിൽ തന്നെ തുടരണമെന്ന് അധികൃതർ നിർദ്ദേശിച്ചിട്ടുണ്ട്. ശനിയാഴ്ച രാവിലെ അന്താരാഷ്ട്ര വായു ഗുണനിലവാര സൂചികയായ ‘IQAir’ പുറത്തുവിട്ട പട്ടിക പ്രകാരം ലോകത്തിൽ ഏറ്റവും കൂടുതൽ വായു മലിനീകരണമുള്ള നഗരങ്ങളുടെ പട്ടികയിൽ ടൊറന്റോ ഒന്നാമതെത്തി. അന്തരീക്ഷത്തിലെ മാരകമായ സൂക്ഷ്മകണങ്ങളുടെ (PM 2.5) അളവ് ടൊറന്റോയിൽ ക്യൂബിക് മീറ്ററിന് 72 മുതൽ 80 മൈക്രോഗ്രാം വരെയായി ഉയർന്നതാണ് പ്രതിസന്ധി രൂക്ഷമാക്കിയത്.
മിസിസാഗ, ബ്രാംപ്ടൺ, ഓക്വില്ലെ തുടങ്ങിയ സമീപ നഗരങ്ങളിലും വായുനിലവാരം ആശങ്കാജനകമായി തുടരുകയാണ്. വായു മലിനീകരണ സൂചിക എട്ടിൽ എത്തിയതോടെ നഗരത്തിൽ അതീവ ആരോഗ്യ സുരക്ഷാ മുന്നറിയിപ്പും പുറപ്പെടുവിച്ചിട്ടുണ്ട്. ശ്വാസകോശത്തെ നേരിട്ട് ബാധിക്കുന്ന ഇത്തരം മാരക കണങ്ങൾ ആരോഗ്യപ്രശ്നങ്ങൾ സൃഷ്ടിക്കുമെന്നതിനാൽ മുതിർന്ന പൗരന്മാർ, ഗർഭിണികൾ, കുട്ടികൾ എന്നിവർ പ്രത്യേക മുൻകരുതലുകൾ എടുക്കണമെന്ന് ആരോഗ്യവിദഗ്ദ്ധർ ഓർമ്മിപ്പിക്കുന്നു.
ശക്തമായ മഴ പെയ്യാൻ സാധ്യതയുള്ളതിനാൽ ടൊറന്റോ ആൻഡ് റീജിയൻ കൺസർവേഷൻ അതോറിറ്റി പ്രദേശത്ത് പ്രളയസാധ്യത പ്രവചിച്ചിട്ടുണ്ട്. നദികളുടെയും ജലാശയങ്ങളുടെയും തീരത്തുള്ളവർ ജാഗ്രത പാലിക്കണം. കാലാവസ്ഥാ വ്യതിയാനത്തെത്തുടർന്ന് നഗരത്തിലെ ജനജീവിതം ഭാഗികമായി തടസ്സപ്പെട്ടു. ശനിയാഴ്ച നടക്കേണ്ടിയിരുന്ന പ്രശസ്തമായ ‘ടൊറന്റോ കരീബിയൻ കാർണിവൽ ജൂനിയർ പരേഡ്’ സുരക്ഷ മുൻനിർത്തി ഞായറാഴ്ചത്തേക്ക് മാറ്റിവെച്ചു.
ഫിഫ ഫാൻ ഫെസ്റ്റിവൽ ഉൾപ്പെടെയുള്ള മറ്റ് പ്രധാന പരിപാടികളുടെ സമയത്തിലും മാറ്റം വരുത്തിയിട്ടുണ്ട്. വായുനിലവാരത്തിൽ നേരിയ മാറ്റം വന്നതിനെത്തുടർന്ന് നഗരത്തിലെ ഔട്ട്ഡോർ പൂളുകൾ ഉച്ചയ്ക്ക് ശേഷം തുറന്നെങ്കിലും, വരും മണിക്കൂറുകളിലെ കാലാവസ്ഥ വിലയിരുത്തി മാത്രമായിരിക്കും മറ്റ് പൊതുസേവനങ്ങൾ ലഭ്യമാക്കുകയെന്ന് നഗരസഭാ അധികൃതർ അറിയിച്ചു.
പ്രതിസന്ധി നേരിടാൻ സിറ്റി ഹാൾ, മെട്രോ ഹാൾ ഉൾപ്പെടെ നഗരത്തിന്റെ വിവിധ ഭാഗങ്ങളിലായി ആറോളം ‘ക്ലീനർ എയർ സ്പേസുകൾ’ (ശുദ്ധവായു ലഭ്യമാക്കുന്ന കേന്ദ്രങ്ങൾ) പൊതുജനങ്ങൾക്കായി തുറന്നുനൽകിയിട്ടുണ്ട്. ശ്വാസതടസ്സം, തലവേദന, തൊണ്ടവേദന തുടങ്ങിയ അസ്വസ്ഥതകൾ അനുഭവപ്പെടുന്നവർ ഉടൻ തന്നെ വൈദ്യസഹായം തേടണമെന്നും അധികൃതർ പുറത്തിറക്കിയ പ്രത്യേക വാർത്താക്കുറിപ്പിൽ വ്യക്തമാക്കുന്നു. അടുത്ത കുറച്ചു മണിക്കൂറുകളിൽ പെയ്യുന്ന മഴയോടെ അന്തരീക്ഷത്തിലെ പുകമഞ്ഞ് താല്ക്കാലികമായി ഒഴിഞ്ഞുപോകുമെന്നാണ് കാലാവസ്ഥാ നിരീക്ഷകരുടെ പ്രതീക്ഷ.
saturday-smoke-weather-update-gta-toronto
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
