ബെംഗളൂരു: ഐപിഎല്ലിൽ ഇന്ന് ‘സൂപ്പർ സൺഡേ’. ക്രിക്കറ്റ് ആരാധകർ കാത്തിരിക്കുന്ന ചെന്നൈ സൂപ്പർ കിങ്സ് – റോയൽ ചാലഞ്ചേഴ്സ് ബെംഗളൂരു പോരാട്ടം രാത്രി 7.30-ന് ചിന്നസ്വാമി സ്റ്റേഡിയത്തിൽ നടക്കും. എന്നാൽ പതിവ് വീറും വാശിയും ചെന്നൈയ്ക്ക് അവകാശപ്പെടാനില്ലാത്ത അവസ്ഥയാണിപ്പോൾ. ആദ്യ രണ്ട് മത്സരങ്ങളും തോറ്റ് പോയിന്റ് പട്ടികയിൽ അവസാന സ്ഥാനത്താണ് ചെന്നൈ. മറുവശത്ത് നിലവിലെ ചാമ്പ്യന്മാരുടെ ആത്മവിശ്വാസത്തിൽ കുതിക്കുന്ന ബെംഗളൂരുവാകട്ടെ വിജയത്തുടർച്ച ലക്ഷ്യമിട്ടാണ് ഇറങ്ങുന്നത്.
ചെന്നൈയെ സംബന്ധിച്ച് ബാറ്റിങ്ങിലെ ടോപ്പ് ഓർഡർ ഫോമിലല്ലാത്തത് വലിയ തലവേദനയാണ്. പഞ്ചാബിനെതിരായ കഴിഞ്ഞ മത്സരത്തിൽ ക്യാപ്റ്റൻ ഋതുരാജ് ഗെയ്ക്വാദും (28) മലയാളി താരം സഞ്ജു സാംസണും (7) പരാജയപ്പെട്ടത് ടീമിന് തിരിച്ചടിയായി. എന്നാൽ യുവതാരം ആയുഷ് മാത്രെയുടെയും (73) ശിവം ദുബെയുടെയും (45*) വെടിക്കെട്ട് ബാറ്റിങ്ങിൽ 209 റൺസ് എന്ന കൂറ്റൻ സ്കോർ ചെന്നൈ ഉയർത്തിയെങ്കിലും ബൗളിങ്ങിലെ പിഴവുകൾ വിനയായി.
209 റൺസ് പ്രതിരോധിക്കാൻ ഇറങ്ങിയ ചെന്നൈ ബൗളർമാരെ പഞ്ചാബ് ബാറ്റർമാർ നിലംപരിശാക്കിയിരുന്നു. വെറും 18.4 ഓവറിൽ പഞ്ചാബ് ലക്ഷ്യം കണ്ടത് ചെന്നൈയുടെ ഡെത്ത് ഓവർ സ്പെഷ്യലിസ്റ്റുകൾക്ക് വലിയ പാഠമാണ്. ചിന്നസ്വാമിയിലെ ചെറിയ സ്റ്റേഡിയത്തിൽ കരുത്തരായ ആർസിബി ബാറ്റർമാരെ തളയ്ക്കുക എന്നത് ചെന്നൈയ്ക്ക് വലിയ വെല്ലുവിളിയാകും. ഹൈദരാബാദിനെതിരെ ആധികാരിക ജയം നേടിയാണ് ആർസിബി വരുന്നത്. ബാറ്റിങ്ങിലും ബൗളിങ്ങിലും സന്തുലിതമായ ടീം എന്ന നിലയിൽ ചെന്നൈയെക്കാൾ മുൻതൂക്കം നിലവിൽ ബെംഗളൂരുവിനുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Royal Challengers Bengaluru vs Chennai Super Kings
