നോവ സ്കോഷയിൽ വിദ്യാഭ്യാസ വായ്പയെടുത്ത ബിരുദധാരികൾക്ക് പലിശരഹിത ആനുകൂല്യം നിലനിർത്താൻ ഇനി മുതൽ ഓരോ വർഷവും പ്രത്യേകമായി അപേക്ഷിക്കേണ്ടതില്ല. സീറോ പേഴ്സന്റേജ് ഇൻട്രസ്റ്റ് (Zero per cent interest) പ്രോഗ്രാമിലാണ് പ്രവിശ്യാ സർക്കാർ ചൊവ്വാഴ്ച നിർണ്ണായക മാറ്റങ്ങൾ വരുത്തിയത്. നേരത്തെ, ഈ ആനുകൂല്യത്തിന് അർഹരാണെന്ന് സ്ഥിരീകരിക്കുന്നതിനായി ബിരുദധാരികൾ പ്രതിവർഷം അപേക്ഷ സമർപ്പിക്കേണ്ടി വന്നിരുന്നു.
വിദ്യാർത്ഥികൾക്ക് പഠനാനന്തര ജീവിതത്തിൽ കൂടുതൽ ശ്രദ്ധ കേന്ദ്രീകരിക്കാനാണ് ഈ മാറ്റം നടപ്പിലാക്കിയതെന്ന് ഉന്നത വിദ്യാഭ്യാസ മന്ത്രി ബ്രണ്ടൻ മക്വയർ അറിയിച്ചു. അപേക്ഷാ നടപടികൾ ലഘൂകരിക്കുന്നതിലൂടെ വായ്പാ തിരിച്ചടവ് കൂടുതൽ ലളിതവും വിശ്വസനീയവുമാക്കാൻ സാധിക്കുമെന്ന് അദ്ദേഹം വ്യക്തമാക്കി. നിലവിൽ വായ്പ തിരിച്ചടച്ചു കൊണ്ടിരിക്കുന്നവർക്ക് പുതിയ മാറ്റം സംബന്ധിച്ച അറിയിപ്പ് ഇമെയിൽ വഴി അയച്ചിട്ടുണ്ട്.
പഠനത്തിന് ശേഷം നോവ സ്കോഷയിൽ തന്നെ തുടരുന്ന ബിരുദധാരികൾക്കാണ് ഈ പലിശരഹിത വായ്പാ പദ്ധതിയുടെ പ്രയോജനം ലഭിക്കുന്നത്. 2024-25 കാലയളവിൽ ഏഴായിരത്തിലധികം പേർ ഈ ആനുകൂല്യം ഉപയോഗപ്പെടുത്തിയതായി ഔദ്യോഗിക കണക്കുകൾ വ്യക്തമാക്കുന്നു. വായ്പ തിരിച്ചടയ്ക്കുന്നവർക്ക് വലിയ ആശ്വാസം നൽകുന്ന ഈ തീരുമാനം ബിരുദധാരികളുടെ സാമ്പത്തിക ഭാരം കുറയ്ക്കാൻ സഹായിക്കുമെന്ന് അധികൃതർ വിലയിരുത്തി.
Relief for graduates: Nova Scotia government waives annual application requirement for education loans
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
