ഒട്ടാവ: ആൽബർട്ടയിൽ ഈ വർഷം ഒക്ടോബറിൽ നടക്കാനിരിക്കുന്ന റഫറണ്ടത്തെ മുൻനിർത്തി, പ്രവിശ്യയെ രാജ്യത്തിനൊപ്പം നിലനിർത്താനുള്ള നിർണായക നീക്കവുമായി കൺസർവേറ്റീവ് പാർട്ടി നേതാവ് പിയറി പൊയിലിവ്രെ രംഗത്തെത്തി. “കാനഡയെ ഒന്നായി നിലനിർത്തുക” എന്ന ലക്ഷ്യത്തോടെ പാർക്ലാൻഡ് മണ്ഡലത്തിലെ എംപിയായ ഡെയ്ൻ ലോയ്ഡിനെ “ആൽബർട്ട റഫറണ്ടം ലീഡ്” എന്ന പ്രത്യേക ചുമതലയിലേക്ക് അദ്ദേഹം നിയോഗിച്ചു. കാനഡയ്ക്കുള്ളിൽ ആൽബർട്ടയെ ശക്തമായി നിലനിർത്തുന്നതിനും, പ്രദേശവാസികളുടെ ആശങ്കകൾ കേട്ട് പരിഹാരം കണ്ടെത്തുന്നതിനും വേണ്ടിയാണ് ഈ അടിയന്തര നിയമനം നടത്തിയത്.
ലിബറൽ സർക്കാരിന്റെ ചില നയങ്ങൾ ആൽബർട്ടയുടെ ഊർജമേഖലയെ തളർത്തുകയും പൈപ്പ്ലൈൻ പദ്ധതികൾ തടയുകയും ചെയ്തതാണ് പ്രവിശ്യയിൽ പ്രതിഷേധത്തിന് കാരണമായതെന്ന് പിയറി പൊയിലിവ്രെ ചൂണ്ടിക്കാട്ടി. നിലവിലെ സാഹചര്യത്തിൽ ആൽബർട്ടക്കാരുടെ പരാതികൾ യഥാർത്ഥമാണെന്നും അവരുടെ ആശങ്കകളെ അവഗണിക്കാൻ കഴിയില്ലെന്നും ഡെയ്ൻ ലോയ്ഡിന് അയച്ച കത്തിൽ അദ്ദേഹം വ്യക്തമാക്കി. ജീവിതച്ചെലവ് വർധിച്ചതും സ്വന്തമായി വീട് വാങ്ങാൻ കഴിയാത്തതും കാരണം രാജ്യത്തെ യുവാക്കൾക്കും ക്യുബെക്കുകാർക്കും കാനഡയുടെ വാഗ്ദാനങ്ങളിൽ വിശ്വാസം നഷ്ടപ്പെട്ടു വരികയാണെന്നും, ഈ സാഹചര്യത്തിൽ ആൽബർട്ടക്കാരെ കുറ്റപ്പെടുത്താതെ അവരുടെ ഭാഗം കേൾക്കുകയാണ് ചെയ്യേണ്ടതെന്നും അദ്ദേഹം കൂട്ടിച്ചേർത്തു.
ആൽബർട്ട കാനഡയിൽ നിന്ന് വേർപെടണമോ എന്ന കാര്യത്തിൽ ജനങ്ങളുടെ അഭിപ്രായം തേടുന്ന റഫറണ്ടം ഒക്ടോബറിലാണ് നടക്കുന്നത്. വോട്ടെടുപ്പിന് മുന്നോടിയായി വേർപാട് വികാരങ്ങൾക്കെതിരെ ശക്തമായ പ്രചാരണം നടത്താൻ ഈ വേനൽക്കാലത്ത് വലിയൊരു ഭാഗം താൻ ആൽബർട്ടയിൽ ചെലവഴിക്കുമെന്ന് പൊയ്ലീവ്രെ അറിയിച്ചു. 2017 മുതൽ പാർക്ലാൻഡ് മണ്ഡലത്തെ പ്രതിനിധീകരിക്കുന്ന ഡെയ്ൻ ലോയ്ഡിന് ജനങ്ങളുടെ പ്രശ്നങ്ങളെക്കുറിച്ച് വ്യക്തമായ ധാരണയുണ്ടെന്നും, കാനഡയുടെ ഐക്യം സംരക്ഷിക്കുന്നതിനുള്ള കൺസർവേറ്റീവ് പാർട്ടിയുടെ പ്രവർത്തനങ്ങൾക്ക് നേതൃത്വം നൽകാൻ അദ്ദേഹത്തിന് സാധിക്കുമെന്നും പിയറി പൊയിലിവ്രെ പ്രത്യാശ പ്രകടിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Won't allow Canada to be divided: Pierre Poilievre appoints special lead to tackle Alberta referendum.
