ഒട്ടാവ: കാനഡയിലേക്ക് യാത്ര ചെയ്യുന്ന വിദേശികൾക്കും കാനഡ വഴി മറ്റ് രാജ്യങ്ങളിലേക്ക് പോകുന്ന ട്രാൻസിറ്റ് യാത്രക്കാർക്കുമായി പ്രവേശന മാനദണ്ഡങ്ങൾ വീണ്ടും വ്യക്തമാക്കി കനേഡിയൻ ഇമിഗ്രേഷൻ വകുപ്പായ IRCC. യാത്രക്കാരുടെ പൗരത്വം, യാത്ര ചെയ്യുന്ന മാർഗ്ഗം എന്നിവ അടിസ്ഥാനമാക്കിയാണ് ഇലക്ട്രോണിക് ട്രാവൽ ഓതറൈസേഷൻ (eTA) വേണോ അതോ വിസിറ്റർ വിസ വേണോ എന്ന് തീരുമാനിക്കുന്നത്.
വിസ ഇളവുള്ള രാജ്യങ്ങളിൽ നിന്നുള്ള യാത്രക്കാർ വിമാനമാർഗ്ഗമാണ് കാനഡയിലേക്ക് വരുന്നതെങ്കിൽ eTA നിർബന്ധമാണ്. ഏഴ് കനേഡിയൻ ഡോളർ ചെലവഴിച്ച് അപേക്ഷിക്കാവുന്ന ഇതിന് അഞ്ച് വർഷം വരെ അല്ലെങ്കിൽ പാസ്പോർട്ടിന്റെ കാലാവധി കഴിയുന്നത് വരെ സാധുതയുണ്ടാകും. എന്നാൽ ഇതേ യാത്രക്കാർ കാർ, ബസ്, ട്രെയിൻ, ബോട്ട് അല്ലെങ്കിൽ കപ്പൽ മാർഗ്ഗമാണ് എത്തുന്നതെങ്കിൽ eTA ആവശ്യമില്ല, പകരം സാധുവായ പാസ്പോർട്ട് മാത്രം മതിയാകും. വിസ നിർബന്ധമുള്ള ചില രാജ്യങ്ങളിലെ പൗരന്മാർക്ക് വിമാനമാർഗ്ഗം യാത്ര ചെയ്യുമ്പോൾ മാത്രമായി eTA ഉപയോഗിച്ച് പ്രവേശിക്കാൻ ഇളവുണ്ട്. എന്നാൽ ഇവർ കര-കടൽ മാർഗ്ഗങ്ങളിലാണ് വരുന്നതെങ്കിൽ പൂർണ്ണ വിസിറ്റർ വിസ തന്നെ എടുക്കേണ്ടിവരും.
യു.എസ് പൗരന്മാർക്ക് eTA ആവശ്യമില്ലെങ്കിലും യു.എസ് ഗ്രീൻ കാർഡ് ഉടമകൾ ഏത് മാർഗ്ഗം വഴി കാനഡയിൽ എത്തിയാലും തങ്ങളുടെ മാതൃരാജ്യത്തെ പാസ്പോർട്ടും സാധുവായ ഗ്രീൻ കാർഡും നിർബന്ധമായും കൈയിൽ കരുതേണ്ടതുണ്ട്. ഇരട്ട പൗരത്വമുള്ള കനേഡിയൻ പൗരന്മാർ കനേഡിയൻ പാസ്പോർട്ട് ഉപയോഗിച്ച് മാത്രമേ യാത്ര ചെയ്യാവൂ. കനേഡിയൻ പെർമനന്റ് റെസിഡന്റ് (PR) പദവിയുള്ളവർക്ക് വിസയോ eTA-യോ ആവശ്യമില്ലെങ്കിലും സാധുവായ പി.ആർ കാർഡ് കൈയിൽ കരുതണം. പി.ആർ പദവി പെട്ടെന്ന് റദ്ദാകാത്തതിനാൽ മുൻപ് കാനഡയിൽ താമസിച്ചിട്ടുള്ളവർ തങ്ങളുടെ നിലവിലെ സ്റ്റാറ്റസ് യാത്രയ്ക്ക് മുൻപ് പരിശോധിക്കേണ്ടതുണ്ട്.
ALSO READ: കാനഡ വിസ, പി.ആർ അപേക്ഷകരുടെ ശ്രദ്ധയ്ക്ക്! IRCC-യുടെ പുതിയ പ്രോസസിംഗ് സമയം പുറത്ത്
ഏത് വിഭാഗത്തിൽപ്പെടുന്ന യാത്രക്കാരായാലും സാധുവായ പാസ്പോർട്ട്, നല്ല ആരോഗ്യം, ക്രിമിനൽ പശ്ചാത്തലമില്ലെന്ന് തെളിയിക്കുന്ന രേഖകൾ, സന്ദർശന ശേഷം സ്വന്തം രാജ്യത്തേക്ക് മടങ്ങുമെന്ന ഉറപ്പ്, യാത്രയ്ക്കാവശ്യമായ സാമ്പത്തിക ഭദ്രത എന്നിവ ഉറപ്പുവരുത്തേണ്ടതാണെന്നും അധികൃതർ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
