മുറി കിട്ടാതെ വരാന്തയിൽ മൂന്ന് ദിവസം; സസ്‌കചെവാനിൽ ആശുപത്രിക്കെതിരെ രോഗിയുടെ ഗുരുതര പരാതി

സസ്കാച്ചവാൻ; സസ്കാച്ചവാനിലെ താമസക്കാരിയായ ആൻ ഫോർണിയർ ആശുപത്രിയിലെ അടിയന്തര വിഭാഗത്തിൽ നേരിട്ട അനുഭവം പങ്കുവെച്ച് സസ്‌കചെവാനിലെ ആരോഗ്യ സംവിധാനത്തെ വിമർശിച്ചു. രക്തം ഛർദ്ദിച്ചതിനെ തുടർന്ന് ചികിത്സ തേടിയ ഫോർണിയറെ, ചെറുകുടലിലെ അണുബാധയാണ് പ്രശ്നത്തിന് കാരണമെന്ന് പിന്നീട് കണ്ടെത്തി. എന്നാൽ ആശുപത്രി മുറി ലഭിക്കുന്നതിന് മുമ്പ് മൂന്ന് ദിവസം എമർജൻസി വിഭാഗത്തിന് സമീപമുള്ള ഇടനാഴിയിലെ കിടക്കയിലാണ് കഴിയേണ്ടി വന്നതെന്ന് അവർ പറഞ്ഞു.

ആവശ്യമായ മരുന്നുകളും നിരന്തര നിരീക്ഷണവും ആ ദിവസങ്ങളിൽ ലഭിക്കാതെ ആരോഗ്യനില കൂടുതൽ വഷളായെന്നും, വാർഡിലേക്ക് മാറ്റിയ ശേഷമാണ് ആശ്വാസം ലഭിച്ചതെന്നും അവർ വ്യക്തമാക്കി. ഇടനാഴിയിൽ ശുചിമുറി സൗകര്യമില്ലാതിരുന്നതും സ്വകാര്യത പൂർണമായും നഷ്ടപ്പെട്ടതും അനുഭവം കൂടുതൽ ദുരിതകരമാക്കിയെന്ന് ഫോർണിയർ പറഞ്ഞു. രോഗികൾക്ക് എല്ലാവരുടെയും മുന്നിൽ പോർട്ടബിൾ യൂറിനൽ ഉപയോഗിക്കേണ്ട സാഹചര്യമുണ്ടായിരുന്നുവെന്നും, ദിവസങ്ങളോളം ആ ഭാഗം വൃത്തിയാക്കിയിട്ടില്ലെന്നും അവർ ആരോപിച്ചു.

ഏകദേശം 12 രോഗികളാണ് ഇടനാഴിയിൽ കിടന്നിരുന്നതെന്നും, ആശുപത്രിയിലെ അവസ്ഥയുടെ ചിത്രങ്ങൾ പകർത്തി പ്രവിശ്യാ സർക്കാരിനും ആരോഗ്യമന്ത്രിക്കും പരാതി അയച്ചെങ്കിലും ഇതുവരെ മറുപടി ലഭിച്ചിട്ടില്ലെന്നും അവർ പറഞ്ഞു. ആരോഗ്യരംഗത്തെ ജീവനക്കാരെ നിലനിർത്താനും പുതിയ മെഡിക്കൽ വിദഗ്ധരെ ആകർഷിക്കാനും സർക്കാർ കൂടുതൽ ശ്രദ്ധിക്കണമെന്ന് അവർ ആവശ്യപ്പെട്ടു.

സംഭവത്തിൽ പ്രതികരിച്ച സസ്‌കചെവാൻ ആരോഗ്യമന്ത്രി ജെറമി കോക്രിൽ, ആശുപത്രി ഇടനാഴികളിൽ രോഗികൾ ദിവസങ്ങളോളം കഴിയേണ്ടിവരുന്നത് സർക്കാർ ആഗ്രഹിക്കുന്ന സാഹചര്യമല്ലെന്ന് വ്യക്തമാക്കി. രോഗികളുടെയും ആരോഗ്യപ്രവർത്തകരുടെയും അഭിപ്രായങ്ങൾ പരിഗണിച്ചാണ് പുതിയ Patients First Healthcare Plan നടപ്പാക്കുന്നതെന്നും, സസ്‌കടൂണിലെ ആശുപത്രികളിൽ 146 പുതിയ ഇൻപേഷ്യന്റ് കിടക്കകൾ ഉൾപ്പെടെ ചികിത്സാ ശേഷി വർധിപ്പിക്കുന്ന നടപടികൾ പുരോഗമിക്കുകയാണെന്നും അദ്ദേഹം അറിയിച്ചു.

അതേസമയം, സസ്‌കചെവാൻ യൂണിയൻ ഓഫ് നഴ്‌സസിന്റെ പ്രസിഡന്റ് ബ്രൈസ് ബോയിന്റൺ, ഇത്തരത്തിലുള്ള സംഭവങ്ങൾ ഇപ്പോൾ സാധാരണമാകുകയാണെന്നും, അമിത തിരക്കും ജീവനക്കാരുടെ ക്ഷാമവും രോഗികളുടെ സുരക്ഷയെയും നഴ്‌സുമാരുടെ ജോലി സാഹചര്യങ്ങളെയും ഗുരുതരമായി ബാധിക്കുന്നുവെന്നും മുന്നറിയിപ്പ് നൽകി.

Patient lodges serious complaint against hospital in Saskatchewan.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt