ന്യൂഫൗണ്ടൻലാൻഡ്: ബജറ്റ് വെട്ടിക്കുറയ്ക്കലിന്റെ ഭാഗമായി പാർക്ക്സ് കാനഡയിൽ 500-ഓളം ഫുൾ ടൈം തസ്തികകൾ ഒഴിവാക്കാൻ നീക്കം. ഇതിന്റെ ഭാഗമായി രാജ്യത്താകെ 2,917 ജീവനക്കാർക്ക് തങ്ങളുടെ തസ്തികകൾ പരിശോധനയിലാണെന്ന് അറിയിച്ചുകൊണ്ടുള്ള നോട്ടീസ് ലഭിച്ചു. ന്യൂഫൗണ്ടൻലാൻഡ് ആൻഡ് ലാബ്രഡോർ മേഖലയിൽ ആകെ 281 ജീവനക്കാരുള്ളതിൽ 142 പേർക്കും നോട്ടീസ് ലഭിച്ചിട്ടുണ്ട്.
ഫെഡറൽ ഗവൺമെന്റിന്റെ എക്സ്പെൻഡിച്ചർ റിവ്യൂവിന്റെ ഭാഗമായി അടുത്ത മൂന്ന് വർഷത്തിനുള്ളിൽ പാർക്ക്സ് കാനഡ 145 മില്യൺ ഡോളറിന്റെ ചെലവ് കുറയ്ക്കണം. ഇതിന്റെ ഭാഗമായി ചില പദ്ധതികളുടെ പ്രവർത്തനം കുറയ്ക്കുകയും ചിലത് നിർത്തലാക്കുകയും ചെയ്യും. ഇതോടെ രാജ്യത്താകെ 500-ഓളം ഫുൾ ടൈം തസ്തികകൾ ഇല്ലാതാകുമെന്നാണ് ഏജൻസിയുടെ കണക്ക്.
ALSO READ: കാനഡ-യൂറോപ്യന്‍ ഉച്ചകോടി ബഹിഷ്‌കരിച്ച് ക്യുബെക് പ്രീമിയര്‍
പാർക്ക് വാർഡൻമാർ, വൈൽഡ്‌ലാൻഡ് ഫയർഫൈറ്റർമാർ, സയന്റിസ്റ്റുകൾ, ഗസ്റ്റ് എക്സ്പീരിയൻസ് സ്റ്റാഫ്, ലോ എൻഫോഴ്‌സ്‌മെന്റ്, സെർച്ച് ആൻഡ് റെസ്ക്യൂ വിഭാഗങ്ങളിലെ ജീവനക്കാരുടെ തസ്തികകളും പരിശോധനയിലാണ്. പാർക്ക് സീസൺ അവസാനിക്കുന്നതിന് തൊട്ടുമുമ്പാണ് ന്യൂഫൗണ്ടൻലാൻഡ് ആൻഡ് ലാബ്രഡോറിലെ ജീവനക്കാർക്ക് നോട്ടീസ് ലഭിച്ചത്.
ജീവനക്കാരുടെ തസ്തികകൾ വെട്ടിക്കുറയ്ക്കാനുള്ള നീക്കത്തെ പബ്ലിക് സർവീസ് അലയൻസ് ഓഫ് കാനഡ (PSAC) വിമർശിച്ചു. ‘കാനഡ സ്ട്രോങ് പാസ്’ വഴി പാർക്കുകളിലെ സന്ദർശകരുടെ എണ്ണം വർധിച്ചിരിക്കെ ജീവനക്കാരെ കുറയ്ക്കുന്നത് നിലവിലുള്ളവരുടെ ജോലിഭാരം കൂട്ടുമെന്ന് യൂണിയൻ എക്സിക്യൂട്ടീവ് വൈസ് പ്രസിഡന്റ് ക്രിസ് ഡി ലിബറേറ്റോ പറഞ്ഞു. പാർക്ക് സീസൺ അവസാനിക്കുന്നതിന് തൊട്ടുമുമ്പ് നോട്ടീസ് നൽകിയത് അനുചിതമാണെന്നും യൂണിയൻ ചൂണ്ടിക്കാട്ടി.
നോട്ടീസ് ലഭിച്ചതുകൊണ്ട് മാത്രം ജീവനക്കാർക്ക് ജോലി നഷ്ടപ്പെടുമെന്ന് അർഥമില്ല. തസ്തികകളുടെ പരിശോധന പൂർത്തിയാകുന്നതോടെ ചിലത് നിലനിർത്തുകയും ചിലതിൽ മാറ്റം വരുത്തുകയോ ഒഴിവാക്കുകയോ ചെയ്യും. പിരിച്ചുവിടൽ നേരിടുന്ന ജീവനക്കാർക്ക് ഓപ്ഷൻ ലെറ്റർ ലഭിച്ചശേഷം 120 ദിവസത്തിനുള്ളിൽ മറ്റ് തസ്തികകളിലേക്ക് മാറാനുള്ള അവസരങ്ങൾ തേടുകയോ സെവറൻസ് പാക്കേജ് സ്വീകരിക്കുകയോ ചെയ്യാം. അന്തിമ തീരുമാനങ്ങൾ വരും ആഴ്ചകളിൽ ഉണ്ടാകുമെന്നാണ് പാർക്ക്സ് കാനഡ അറിയിച്ചിരിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
