ക്വീൻസ് കോവ്: ന്യൂഫൗണ്ട്‌ലാൻഡിലെ ക്വീൻസ് കോവിൽ കുടിവെള്ള വിതരണ സംവിധാനം തകരാറിലായതിനെ തുടർന്ന് താമസക്കാർ കടുത്ത മലിനജല ഭീഷണി നേരിടുന്നു. കഴിഞ്ഞ ഒരു വർഷമായി ക്ലോറിനേഷൻ പൈപ്പിലുണ്ടായ ചോർച്ച കാരണം ഫിൽട്രേഷൻ സംവിധാനം പൂർണ്ണമായി നിലച്ച മട്ടിലാണ്. മഴക്കാലത്ത് കുടിവെള്ളത്തിന് കടുത്ത നിറവ്യത്യാസവും ചെളിയുടെ സാന്നിധ്യവും അനുഭവപ്പെടുന്നതായി പ്രദേശവാസികൾ പരാതിപ്പെടുന്നുണ്ട്.
തടസ്സമില്ലാതെ ജലമെത്തിക്കാൻ സ്ഥാപിച്ച ബൈപാസ് സംവിധാനം വഴി റിസർവോയറിൽ നിന്ന് ശുദ്ധീകരിക്കാത്ത വെള്ളമാണ് നേരിട്ട് വീടുകളിലേക്ക് എത്തുന്നത്. ക്വീൻസ് കോവിലെ മുപ്പത്തിയാറോളം കുടുംബങ്ങളെയാണ് ഇത് നേരിട്ട് ബാധിച്ചിരിക്കുന്നത്. വസ്ത്രങ്ങൾ കഴുകാനും ദൈനംദിന ആവശ്യങ്ങൾക്കും ഉപയോഗിക്കാൻ കഴിയാത്തത്ര മലിനമായ വെള്ളമാണ് ടാപ്പുകളിലൂടെ വരുന്നതെന്ന് പ്രദേശവാസികൾ പറഞ്ഞു. എല്ലാ ദിവസവും കുപ്പിവെള്ളം വാങ്ങി ഉപയോഗിക്കേണ്ട അവസ്ഥയിലാണ് അധികമാളുകളും.
നിലവിലെ തകരാറുകൾ പരിഹരിച്ച് പൈപ്പ് ലൈൻ പുനഃസ്ഥാപിക്കാൻ മുപ്പതിനായിരം ഡോളറോളം ചെലവ് വരുമെന്നാണ് ലോക്കൽ സർവീസ് ഡിസ്ട്രിക്റ്റ് വ്യക്തമാക്കുന്നത്. എന്നാൽ സാമ്പത്തിക ബാധ്യത താങ്ങാൻ കഴിയാത്തതിനാൽ പ്രവിശ്യാ സർക്കാരിന്റെ സാമ്പത്തിക സഹായത്തിനായി കാത്തിരിക്കുകയാണ് പ്രാദേശിക ഭരണകൂടം. ജലപ്രതിസന്ധി രൂക്ഷമായി തുടരുമ്പോഴും നികുതി നിരക്കുകൾ വർദ്ധിപ്പിച്ചത് ജനങ്ങൾക്കിടയിൽ പ്രതിഷേധത്തിന് കാരണമായിട്ടുണ്ട്.
Also Read: കാനഡയുടെ പുതിയ ബജറ്റ് പ്രഖ്യാപനം ഈ ആഴ്ച: വ്യാപാര യുദ്ധത്തിനിടെ ജനങ്ങളെ കാത്തിരിക്കുന്നത് എന്തൊക്കെ?
വർഷങ്ങളായി തുടരുന്ന മലിന ജലവിതരണ ശൃംഖല ഉടനടി നവീകരിച്ചില്ലെങ്കിൽ പ്രതിസന്ധി ഇനിയും രൂക്ഷമാകും. മേഖലയിലെ ജനങ്ങളോട് വെള്ളം തിളപ്പിച്ചാറ്റി മാത്രം ഉപയോഗിക്കാൻ അധികൃതർ നിർദ്ദേശം നൽകിയിട്ടുണ്ട്. സർക്കാരിന്റെ തദ്ദേശ സ്വയംഭരണ വകുപ്പുമായി ചേർന്ന് സാമ്പത്തിക സഹായം ലഭ്യമാക്കാനുള്ള ശ്രമങ്ങൾ നടക്കുകയാണെന്ന് വക്താവ് മിഷേൽ ഹണ്ട് അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
