ഒന്റാരിയോ : കാനഡയിൽ റിയൽ എസ്റ്റേറ്റ് തട്ടിപ്പിൽ പെട്ട് സർവ്വ സമ്പാദ്യവും നഷ്ടപ്പെട്ട നിരവധി പേർക്ക് ഒടുവിൽ പ്രതീക്ഷയുടെ നാളുകൾ. പ്രീ-കൺസ്ട്രക്ഷൻ വീടുകളുടെ പേരിൽ ലക്ഷക്കണക്കിന് രൂപ നിക്ഷേപിച്ച് വഞ്ചിക്കപ്പെട്ട ഒന്റാരിയോയിലെ ബ്രാംപ്ടൺ സ്വദേശി ജാനെറ്റ് കാമ്പ്ബെൽ ഉൾപ്പെടെയുള്ളവർക്കാണ് ഒന്റാരിയോയിലെ പുതിയ ഭവന വാറന്റി പ്രോഗ്രാം നടപ്പിലാക്കുന്ന Tarion എന്ന സ്ഥാപനത്തിൽ നിന്ന് നിക്ഷേപ തുകയുടെ ഒരു ഭാഗം തിരികെ ലഭിച്ചത്. ജാനെറ്റ് കാമ്പ്ബെലിന് 15,000 ഡോളറാണ് തിരികെ ലഭിച്ചത്. ഈ തുക തനിക്ക് വലിയൊരു ആശ്വാസമായെന്നും കടങ്ങൾ വീട്ടാൻ ഇത് സഹായിച്ചെന്നും അവർ വ്യക്തമാക്കി. മറ്റ് നിരവധി ഇരകൾക്കും ഈ ആനുകൂല്യം ലഭിക്കുമെന്നത് ഈ കേസിൽ വലിയൊരു മുൻമാതൃകയാകുമെന്ന് ഇരകളുടെ അഭിഭാഷകൻ ആൻഡ്രൂ ബാലന്റൈൻ പറഞ്ഞു.
നാല് വർഷം മുമ്പാണ് ടൊറന്റോയിലെ കറുത്ത വർഗ്ഗക്കാരായ ജനവിഭാഗങ്ങളെ ലക്ഷ്യമിട്ട് ഈ വൻ തട്ടിപ്പ് അരങ്ങേറിയത്. മൊയ്സ് കുൻവാർ (Moiz Kunwar) എന്ന 29-കാരൻ, തനിക്ക് വിൽക്കാൻ അവകാശമില്ലാത്തതും യഥാർത്ഥ ഡെവലപ്പർമാരുടേതുമായ പ്രീ-കൺസ്ട്രക്ഷൻ വീടുകളുടെ പേരിൽ ഉപഭോക്താക്കളിൽ നിന്ന് വൻ തുക മുൻകൂർ ഡെപ്പോസിറ്റായി വാങ്ങി വഞ്ചിക്കുകയായിരുന്നു. സ്വന്തമായി ഒരു വീട് എന്ന സ്വപ്നവുമായി ജീവിച്ചിരുന്ന സാധാരണക്കാരാണ് തട്ടിപ്പിന് ഇരയായത്. കുൻവാറിനെതിരെ ക്രിമിനൽ വഞ്ചനാ കുറ്റങ്ങൾക്കും സിവിൽ കേസുകൾക്കും പുറമെ കോടതിയിൽ വിചാരണയും പുരോഗമിക്കുകയാണ്. തനിക്കെതിരായ ആരോപണങ്ങൾ കുൻവാർ കോടതിയിൽ നിഷേധിച്ചിട്ടുണ്ട്.
അഭിഭാഷകനായ ആൻഡ്രൂ ബാലന്റൈൻ തന്റെ 12 കക്ഷികൾക്കായി ടാരിയോയ്ക്ക് മുന്നിൽ അപേക്ഷ സമർപ്പിച്ചതിൽ ഏഴ് പേരുടെ ക്ലെയിമുകളാണ് ഇതിനകം അംഗീകരിച്ചത്. ഇതുവഴി ആകെ 300,000 ഡോളറിലധികം തുകയാണ് ഇരകൾക്ക് തിരികെ ലഭിച്ചത്. നാല് അപേക്ഷകൾ തള്ളിക്കളയുകയും ഒന്ന് പരിഗണനയിലിരിക്കുകയും ചെയ്യുന്നു. എന്നാൽ പണം നേരിട്ട് കുൻവാറിനോ മറ്റ് കമ്പനികൾക്കോ നൽകിയതുകൊണ്ട് തള്ളിക്കളഞ്ഞ കേസുകൾക്കെതിരെ ലൈസൻസ് അപ്പീൽ ട്രിബ്യൂണലിൽ അപ്പീൽ പോകാൻ അഭിഭാഷകൻ തീരുമാനിച്ചിട്ടുണ്ട്. ഇരകൾക്ക് നഷ്ടപ്പെട്ട മൊത്തം തുക 40 ലക്ഷം ഡോളറിലധികം വരും. പുതിയ വീട് വാങ്ങുന്നവർ ലൈസൻസുള്ള ബിൽഡർമാരുമായാണോ ഇടപാട് നടത്തുന്നതെന്ന് ഉറപ്പുവരുത്തണമെന്ന് അധികൃതർ മുന്നറിയിപ്പ് നൽകുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
