നോവ സ്കോഷിയയിലെ ഫയർ സർവീസ് സംവിധാനങ്ങൾ ശക്തിപ്പെടുത്തുന്നതിനായി പ്രവിശ്യാ സർക്കാർ പുതിയ നിയമം അവതരിപ്പിച്ചു. ‘സപ്പോർട്ട് ഫോർ ഫയർ പ്രൊട്ടക്ഷൻ സർവീസസ് ആക്ട്’ എന്ന പേരിലുള്ള ഈ നിയമം തിങ്കളാഴ്ചയാണ് സഭയിൽ വെച്ചത്. എമർജൻസി മാനേജ്മെന്റ് മന്ത്രി കിം മാസ്ലാൻഡിന്റെ മേൽനോട്ടത്തിലായിരിക്കും പുതിയ പരിഷ്കാരങ്ങൾ നടപ്പിലാക്കുക. ഫയർ സർവീസുകളെ ആധുനികവൽക്കരിക്കുക, സുരക്ഷ ഉറപ്പാക്കുക എന്നിവയാണ് ഇതിന്റെ പ്രധാന ലക്ഷ്യങ്ങൾ.
പുതിയ നിയമത്തിന്റെ ഭാഗമായി പ്രവിശ്യയിലുടനീളം ഫയർ സർവീസുകൾക്കായി കൃത്യമായ മാനദണ്ഡങ്ങൾ കൊണ്ടുവരും. അഗ്നിശമന സേനാംഗങ്ങൾക്ക് മികച്ച പരിശീലനവും അംഗീകൃത സർട്ടിഫിക്കേഷനും ഉറപ്പാക്കുന്നതിനൊപ്പം എല്ലാ സേനാംഗങ്ങൾക്കും മെച്ചപ്പെട്ട വ്യക്തിഗത സുരക്ഷാ ഉപകരണങ്ങൾ ലഭ്യമാക്കാനും സർക്കാർ ലക്ഷ്യമിടുന്നു. നിലവിൽ മുൻസിപ്പൽ ഫയർ സർവീസിന്റെ ഭാഗമല്ലാത്ത ഡിപ്പാർട്ട്മെന്റുകൾക്കും കമ്മീഷനുകൾക്കും നിലവിലെ രീതിയിൽ തന്നെ തുടരാമെന്നും സർക്കാർ വ്യക്തമാക്കിയിട്ടുണ്ട്.
ഫയർ സർവീസുകളുടെ ഏകോപനത്തിനും പിന്തുണക്കുമായി ഒരു ‘ഓഫീസ് ഓഫ് ദി ഫയർ കമ്മീഷണർ’ രൂപീകരിക്കും എന്നതാണ് ഈ നിയമത്തിലെ ശ്രദ്ധേയമായ ഒരു കാര്യം. കൂടാതെ വാഹനം, ഉപകരണങ്ങൾ, ഇൻഷുറൻസ് എന്നിവ ഒന്നിച്ച് വാങ്ങുന്നതിലൂടെ ചെലവ് കുറയ്ക്കാൻ ഫയർ ഡിപ്പാർട്ട്മെന്റുകളെ സർക്കാർ സഹായിക്കും. ഈ മേഖലയിലെ മാറ്റങ്ങൾക്കായി കഴിഞ്ഞ ഒരു വർഷത്തിനിടെ 700-ലധികം ഫയർ ചീഫുമാരുമായും മറ്റ് നേതാക്കളുമായും നടത്തിയ ചർച്ചകളുടെ ഫലമായാണ് പുതിയ നിയമം രൂപീകരിച്ചതെന്ന് മന്ത്രി കിം മാസ്ലാൻഡ് അറിയിച്ചു.
പുതിയ നിയമപ്രകാരം എല്ലാ മുനിസിപ്പാലിറ്റികളും തങ്ങളുടെ പ്രദേശത്തെ ഫയർ സർവീസ് അവലോകനം നടത്തി റിപ്പോർട്ട് നൽകേണ്ടതുണ്ട്. സേനാംഗങ്ങളുടെ പരിശീലനവും ഉപകരണങ്ങളും നിശ്ചിത നിലവാരം പുലർത്തുന്നുണ്ടെന്ന് ഉറപ്പാക്കണമെന്നും പൊതുവായ ഒരു റെക്കോർഡ് മാനേജ്മെന്റ് സിസ്റ്റത്തിന്റെ ഭാഗമാകണമെന്നും നിർദ്ദേശമുണ്ട്. കഴിഞ്ഞ 50 വർഷത്തിലേറെയായി കാത്തിരുന്ന മാറ്റമാണിതെന്നും പൊതുജനങ്ങളുടെ സുരക്ഷ ഉറപ്പാക്കാൻ ഈ നിയമം സഹായിക്കുമെന്നും ഫയർ സർവീസ് അസോസിയേഷൻ പ്രസിഡന്റ് ഗ്രെഗ് ജോൺസ് പ്രതികരിച്ചു. നിലവിൽ 363 ഫയർ സർവീസ് സംഘടനകളാണ് നോവ സ്കോഷിയയിൽ പ്രവർത്തിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Nova Scotia introduces new act aimed at supporting fire services
