ഫ്ലൂ സീസൺ നേരത്തെ: ആരോഗ്യകേന്ദ്രങ്ങളിൽ മാസ്ക് ധരിക്കൽ വീണ്ടും നിർബന്ധമാക്കി നോവ സ്കോഷ്യ ഹെൽത്ത്

ഹാലിഫാക്സ്: നോവ സ്കോഷ്യയിൽ ഫ്ലൂ വ്യാപനം നേരത്തെയാകാനുള്ള സാധ്യത കണക്കിലെടുത്ത് എല്ലാ ആരോഗ്യ കേന്ദ്രങ്ങളിലും മാസ്ക് ധരിക്കൽ വീണ്ടും നിർബന്ധമാക്കി. നോവ സ്കോഷ്യ ഹെൽത്ത് അതോറിറ്റിയാണ് ഇത് സംബന്ധിച്ച ഉത്തരവ് പുറപ്പെടുവിച്ചത്. ആശുപത്രികളിൽ എത്തുന്ന സന്ദർശകർ, രോഗികൾ എന്നിവർക്കെല്ലാം ഈ നിബന്ധന ഇനിമുതൽ ബാധകമായിരിക്കും.

കഴിഞ്ഞ കുറച്ച് വർഷങ്ങളെ അപേക്ഷിച്ച് ഇത്തവണ ഇൻഫ്ലുവൻസ സീസൺ നേരത്തെ ആരംഭിച്ചതായും പനിയുടെ തീവ്രത വർദ്ധിക്കാൻ സാധ്യതയുള്ളതായും അധികൃതർ നിരീക്ഷിച്ചു. സാധാരണയായി ഡിസംബർ അവസാനമോ ജനുവരി ആദ്യമോ കണ്ടുവരുന്ന രോഗവ്യാപനം, ഇത്തവണ ഡിസംബർ ആദ്യം തന്നെ പ്രകടമായി തുടങ്ങിയിട്ടുണ്ട്. ഈ സാഹചര്യത്തിലാണ് മുൻകരുതൽ എന്ന നിലയിൽ മാസ്ക് നയം വീണ്ടും നടപ്പിലാക്കുന്നത്.

ഹോസ്പിറ്റലുകൾ, ക്ലിനിക്കുകൾ എന്നിവയുടെ പ്രവേശന കവാടങ്ങളിൽ തന്നെ മാസ്ക് ധരിക്കണമെന്നാണ് നിർദ്ദേശം. അതേസമയം, രോഗികളുടെ ബെഡ്ഡിന് സമീപമുള്ള സന്ദർശകർക്കും കഫറ്റീരിയകളിൽ ഇരിക്കുന്നവർക്കും ഈ നിയമത്തിൽ ഇളവുണ്ട്. ആവശ്യമായ മാസ്കുകളും സാനിറ്റൈസർ സൗകര്യങ്ങളും എല്ലാ ആശുപത്രികളിലും ലഭ്യമാക്കിയിട്ടുണ്ടെന്ന് ആരോഗ്യവകുപ്പ് അറിയിച്ചു.

പ്രവിശ്യയിലെ മുതിർന്ന പൗരന്മാർക്കും രോഗപ്രതിരോധ ശേഷി കുറഞ്ഞവർക്കും പുതിയ സാഹചര്യം ഭീഷണിയായേക്കാം. നിലവിൽ പടരുന്ന ‘എച്ച്3എൻ2’ (H3N2) എന്ന വൈറസ് വകഭേദം കൂടുതൽ അപകടകാരിയാണെന്ന് ആരോഗ്യ വിദഗ്ധ ഡോ. ഷെല്ലി മക്‌നീൽ ചൂണ്ടിക്കാട്ടി. ഇപ്പോൾ ലഭ്യമായ വാക്സിനുകൾ ഈ വൈറസിനെ പ്രതിരോധിക്കുന്നതിൽ എത്രത്തോളം ഫലപ്രദമാകുമെന്ന കാര്യത്തിലും ഡോക്ടർമാർ സംശയം പ്രകടിപ്പിക്കുന്നുണ്ട്.

ആശുപത്രികളിൽ അഡ്മിറ്റ് ചെയ്തിട്ടുള്ള മറ്റ് രോഗികളിലേക്ക് പകർച്ചവ്യാധി പടരുന്നത് തടയാനാണ് പ്രാഥമികമായി ഈ നീക്കം കൊണ്ടുവന്നിരിക്കുന്നത് . “ആശുപത്രികളിൽ ചികിത്സയിലുള്ളവർ അതീവ ശ്രദ്ധ ആവശ്യമുള്ളവരാണ്. ചെറിയ ജലദോഷമായി മറ്റൊരാളിൽ കാണുന്ന വൈറസ്, ഹൃദ്രോഗമോ ശ്വാസകോശ സംബന്ധമായ അസുഖങ്ങളോ ഉള്ളവർക്ക് ജീവഹാനി വരെ വരുത്തിയേക്കാം,” ഡോ. മക്‌നീൽ വ്യക്തമാക്കി.

നേരത്തെ നവംബർ 12 മുതൽ തന്നെ ഐ.ഡബ്ല്യു.കെ (IWK) ഹെൽത്ത് സെന്ററിൽ മാസ്ക് നിർബന്ധമാക്കിയിരുന്നു. ഇതിന് പിന്നാലെയാണ് ഇപ്പോൾ പ്രവിശ്യയിലെ മുഴുവൻ ആരോഗ്യകേന്ദ്രങ്ങളിലും ഈ നിയന്ത്രണം ഏർപ്പെടുത്തിയിരിക്കുന്നത്. രോഗവ്യാപനം തടയാൻ പൊതുജനങ്ങൾ സഹകരിക്കണമെന്നും അധികൃതർ അഭ്യർത്ഥിച്ചു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Flu season early: Nova Scotia Health re-mands mask-wearing in health facilities