ഓട്ടവ: 2018-ലെ കാനഡ ലോക ജൂനിയർ ഹോക്കി ടീം അംഗങ്ങളായ അഞ്ചു താരങ്ങളെ ലൈംഗികാതിക്രമക്കേസിൽ കോടതി കുറ്റവിമുക്തരാക്കിയതിനെ തുടർന്ന് ഇവർ വിവിധ ലീഗുകളിലേക്ക് മടങ്ങിയെത്തി. 2018-ൽ ഒന്റാറിയോയിലെ ലണ്ടനിൽ നടന്ന ഗാലാ പരിപാടിക്കിടെയുണ്ടായ കേസിൽ അലക്സ് ഫോർമെന്റൺ, കാർട്ടർ ഹാർട്ട്, ഡില്ലൺ ഡുബേ, കാൽ ഫൂട്ട്, മൈക്കൽ മക്ലിയോഡ് എന്നിവരെയാണ് 2025 ജൂലൈയിൽ കോടതി ഒഴിവാക്കിയത്. തുടർന്ന് ദേശീയ ഹോക്കി ലീഗ് (NHL) അഞ്ചുപേരുടെയും വിലക്ക് നീക്കി കളിക്കാൻ അനുമതി നൽകി.
കോടതി കേസ് തള്ളിയെങ്കിലും, സംഘടനയുടെ അച്ചടക്ക നിയമങ്ങൾ തെറ്റിച്ചതായി കാട്ടി അഞ്ച് താരങ്ങൾക്കും ഹോക്കി കാനഡ വിലക്കേർപ്പെടുത്തി. ഓരോ കളിക്കാരനും ലഭിച്ച വിലക്കിന്റെ കാലാവധി വ്യത്യസ്തമാണ്. എന്നാൽ ഈ സമയത്തും ചില താരങ്ങൾ വിവിധ ക്ലബ്ബുകളുമായി കരാറിലെത്തി കളത്തിലേക്ക് മടങ്ങിയെത്തിയിട്ടുണ്ട്. അലക്സ് ഫോർമെന്റൺ ‘എഡ്മിന്റൻ ഓയിലേഴ്സ്’ എന്ന ടീമിലും, ഗോൾകീപ്പറായ കാർട്ടർ ഹാർട്ട് ‘വേഗാസ് ഗോൾഡൻ നൈറ്റ്സ്’ എന്ന ടീമിലുമാണ് ചേർന്നത്. തിരിച്ചുവരവിൽ മികച്ച പ്രകടനം പുറത്തെടുത്ത കാർട്ടർ ഹാർട്ട്, തന്റെ ടീമിനെ പ്രശസ്തമായ സ്റ്റാൻലി കപ്പ് ഫൈനൽ വരെ എത്തിക്കുന്നതിൽ നിർണായക പങ്ക് വഹിക്കുകയും ചെയ്തു.
Also Read: കാനഡ-ഫ്രാൻസ് ബന്ധം കൂടുതൽ ശക്തമാകുന്നു; മാക്രോണുമായി കൂടിക്കാഴ്ച നടത്തി കാർണി
മറ്റു മൂന്ന് താരങ്ങളും കളിക്കളത്തിൽ വ്യത്യസ്ത ഘട്ടങ്ങളിലാണ്. ഡില്ലൺ ഡുബേ ‘സെന്റ് ലൂയിസ് ബ്ലൂസ്’ ടീമിലൂടെ കളിയിലേക്ക് തിരിച്ചെത്തി. എന്നാൽ കാൽ ഫൂട്ട് എന്ന കളിക്കാരന് സ്വീഡിഷ് ക്ലബ്ബുമായുള്ള കരാർ റദ്ദായതിനാൽ, നിലവിൽ ഹോക്കി കാനഡയുടെ വിലക്ക് അവസാനിക്കുന്നതും കാത്തിരിക്കുകയാണ്. അതേസമയം, മൈക്കൽ മക്ലിയോഡ് റഷ്യയിലെ കെഎച്ച്എൽ (KHL) ലീഗിലേക്ക് മാറുകയും അവിടുത്തെ ടീമുമായി കരാറിലാവുകയും ചെയ്തു. അഞ്ച് താരങ്ങളിൽ ഏറ്റവും കൂടുതൽ കാലത്തേക്ക് വിലക്ക് ലഭിച്ചിരിക്കുന്നതും മക്ലിയോഡിനാണ്. 2030 വരെ അദ്ദേഹത്തിന് കാനഡയുടെ ദേശീയ ഹോക്കി പരിപാടികളിൽ പങ്കെടുക്കാൻ സാധിക്കില്ല.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
