ഒട്ടാവ: കാനഡയിലെ സെനറ്റ് നിയമനങ്ങളിൽ സുപ്രധാന നയമാറ്റം പ്രഖ്യാപിച്ച് പ്രധാനമന്ത്രി മാർക്ക് കാർണി. അധികാരമേറ്റ് ഒരു വർഷത്തിലേറെയായതിന് ശേഷമുള്ള ആദ്യ സെനറ്റ് നിയമനങ്ങളിൽ നാല് പേരെ തെരഞ്ഞെടുത്ത കാർണി, ഇതോടൊപ്പം സെനറ്റ് അംഗങ്ങളെ നിയമിക്കുന്നതിലെ പാർട്ടിനിരപേക്ഷ (Non-partisan) മാനദണ്ഡം സർക്കാർ ഒഴിവാക്കുന്നതായും പ്രഖ്യാപിച്ചു. മുൻ പ്രധാനമന്ത്രി ജസ്റ്റിൻ ട്രൂഡോ നടപ്പാക്കിയിരുന്ന സമീപനത്തിൽ നിന്നുള്ള പ്രധാന വ്യതിയാനമായാണ് ഈ തീരുമാനം വിലയിരുത്തപ്പെടുന്നത്. ആദ്യഘട്ട നിയമനത്തിൽ കൺസർവേറ്റീവ് പാർട്ടിയുടെ എംപിയായിരുന്ന റിച്ചാർഡ് മാർട്ടൽ, പ്രധാനമന്ത്രിയുടെ മുഖ്യ തന്ത്രജ്ഞനും ദീർഘകാല ലിബറൽ ഉപദേഷ്ടാവുമായ ടോം പിറ്റ്ഫീൽഡ്, മനിറ്റോബയിൽ നിന്നുള്ള ചാർട്ടേഡ് പ്രൊഫഷണൽ അക്കൗണ്ടന്റും കോർപ്പറേറ്റ് എക്സിക്യൂട്ടീവുമായ ഗീത ടക്കർ, ന്യൂ ബ്രൺസ്വിക്കിൽ നിന്നുള്ള കാൻസർ ഗവേഷകനായ ഡോ. റോഡ്നി ഔലറ്റ് എന്നിവരാണ് ഉൾപ്പെട്ടത്.
സെനറ്റിലേക്ക് നിയമിക്കപ്പെടുന്നതിനായി മാർട്ടൽ എംപി സ്ഥാനം ഔദ്യോഗികമായി രാജിവച്ചു. 2018-ൽ ക്യൂബെക്കിലെ ചിക്കൂട്ടിമി–ലെ ഫ്യോർഡ് മണ്ഡലത്തിൽ നിന്ന് ആദ്യമായി തിരഞ്ഞെടുക്കപ്പെട്ട മാർട്ടൽ, 2025ലെ ഫെഡറൽ തിരഞ്ഞെടുപ്പിൽ 34.1 ശതമാനം വോട്ടോടെ സീറ്റു നിലനിർത്തിയിരുന്നു. അദ്ദേഹത്തിന് പിന്നാലെ ബ്ലോക്ക് ക്യൂബെക്കോയും ലിബറൽ സ്ഥാനാർഥിയും ഏകദേശം 31 ശതമാനം വീതം വോട്ടുകൾ നേടിയിരുന്നു. കഴിഞ്ഞ ഫെഡറൽ തിരഞ്ഞെടുപ്പിന് ശേഷം കൺസർവേറ്റീവ് പാർട്ടി അംഗത്വം വിട്ട അഞ്ചാമത്തെ എംപിയാണ് മാർട്ടൽ.
ടോം പിറ്റ്ഫീൽഡ് പ്രധാനമന്ത്രിയുടെ പ്രിൻസിപ്പൽ സെക്രട്ടറിയായി പ്രവർത്തിച്ചുവരികയായിരുന്നു. കൃത്രിമ ബുദ്ധി, ഡിജിറ്റൽ സമ്പദ്വ്യവസ്ഥ തുടങ്ങിയ വിഷയങ്ങളിൽ പ്രധാനമന്ത്രിക്ക് ഉപദേശം നൽകിയിരുന്ന അദ്ദേഹം, മുമ്പ് സെനറ്റിലെ സർക്കാർ നേതാവിന്റെ മുതിർന്ന നയ ഉപദേഷ്ടാവായും സേവനമനുഷ്ഠിച്ചിട്ടുണ്ട്. അദ്ദേഹത്തിന്റെ പിതാവ് മൈക്കൽ പിറ്റ്ഫീൽഡും 1982-ൽ മുൻ പ്രധാനമന്ത്രി പിയർ എലിയറ്റ് ട്രൂഡോയുടെ ശുപാർശ പ്രകാരം സെനറ്റിലേക്ക് നിയമിക്കപ്പെട്ടിരുന്നു.
ഗീത ടക്കർക്ക് സ്വകാര്യ, പൊതുമേഖലകളിലും ലാഭേച്ഛയില്ലാത്ത സ്ഥാപനങ്ങളിലുമായി മൂന്ന് പതിറ്റാണ്ടിലേറെ പ്രവൃത്തി പരിചയമുണ്ട്. നോർട്ടൽ, ഷോ കമ്മ്യൂണിക്കേഷൻസ് തുടങ്ങിയ സ്ഥാപനങ്ങളിൽ അവർ പ്രവർത്തിച്ചിട്ടുണ്ട്. അതേസമയം, അറ്റ്ലാന്റിക് കാൻസർ റിസർച്ച് ഇൻസ്റ്റിറ്റ്യൂട്ട് സ്ഥാപിച്ച ഡോ. റോഡ്നി ഔലറ്റ് കാനഡയിലെ കാൻസർ ഗവേഷണവും പ്രിസിഷൻ മെഡിസിൻ മേഖലയുടെയും വളർച്ചയിൽ നിർണായക പങ്കുവഹിച്ച വ്യക്തിയാണ്. ടെറി ഫോക്സ് റിസർച്ച് ഇൻസ്റ്റിറ്റ്യൂട്ട് ഉൾപ്പെടെയുള്ള ദേശീയ ഗവേഷണ സ്ഥാപനങ്ങളുമായി അദ്ദേഹം സഹകരിച്ചിട്ടുണ്ട്.
കാനഡയിൽ സെനറ്റ് അംഗങ്ങളെ ഗവർണർ ജനറലാണ് പ്രധാനമന്ത്രിയുടെ ഉപദേശപ്രകാരം നിയമിക്കുന്നത്. നിയമനം ലഭിച്ച ശേഷം നിയമനിർമാണങ്ങൾ വിശദമായി പരിശോധിക്കുക, ദേശീയ പ്രാധാന്യമുള്ള വിഷയങ്ങൾ വിലയിരുത്തുക, വിവിധ പ്രവിശ്യകളുടെയും ജനവിഭാഗങ്ങളുടെയും താൽപര്യങ്ങൾ പ്രതിനിധീകരിക്കുക എന്നിവയാണ് സെനറ്റ് അംഗങ്ങളുടെ പ്രധാന ചുമതലകൾ.
നിയമനങ്ങൾക്കൊപ്പം സെനറ്റ് തിരഞ്ഞെടുപ്പ് പ്രക്രിയയിലും സർക്കാർ മാറ്റങ്ങൾ പ്രഖ്യാപിച്ചു. ഇനി മുതൽ പാർട്ടിനിരപേക്ഷത എന്ന മാനദണ്ഡം നിർബന്ധമാകില്ലെന്ന് സർക്കാർ വ്യക്തമാക്കി. തിരഞ്ഞെടുക്കപ്പെട്ട ജനപ്രതിനിധികളായോ രാഷ്ട്രീയ ചുമതലകൾ വഹിച്ചവരായോ പ്രവർത്തിച്ചവരുടെ നിയമനിർമാണ പരിചയവും ഭരണപരമായ അറിവും കൂടുതൽ ശക്തമായ സെനറ്റിന് സഹായകരമാകുമെന്നാണ് സർക്കാരിന്റെ വിശദീകരണം. പുതിയ മാനദണ്ഡങ്ങൾ പരിഗണിച്ച് യോഗ്യരായ സ്ഥാനാർഥികളെ കണ്ടെത്താൻ ഉടൻ പുതിയ ഉപദേശക സമിതിയും രൂപീകരിക്കുമെന്ന് പ്രധാനമന്ത്രിയുടെ ഓഫീസ് അറിയിച്ചു.
നിലവിലെ നാല് നിയമനങ്ങളും ഔദ്യോഗികമായി പ്രാബല്യത്തിൽ വന്നാൽ സെനറ്റിൽ ആറു ഒഴിവുകൾ മാത്രമേ ശേഷിക്കൂ. ഈ വർഷാവസാനത്തോടെ അഞ്ച് ഒഴിവുകൾ കൂടി രൂപപ്പെടുമെന്നാണ് സർക്കാർ വ്യക്തമാക്കുന്നത്. സെനറ്റ് നിയമന പ്രക്രിയയിലെ ഈ മാറ്റങ്ങളെക്കുറിച്ചുള്ള കൂടുതൽ വിവരങ്ങൾ സർക്കാർ വരും ദിവസങ്ങളിൽ പുറത്തുവിടും.
New twist in Senate appointment; non-partisan criteria dropped for Mark Carney.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
