ഈ ആഴ്ച അക്കൗണ്ടിലേക്ക് പണമെത്തും; അടുത്ത മാസം മുതൽ ഒന്റാറിയോ ട്രില്ല്യം ബെനഫിറ്റ് തുക വർദ്ധിക്കും

ടൊറന്റോ: ഒന്റാറിയോയിലെ ലക്ഷക്കണക്കിന് കുടുംബങ്ങൾക്ക് ആശ്വാസമായി ഈ വർഷത്തെ അവസാന ഒന്റാറിയോ ട്രില്ല്യം ബെനഫിറ്റ് തുക ഈ ആഴ്ച ബാങ്ക് അക്കൗണ്ടുകളിലേക്ക് എത്തും. ജൂൺ 10 ബുധനാഴ്ചയാണ് ഈ സൈക്കിളിലെ അവസാന പേയ്‌മെന്റ് വരുന്നത്. തൊട്ടടുത്ത മാസമായ ജൂലൈ മുതൽ പുതിയ നിരക്കിലുള്ള വർദ്ധിപ്പിച്ച തുക വിതരണം ചെയ്യുമെന്നും കാനഡ റവന്യൂ ഏജൻസി വ്യക്തമാക്കുന്നു. ജീവിതച്ചെലവ് വർദ്ധിച്ച പശ്ചാത്തലത്തിൽ പ്രവിശ്യാ നിയമപ്രകാരം രണ്ട് ശതമാനം പണപ്പെരുപ്പ ക്രമീകരണം വരുത്തിയാണ് ജൂലൈ മുതൽ തുക വർദ്ധിപ്പിക്കുന്നത്. 2025-ലെ ടാക്സ് റിട്ടേൺ അടിസ്ഥാനമാക്കിയായിരിക്കും ജൂലൈ 2026 മുതൽ ജൂൺ 2027 വരെയുള്ള അടുത്ത സൈക്കിളിലെ പേയ്‌മെന്റുകൾ കണക്കാക്കുക.

മുൻപ് വർഷം മൊത്തം 360 ഡോളറിൽ താഴെ മാത്രം അർഹതയുള്ളവർക്കായിരുന്നു ജൂലൈയിൽ ഒന്നിച്ച് തുക നൽകിയിരുന്നത് എങ്കിൽ, ഇനി മുതൽ ഈ പരിധി 500 ഡോളറായി ഉയർത്തിയിട്ടുണ്ട്. അതുകൊണ്ട് തന്നെ വാർഷിക ആനുകൂല്യം 500 ഡോളറോ അതിൽ താഴെയോ ഉള്ളവർക്ക് ജൂലൈ മാസത്തിൽ തന്നെ മുഴുവൻ തുകയും ഒന്നിച്ച് ലഭിക്കും. മറ്റുള്ളവർക്ക് ഇത് മാസത്തവണകളായി തന്നെ അക്കൗണ്ടിൽ എത്തും. നിങ്ങളുടെ ബാങ്ക് അക്കൗണ്ടിൽ ഈ തുക “Canada Pro Deposit” എന്ന പേരിലായിരിക്കും കാണിക്കുക.

പുതിയ മാറ്റങ്ങൾ പ്രകാരം വ്യക്തിഗത സെയിൽസ് ടാക്സ് പരമാവധി 371 ഡോളറിൽ നിന്നും 378 ഡോളറായി ഉയരും. 65 വയസ്സിന് താഴെയുള്ളവർക്കുള്ള ഹൗസിംഗ് ക്രെഡിറ്റ് 1,283 ഡോളറിൽ നിന്നും 1,307 ഡോളറായും, സീനിയേഴ്സിനുള്ളത് 1,461 ഡോളറിൽ നിന്നും 1,488 ഡോളറായും വർദ്ധിക്കുന്നതാണ്. ഇതനുസരിച്ച് സതേൺ ഒന്റാറിയോയിൽ താമസിക്കുന്ന രണ്ട് കുട്ടികളുള്ള ഒരു സാധാരണ കുടുംബത്തിന് പുതിയ നിരക്ക് പ്രകാരം വർഷത്തിൽ 2,819 ഡോളർ വരെ ലഭിക്കാൻ അർഹതയുണ്ടാകും. തണുപ്പുകാലത്തെ ഉയർന്ന ഊർജ്ജച്ചെലവ് കണക്കിലെടുത്ത് വടക്കൻ മേഖലകളിൽ താമസിക്കുന്ന കുടുംബങ്ങൾക്ക് വർഷത്തിൽ 290 ഡോളർ വരെ അധികമായി ലഭിക്കും. ഇത് ഉൾപ്പെടെ രണ്ട് കുട്ടികളുള്ള ഒരു നോർത്തേൺ കുടുംബത്തിന് വർഷം 3,109 ഡോളർ വരെ ലഭിക്കുന്നതാണ്.

നിങ്ങൾ 2025-ലെ ടാക്സ് റിട്ടേൺ കൃത്യമായി ഫയൽ ചെയ്യുകയും അതിനൊപ്പം ഒന്റാറിയോ ബെനഫിറ്റ് ഫോം പൂരിപ്പിച്ചു നൽകുകയും ചെയ്തിട്ടുണ്ടെങ്കിൽ തുക തനിയെ അക്കൗണ്ടിലെത്തും. വരുമാനം പൂജ്യമാണെങ്കിൽ പോലും ടാക്സ് ഫയൽ ചെയ്തവർക്ക് മാത്രമേ ഈ തുക ലഭിക്കൂ. വാടകക്കരാർ വിവരങ്ങൾ, പ്രോപ്പർട്ടി ടാക്സ് റസീപ്റ്റുകൾ എന്നിവ കൃത്യമായി സമർപ്പിക്കാൻ പ്രത്യേകം ശ്രദ്ധിക്കുക. കൂടുതൽ വിവരങ്ങൾക്കും നിങ്ങളുടെ തുക പരിശോധിക്കുന്നതിനും സി.ആർ.എ മൈ അക്കൗണ്ട് ലോഗിൻ ചെയ്യാവുന്നതാണ്.

New Ontario Trillium Benefit Payment Coming This Week

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt