ഒട്ടാവ: കാനഡയിൽ താൽക്കാലിക താമസാനുമതിയുള്ള വിദേശികൾക്ക് ആശ്വാസകരമായ മാറ്റങ്ങളുമായി ഇമിഗ്രേഷൻ വകുപ്പിന്റെ പുതിയ ഉത്തരവ്. ജോലിയിലോ പഠനത്തിലോ ഏർപ്പെട്ടിരിക്കുന്നതിനിടെ വിസ കാലാവധി അവസാനിക്കുകയോ നിയമപരമായ സ്റ്റാറ്റസ് നഷ്ടമാവുകയോ ചെയ്തവർക്ക്, രാജ്യം വിടാതെ തന്നെ ‘വിസിറ്റർ’ സ്റ്റാറ്റസിലേക്ക് മാറാൻ ഇനി അനുവാദം ലഭിക്കും. 2026 മെയ് ഒന്നിന് ഇമിഗ്രേഷൻ ഡിപ്പാർട്ട്മെന്റ് പുറത്തിറക്കിയ പുതുക്കിയ മാർഗ്ഗനിർദ്ദേശങ്ങളിലാണ് ഈ നിർണ്ണായക മാറ്റമുള്ളത്.
മുൻപ് നിലനിന്നിരുന്ന നിയമപ്രകാരം, സ്റ്റാറ്റസ് നഷ്ടപ്പെടുന്ന തൊഴിലാളികൾക്കും വിദ്യാർത്ഥികൾക്കും അതേ വിഭാഗത്തിൽ (Worker or Student) മാത്രമേ സ്റ്റാറ്റസ് പുനഃസ്ഥാപിക്കാൻ (Restoration of Status) അപേക്ഷിക്കാൻ കഴിയുമായിരുന്നുള്ളൂ. വിസിറ്റർ വിസയിലേക്ക് മാറണമെങ്കിൽ ഇവർ കാനഡയ്ക്ക് പുറത്തുപോയി വീണ്ടും പ്രവേശിക്കേണ്ടി വരുമായിരുന്നു. പുതിയ ഭേദഗതിയോടെ ഈ ബുദ്ധിമുട്ട് ഒഴിവാകുകയാണ്. പുതിയ വർക്ക് പെർമിറ്റ് ലഭിക്കാൻ കാലതാമസമെടുക്കുന്നവർക്കും പഠനം പൂർത്തിയാക്കി മറ്റ് സാധ്യതകൾ തേടുന്നവർക്കും നിയമപരമായി കാനഡയിൽ തുടരാൻ ഇത് വഴിയൊരുക്കും.
സ്റ്റാറ്റസ് നഷ്ടപ്പെട്ട തീയതി മുതൽ 90 ദിവസത്തിനുള്ളിൽ പുനഃസ്ഥാപിക്കാനുള്ള അപേക്ഷ സമർപ്പിക്കണമെന്നാണ് പ്രധാന നിബന്ധന. അപേക്ഷയിൽ തീരുമാനം വരുന്നത് വരെ അപേക്ഷകൻ കാനഡയിൽ തന്നെ തുടരേണ്ടതുണ്ട്. എന്നാൽ, സ്റ്റാറ്റസ് പുനഃസ്ഥാപിക്കാനുള്ള അപേക്ഷ നൽകി എന്നതുകൊണ്ട് മാത്രം ജോലി ചെയ്യാനോ പഠിക്കാനോ ഉള്ള അനുമതി ലഭിക്കില്ല. വർക്ക്/സ്റ്റഡി പെർമിറ്റുകളുടെ കാലാവധി അവസാനിക്കുന്ന നിമിഷം തന്നെ ജോലിയിൽ നിന്നോ പഠനത്തിൽ നിന്നോ വിട്ടുനിൽക്കണമെന്നും ഇമിഗ്രേഷൻ വിഭാഗം ഓർമ്മിപ്പിക്കുന്നു.
സ്റ്റാറ്റസ് പുനഃസ്ഥാപിച്ചു നൽകുന്നത് സംബന്ധിച്ച അന്തിമ തീരുമാനം ഇമിഗ്രേഷൻ ഓഫീസറുടെ വിവേചനാധികാരത്തിന് വിധേയമായിരിക്കും. ഓരോ അപേക്ഷയും വ്യക്തിഗതമായി പരിശോധിച്ചാകും അനുമതി നൽകുക. അപേക്ഷ പ്രോസസിംഗിൽ ഇരിക്കുന്ന സമയത്ത് വ്യക്തിക്ക് കാനഡയിൽ നിയമപരമായ സ്റ്റാറ്റസ് ഉണ്ടായിരിക്കില്ല. ഇത് ഭാവിയിൽ സ്ഥിരതാമസത്തിനോ (PR) മറ്റ് വിസകൾക്കോ അപേക്ഷിക്കുമ്പോൾ ബാധിച്ചേക്കാം എന്നതിനാൽ, സ്റ്റാറ്റസ് നഷ്ടപ്പെടുന്ന സാഹചര്യം പരമാവധി ഒഴിവാക്കാനാണ് ഉദ്യോഗാർത്ഥികളോട് അധികൃതർ നിർദ്ദേശിക്കുന്നത്.
വിസിറ്റർ സ്റ്റാറ്റസിലേക്ക് മാറാൻ ആഗ്രഹിക്കുന്നവർ വിസിറ്റർ റെക്കോർഡിനായി പ്രത്യേക അപേക്ഷയും നിശ്ചിത ഫീസും നൽകണം. അതേസമയം, പഴയ സ്റ്റാറ്റസിലേക്ക് തന്നെ തിരിച്ചുപോകാനോ മറ്റൊരു പെർമിറ്റിലേക്ക് മാറാനോ ആഗ്രഹിക്കുന്നവർക്കും നിലവിലെ സൗകര്യം തുടരും. കാനഡയിലെ കുടിയേറ്റ നിയമങ്ങൾ കർശനമാക്കുന്നതിനിടയിലും, നിയമപരമായ വഴികളിലൂടെ രാജ്യത്ത് തുടരാൻ ആഗ്രഹിക്കുന്നവർക്ക് വലിയൊരു അവസരമാണ് ഈ നിയമമാറ്റം നൽകുന്നത്.
New exemption for foreign students and workers; No need to leave the country to change status in Canada; Law in effect
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
