Canada Immigration 2027: New Visa Rules and Changes

ഒൻ്റാരിയോ: 2027-ൽ കാനഡയിലേക്ക് വരാൻ പ്ലാൻ ചെയ്യുന്നവരാണോ നിങ്ങൾ? എങ്കിൽ ചില കാര്യങ്ങൾ നിർബന്ധമായും അറിഞ്ഞിരിക്കണം. പുതിയതായി കാനഡയിലേക്ക് എത്തുന്നവരെ കാത്തിരിക്കുന്നത് ഒന്നിലധികം കടമ്പകൾ. രാജ്യത്തെ പാർപ്പിട പ്രതിസന്ധിയും ആരോഗ്യ-അടിസ്ഥാന സൗകര്യ മേഖലകളിൽ തുടരുന്ന പ്രശ്നങ്ങളും കണക്കിലെടുത്ത് ഇമിഗ്രേഷൻ നയങ്ങളിൽഭേദഗതി വരുത്തി കൊണ്ടിരിക്കുകയാണ് കാനഡ. കാനഡ ഇമിഗ്രേഷൻ, റഫ്യൂജീസ് ആൻഡ് സിറ്റിസൺഷിപ്പ് (IRCC) വകുപ്പ് പുറപ്പെടുവിച്ച പുതിയ നിർദ്ദേശങ്ങൾ 2027-ൽ കാനഡ ലക്ഷ്യമിടുന്ന വിസ അപേക്ഷകരെ നേരിട്ട് ബാധിക്കും.

അന്താരാഷ്ട്ര വിദ്യാർത്ഥികൾക്ക് അനുവദിക്കുന്ന സ്റ്റഡി പെർമിറ്റുകളുടെ എണ്ണത്തിൽ കാനഡ സർക്കാർ പ്രതിവർഷ പരിധി (Cap) നിശ്ചയിച്ചിട്ടുണ്ട്. രാജ്യത്തുള്ള താൽക്കാലിക താമസക്കാരുടെ എണ്ണം ഘട്ടമായി കുറയ്ക്കുക എന്ന ലക്ഷ്യത്തോടെയാണ് ഈ നടപടി. ഇത് മൂലം വരുംവർഷങ്ങളിൽ യൂണിവേഴ്സിറ്റി, കോളേജ് സീറ്റുകളിലും വിസ അനുമതികളിലും കടുത്ത മത്സരമായിരിക്കും നേരിടേണ്ടി വരിക.

സാമ്പത്തിക പരിധി ഉയർത്തി

രാജ്യത്തെ വർധിച്ച ജീവിതച്ചെലവുകൾ കണക്കിലെടുത്ത് വിസ അപേക്ഷകർ കാണിക്കേണ്ട സാമ്പത്തിക പരിധി പുതുക്കി. ട്യൂഷൻ ഫീസിന് പുറമെ, ഒരു വർഷത്തെ ജീവനച്ചെലവുകൾക്കായി (GIC) അപേക്ഷകർ കാണിക്കേണ്ട തുക CAD $23,448 ആയി ഉയർത്തിയിട്ടുണ്ട്. ആവശ്യത്തിന് ബാങ്ക് ബാലൻസ് തെളിവുകൾ ഇല്ലാത്ത അപേക്ഷകൾ പ്രാരംഭ ഘട്ടത്തിൽ തന്നെ നിരസിക്കപ്പെടും.

പ്രവിശ്യാ സാക്ഷ്യപത്രം (PAL) നിർബന്ധം

വിദ്യാഭ്യാസ സ്ഥാപനങ്ങളിൽ നിന്നുള്ള പ്രവേശന കത്ത് (Offer Letter) സമർപ്പിച്ചതുകൊണ്ട് മാത്രം ഇനി വിസ നടപടികൾ പൂർത്തിയാകില്ല. ബിരുദ-ഡിപ്ലോമ കോഴ്സുകൾക്ക് അതാത് പ്രവിശ്യാ ഭരണകൂടങ്ങൾ നൽകുന്ന പ്രൊവിൻഷ്യൽ അറ്റസ്റ്റേഷൻ ലെറ്റർ (PAL) കൂടി ഉൾപ്പെടുത്തിയാൽ മാത്രമേ സ്റ്റഡി പെർമിറ്റ് അപേക്ഷകൾ സ്വീകരിക്കുകയുള്ളൂ. എന്നാൽ മാസ്റ്റേഴ്സ്, പിഎച്ച്ഡി തലത്തിലുള്ള ഗവേഷണ കോഴ്സുകൾക്ക് ഇതിൽ നിർദ്ദിഷ്ട ഇളവുകളുണ്ട്.

തൊഴിൽ വിപണി ലക്ഷ്യമിട്ടുള്ള വർക്ക് പെർമിറ്റ്

പഠനശേഷമുള്ള പോസ്റ്റ് ഗ്രാജുവേഷൻ വർക്ക് പെർമിറ്റ് (PGWP) നയങ്ങൾ രാജ്യത്തെ തൊഴിൽ ക്ഷാമവുമായി ബന്ധിപ്പിച്ചിരിക്കുകയാണ്. ബിരുദ, ബിരുദാനന്തര ബിരുദങ്ങൾ പൂർത്തിയാക്കുന്നവർക്ക് മുൻഗണന ലഭിക്കുമ്പോൾ, ഡിപ്ലോമ കോഴ്സുകൾ തിരഞ്ഞെടുക്കുന്നവർ കാനഡയിൽ നിലവിൽ ആളില്ലാത്ത പ്രത്യേക വ്യവസായ-സാങ്കേതിക മേഖലകളുമായി ബന്ധപ്പെട്ട പഠനശാഖകൾ തന്നെ തിരഞ്ഞെടുക്കേണ്ടിവരും.

സ്പൗസ് വർക്ക് പെർമിറ്റുകളിൽ നിയന്ത്രണം

വിദ്യാർത്ഥികളുടെ പങ്കാളികൾക്ക് നൽകിയിരുന്ന ഓപ്പൺ വർക്ക് പെർമിറ്റ് യോഗ്യതകളിലും മാറ്റമുണ്ട്. മാസ്റ്റേഴ്സ്, ഡോക്ടറേറ്റ് (PhD) അല്ലെങ്കിൽ ചില പ്രത്യേക പ്രൊഫഷണൽ ബിരുദ കോഴ്സുകൾ പഠിക്കുന്ന വിദ്യാർത്ഥികളുടെ പങ്കാളികൾക്ക് മാത്രമായിരിക്കും ഇനിമുതൽ വർക്ക് പെർമിറ്റിന് അർഹതയുണ്ടാവുക.

Also Read: കാനഡ പൗരത്വ അപേക്ഷ നിരസിക്കപ്പെടാതിരിക്കാൻ ‘ലെറ്റർ ഓഫ് എക്സ്പ്ലനേഷൻ’: അറിയേണ്ട കാര്യങ്ങൾ ഇതാ

എക്സ്പ്രസ് എൻട്രി പി.ആർ മുൻഗണനകൾ

സ്ഥിരതാമസം (PR) നൽകുന്നതിന് കാറ്റഗറി അധിഷ്ഠിത തിരഞ്ഞെടുപ്പുകൾക്കാണ് IRCC പ്രാധാന്യം നൽകുന്നത്. ഹെൽത്ത്‌കെയർ, കൺസ്ട്രക്ഷൻ, എൻജിനീയറിങ്, STEM (സയൻസ്, ടെക്നോളജി, എൻജിനീയറിങ്, മാത്സ്) എന്നീ മേഖലകളിൽ മുൻപരിചയമുള്ള അപേക്ഷകർക്കാണ് ഭാവിയിൽ പി.ആർ സാധ്യത കൂടുതൽ.
അവസാന നിമിഷത്തെ വിസ നിരസിക്കലുകൾ ഒഴിവാക്കാൻ കൃത്യ സമയത്ത് നടപടികൾ ആരംഭിക്കാനും, ഔദ്യോഗിക IRCC വെബ്‌സൈറ്റിലെ അപ്‌ഡേറ്റുകൾ പരിശോധിക്കാനും അധികൃതർ വ്യക്തമാക്കി.