ഇന്ത്യ-കാനഡ നയതന്ത്രബന്ധത്തിൽ പുതിയ വഴിത്തിരിവ്. കഴിഞ്ഞ പതിനൊന്ന് മാസമായി നിലച്ചുപോയ ഉഭയകക്ഷി ബന്ധം പുനഃസ്ഥാപിക്കുന്നതിന്റെ ഭാഗമായി ഇരു രാജ്യങ്ങളും പുതിയ ഹൈക്കമ്മീഷണർമാരെ നിയമിച്ചു. കഴിഞ്ഞ ഓഗസ്റ്റ് 28-ന് ഇന്ത്യ ദിനേഷ് പട്നായിക്കിനെ ഓട്ടാവയിലെ ഹൈക്കമ്മീഷണറായി നിയമിച്ചപ്പോൾ, കാനഡ ക്രിസ്റ്റഫർ കൂറ്ററിനെ ഇന്ത്യയിലേക്കുള്ള ഹൈക്കമ്മീഷണറായി പ്രഖ്യാപിച്ചു. ഇരുവരും അടുത്ത ആഴ്ച ചുമതലയേൽക്കുമെന്നാണ് റിപ്പോർട്ടുകൾ.ദിനേഷ് പട്നായിക് ഉടൻ തന്നെ ഓട്ടാവയിലേക്ക് യാത്ര തിരിക്കും. കനേഡിയൻ വൃത്തങ്ങളും ക്രിസ്റ്റഫർ കൂറ്ററിന്റെ വരവ് ഉടൻ ഉണ്ടാകുമെന്ന് സ്ഥിരീകരിച്ചിട്ടുണ്ട്. ഇരുവരും ഏകദേശം ഒരേ സമയത്ത് തന്നെ തങ്ങളുടെ പുതിയ സ്ഥാനങ്ങളിൽ പ്രവേശിക്കുമെന്നാണ് പ്രതീക്ഷിക്കുന്നത്.
കഴിഞ്ഞ വർഷം സെപ്റ്റംബറിൽ കാനഡ മുൻ പ്രധാനമന്ത്രി ജസ്റ്റിൻ ട്രൂഡോ, ഖലിസ്ഥാൻ വിഘടനവാദി ഹർദീപ് സിംഗ് നിജ്ജാറിന്റെ കൊലപാതകത്തിൽ ഇന്ത്യൻ സർക്കാർ ഏജൻ്റുമാർക്ക് പങ്കുണ്ടെന്ന് ആരോപിച്ചതോടെയാണ് ഇരു രാജ്യങ്ങളും തമ്മിലുള്ള ബന്ധം വഷളായത്. ഇന്ത്യ ഈ ആരോപണങ്ങൾ അസംബന്ധവും പ്രേരിതവുമാണെന്ന് പറഞ്ഞ് തള്ളിയിരുന്നു. ഇതിനെത്തുടർന്ന് ഇരു രാജ്യങ്ങളും നയതന്ത്ര ബന്ധങ്ങൾ താഴ്ത്തിക്കൊണ്ട് ഹൈക്കമ്മീഷണർമാരെ പുറത്താക്കി. കാനഡയിലെ അന്നത്തെ ഇന്ത്യൻ ഹൈക്കമ്മീഷണർ സഞ്ജയ് കുമാർ വർമ്മയ്ക്കെതിരെ കനേഡിയൻ സർക്കാർ തിരിഞ്ഞു, പിന്നാലെ ഇന്ത്യയും തങ്ങളുടെ ഉദ്യോഗസ്ഥരുടെ സുരക്ഷയിൽ ആശങ്ക പ്രകടിപ്പിക്കുകയും ഉന്നത നയതന്ത്ര ഉദ്യോഗസ്ഥരെ പിൻവലിക്കുകയും ചെയ്തിരുന്നു.
എന്നാൽ, ഈ വർഷം ജൂൺ 17-ന് കാനഡയിലെ G7 ഉച്ചകോടിക്കിടെ പ്രധാനമന്ത്രി നരേന്ദ്ര മോദിയും കാനഡയുടെ പുതിയ പ്രധാനമന്ത്രി മാർക്ക് കാർണിയും നടത്തിയ കൂടിക്കാഴ്ചയിലാണ് ബന്ധം മെച്ചപ്പെടുത്താൻ തീരുമാനമായത്. ബന്ധം പുനഃസ്ഥാപിക്കുന്നതിനായുള്ള ആദ്യപടിയായി ഹൈക്കമ്മീഷണർമാരെ തിരികെ അയക്കാൻ ഇരുവരും ധാരണയിലെത്തിയിരുന്നു. വ്യാപാരം, ജനങ്ങൾ തമ്മിലുള്ള ബന്ധം തുടങ്ങിയ കാര്യങ്ങളിൽ ഉന്നതതല ചർച്ചകൾ പുനരാരംഭിക്കാനും ധാരണയായിട്ടുണ്ട്.
സ്പെയിനിലെ ഇന്ത്യയുടെ അംബാസഡറായി സേവനമനുഷ്ഠിച്ചുവരികയായിരുന്ന ദിനേഷ് പട്നായിക് 1990 ബാച്ചിലെ ഐ.എഫ്.എസ്. ഉദ്യോഗസ്ഥനാണ്. മൂന്ന് പതിറ്റാണ്ടിലേറെ നീണ്ട സേവനപരിചയമുള്ള അദ്ദേഹം, ജനീവ, ധാക്ക, കംബോഡിയ, മൊറോക്കോ, സ്പെയിൻ എന്നിവിടങ്ങളിൽ സുപ്രധാന സ്ഥാനങ്ങൾ വഹിച്ചിട്ടുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Thaw in India-Canada ties: New envoys likely to take charge next week
