തിരുവനന്തപുരം: മുല്ലപ്പെരിയാർ അണക്കെട്ടിലെ ജലനിരപ്പ് വർധിപ്പിക്കുമെന്ന തമിഴ്നാട് സർക്കാരിന്റെ ബജറ്റ് പ്രഖ്യാപനത്തിനെതിരെ കടുത്ത പ്രതിഷേധവുമായി കേരളം രംഗത്തെത്തി. തമിഴ്നാടിന്റെ ഈ പ്രഖ്യാപനത്തിൽ സംസ്ഥാന സർക്കാർ ഔദ്യോഗികമായി പ്രതിഷേധം അറിയിക്കും. അണക്കെട്ടിലെ ജലനിരപ്പ് ഒരു കാരണവശാലും ഉയർത്താൻ അനുവദിക്കില്ലെന്ന് മന്ത്രി മോൻസ് ജോസഫ് വ്യക്തമാക്കി. ജനങ്ങളുടെ ജീവനും സ്വത്തിനും ഭീഷണിയാകുന്ന ഡാമിന്റെ സുരക്ഷയാണ് കേരളത്തെ സംബന്ധിച്ച് ഏറ്റവും പ്രധാനപ്പെട്ട വിഷയമെന്ന് അദ്ദേഹം കൂട്ടിച്ചേർത്തു. ജലനിരപ്പ് 142 അടിയായി നിലനിർത്തണമെന്ന നിലപാടിൽ മാറ്റമില്ലെന്നും, വിഷയം നിയമപരമായി നേരിടുന്നതുൾപ്പെടെയുള്ള നടപടികൾ സർക്കാരിന്റെ സജീവ പരിഗണനയിലാണെന്നും മന്ത്രി വ്യക്തമാക്കി.
അന്തർസംസ്ഥാന നദീജല പങ്കുവെക്കലിൽ സംസ്ഥാനത്തിന്റെ താല്പര്യങ്ങൾ പൂർണ്ണമായും സംരക്ഷിക്കുമെന്ന നിലപാടിലാണ് തമിഴ്നാട് സർക്കാർ. ദീർഘകാല ജലസുരക്ഷ ഉറപ്പാക്കുന്നതിനും കർഷകരുടെ ക്ഷേമത്തിനുമായി നിലവിലുള്ള കരാറുകൾ, ട്രൈബ്യൂണൽ വിധികൾ, നീതിന്യായ നിർദേശങ്ങൾ എന്നിവയ്ക്ക് അനുസൃതമായി മുല്ലപ്പെരിയാറിലെ ജലനിരപ്പ് ഉയർത്താൻ ശ്രമിക്കുമെന്നാണ് തമിഴ്നാട് ബജറ്റ് പ്രസംഗത്തിൽ വ്യക്തമാക്കിയിട്ടുള്ളത്. ഇതിനുപുറമേ, ആനമലയാർ, നല്ലൂർ അണക്കെട്ട് പദ്ധതികളുടെ നടപ്പാക്കൽ, ഗോദാവരി-കാവേരി നദീബന്ധന പദ്ധതിയുടെ പൂർത്തീകരണം, മേഘദാതു പദ്ധതിക്കെതിരെയുള്ള നിലപാടുകൾ എന്നിവ വഴി തമിഴ്നാടിന്റെ ജലാവകാശങ്ങൾ സംരക്ഷിക്കുമെന്നും ബജറ്റിൽ പരാമർശമുണ്ട്.
മുല്ലപ്പെരിയാർ തർക്കം വീണ്ടും പുകയുന്നതിനിടെ, അണക്കെട്ടിന്റെ സുരക്ഷ വിലയിരുത്തുന്ന വിദഗ്ധ സമിതിയിലേക്ക് കേരളം പുതിയ പ്രതിനിധിയെ നിയമിച്ചു. ഒഡീഷ ജലവിഭവവകുപ്പ് മുൻ സ്പെഷ്യൽ സെക്രട്ടറി അശുതോഷ് ഡാഷിനെയാണ് കേരളത്തിന്റെ പ്രതിനിധിയായി ചുമതലപ്പെടുത്തിയത്. തമിഴ്നാടിന്റെ ഏകപക്ഷീയമായ പ്രഖ്യാപനങ്ങൾക്കെതിരെ നിയമപോരാട്ടത്തിനും നയതന്ത്ര ഇടപെടലുകൾക്കും ഒരുങ്ങുകയാണ് കേരളം. ജനങ്ങളുടെ സുരക്ഷ മുൻനിർത്തിയുള്ള ശക്തമായ നിലപാടുകളുമായി മുന്നോട്ടുപോകാനാണ് സംസ്ഥാന സർക്കാരിന്റെ തീരുമാനം.
Mullaperiyar Water Level Row: Kerala Opposes TN Move
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
