ബ്രിഡ്ജ്-ബോണാവെഞ്ചർ മേഖലയിൽ 376 പുതിയ താങ്ങാനാവുന്ന ഭവനങ്ങൾ നിർമ്മിക്കാൻ മോൺട്രിയൽ നഗരം ഒരുങ്ങുന്നു. അടുത്ത വർഷം നിർമ്മാണം ആരംഭിക്കുന്ന ഈ പദ്ധതി, ഈ മേഖലയിലെ ആദ്യത്തെ ഭവന പദ്ധതിയായിരിക്കും. ‘ട്രയാംഗിൾ നോർഡ് പോയിന്റ്-സെന്റ്-ചാൾസ് പ്രോജക്റ്റ്’ എന്ന് പേരിട്ടിരിക്കുന്ന ഈ വാടക റെസിഡൻഷ്യൽ കോംപ്ലക്സ് രണ്ട് ഘട്ടങ്ങളിലായാണ് പൂർത്തിയാക്കുക. ഇതിന്റെ ആദ്യ ഘട്ടത്തിൽ ബ്രിഡ്ജ്, വെല്ലിംഗ്ടൺ, സെന്റ് പാട്രിക് സ്ട്രീറ്റുകളുടെ കവലയിൽ 20 നിലകളുള്ള ഒരു ടവർ നിർമ്മിക്കും. ഇത് ഏകദേശം 376 കുടുംബങ്ങൾക്ക് താമസിക്കാനുള്ള ഇടം നൽകും.
“ബ്രിഡ്ജ്-ബോണാവെഞ്ചർ മേഖലയുടെ വികസനം വേഗത്തിലാക്കുക എന്നത് തൻ്റെ അവസാന 300 ദിവസത്തെ പ്രധാന ലക്ഷ്യങ്ങളിലൊന്നാണ്,” മോൺട്രിയൽ മേയർ വലേരി പ്ലാന്റെ പറഞ്ഞു. “ഈ പദ്ധതി ഗതാഗത സൗകര്യങ്ങളുള്ള, താങ്ങാനാവുന്ന, പരിസ്ഥിതി സൗഹൃദമായ ഒരു പുതിയ പ്രദേശം എന്ന തങ്ങളുടെ കാഴ്ചപ്പാടിനെ ശരിക്കും പ്രതിഫലിപ്പിക്കുന്നുവെന്ന് അവർ കൂട്ടിച്ചേർത്തു.
സിറ്റി ഓഫ് മോൺട്രിയൽ നൽകുന്ന വിവരങ്ങൾ അനുസരിച്ച്, സ്റ്റുഡിയോ അപ്പാർട്ട്മെൻ്റിന് ഏകദേശം 817-ഉം, ഒരു കിടപ്പുമുറിയുള്ള അപ്പാർട്ട്മെൻ്റിന് 944-ഉം, മൂന്ന് കിടപ്പുമുറിയുള്ള അപ്പാർട്ട്മെൻ്റിന് 1,250-ഉം ഡോളറായിരിക്കും സാധാരണ വാടക നിരക്ക്. ഇതിനെക്കാൾ ഉയർന്ന വാടക നൽകുന്നവർക്കായി സ്റ്റുഡിയോ അപ്പാർട്ട്മെൻ്റിന് ഏകദേശം $1,226-ഉം, ഒരു കിടപ്പുമുറിയുള്ള അപ്പാർട്ട്മെൻ്റിന് 1,416-ഉം, മൂന്ന് കിടപ്പുമുറിയുള്ള അപ്പാർട്ട്മെൻ്റിന് 1,875-ഉം ഡോളറായിരിക്കും വാടക.
താഴത്തെ നിലകളിൽ കച്ചവട സ്ഥാപനങ്ങൾക്കും മറ്റ് പൊതു ഇടങ്ങൾക്കും സൗകര്യം ഉണ്ടായിരിക്കും. ഏകദേശം $130 മില്യൺ ചിലവ് വരുന്ന ഈ നിർമ്മാണ പ്രവർത്തനങ്ങൾ 2026 വേനൽക്കാലത്ത് ആരംഭിക്കുമെന്നും 2028-ഓടെ പൂർത്തിയാകുമെന്നും അധികൃതർ അറിയിച്ചു.
Montreal announces new housing plan for low-rent homes
