കാലിഫോർണിയ: നാലിലൊന്ന് ജീവനക്കാരെ പിരിച്ചുവിടാൻ തിങ്കളാഴ്ച തീരുമാനിച്ചതിന് തൊട്ടുപിന്നാലെ, സാമ്പത്തിക വർഷത്തിലെ രണ്ടാം പാദത്തിൽ കോടികളുടെ അറ്റാദായവുമായി ആഗോള ടെക് ഭീമനായ മൈക്രോസോഫ്റ്റ്. സെപ്റ്റംബറിൽ അവസാനിച്ച മൂന്ന് മാസത്തിനിടെ കമ്പനിയുടെ ലാഭം 3,660 കോടി ഡോളറായി (ഏകദേശം 3.06 ലക്ഷം കോടി രൂപ) ഉയർന്നതായി അധികൃതർ വ്യക്തമാക്കുന്നു. മുൻ വർഷത്തെ അപേക്ഷിച്ച് വരുമാനത്തിൽ 19 ശതമാനത്തിന്റെ വർധനവാണ് കമ്പനി രേഖപ്പെടുത്തിയത്.
ആർട്ടിഫിഷ്യൽ ഇന്റലിജൻസ് (എ.ഐ) മേഖലയിലേക്ക് കോടിക്കണക്കിന് ഡോളറിന്റെ നിക്ഷേപം നടത്തുന്നതിന്റെ ഭാഗമായി ചിലവ് ചുരുക്കാനാണ് മൈക്രോസോഫ്റ്റ് തങ്ങളുടെ 60,000-ഓളം ജീവനക്കാർക്ക് ‘ബൈഔട്ട്’ പാക്കേജ് പ്രഖ്യാപിച്ചത്. മാറ്റങ്ങളോട് വേഗത്തിൽ പ്രതികരിക്കാൻ കമ്പനിയെ പ്രാപ്തമാക്കുന്നതിനായി കാനഡ, ഇന്ത്യ, ബ്രിട്ടൻ, യു.എസ് തുടങ്ങിയ രാജ്യങ്ങളിലെ ജീവനക്കാർക്കാണ് സാമ്പത്തിക ആനുകൂല്യങ്ങളോടെയുള്ള വോളന്ററി റിട്ടയർമെന്റ് ഓഫർ നൽകിയിരിക്കുന്നത്. ആഗോളതലത്തിൽ 2.2 ലക്ഷത്തിലേറെ ജീവനക്കാരാണ് നിലവിൽ മൈക്രോസോഫ്റ്റിലുള്ളത്.
കമ്പനിയുടെ ചരിത്രത്തിലെ തന്നെ ഏറ്റവും ഉയർന്ന വരുമാന വളർച്ചയ്ക്ക് പിന്നിൽ മൈക്രോസോഫ്റ്റ് ക്ലൗഡ് ബിസിനസിലെ കുതിപ്പാണ്. ക്ലൗഡ് സർവീസുകളിൽ നിന്നുള്ള വരുമാനത്തിൽ മാത്രം 30 ശതമാനത്തിന്റെ വർധനവുണ്ടായിട്ടുണ്ട്. വൻ ലാഭക്കണക്കുകൾ പുറത്തുവന്നതോടെ ന്യൂയോർക്ക് സ്റ്റോക്ക് എക്സ്ചേഞ്ചിൽ കമ്പനിയുടെ ഓഹരി മൂല്യം 2.9 ശതമാനം ഉയർന്നു. എ.ഐ സാങ്കേതികവിദ്യ എല്ലാ മേഖലകളിലും പ്രായോഗികമായ മാറ്റങ്ങൾ ഉണ്ടാക്കുന്നുണ്ടെന്ന് മൈക്രോസോഫ്റ്റ് ചീഫ് എക്സിക്യൂട്ടീവ് സത്യ നാദെല്ല പ്രതികരിച്ചു.
എ.ഐ മേഖലയിലെ ഭീമമായ നിക്ഷേപങ്ങൾ ഭാവിയിൽ എത്രത്തോളം ലാഭകരമാകുമെന്ന സംശയം നിക്ഷേപകർക്കിടയിൽ നിലനിൽക്കുന്ന സമയത്താണ് മൈക്രോസോഫ്റ്റിന്റെ ഈ നേട്ടം. ആമസോൺ, മെറ്റാ, ആൽഫബെറ്റ് (ഗൂഗിൾ) തുടങ്ങിയ മുൻനിര ടെക് കമ്പനികളെല്ലാം തന്നെ എ.ഐ ചിപ്പുകൾക്കും ഡാറ്റാ സെന്ററുകൾക്കുമായി ഈ വർഷം മാത്രം 70,000 കോടിയിലധികം ഡോളറാണ് മാറ്റിവെക്കുന്നത്. എന്നാൽ എ.ഐ നിക്ഷേപങ്ങൾ ഉയർത്തുന്ന സാമ്പത്തിക അനിശ്ചിതത്വങ്ങൾ തങ്ങളുടെ ഭാവി ധനസ്ഥിതിയെ ബാധിച്ചേക്കാമെന്ന മുന്നറിയിപ്പും മൈക്രോസോഫ്റ്റ് നൽകുന്നുണ്ട്.
മൈക്രോസോഫ്റ്റ് പ്രതീക്ഷിച്ചതിലും മികച്ച പ്രകടനം കാഴ്ചവെച്ചപ്പോൾ, മറ്റൊരു ടെക് ഭീമനായ ഗൂഗിളിന്റെ മാതൃകമ്പനി ആൽഫബെറ്റിന്റെ സാമ്പത്തിക ഫലം നിക്ഷേപകരെ നിരാശരാക്കി. അറ്റാദായത്തിൽ 25 ശതമാനം ഇടിവ് രേഖപ്പെടുത്തിയ ആൽഫബെറ്റിന്റെ ഓഹരി മൂല്യത്തിൽ 9.75 ശതമാനത്തിന്റെ വലിയ തിരിച്ചടിയാണ് ഉണ്ടായത്. വരും പാദങ്ങളിലും എ.ഐ മേഖലയിൽ വലിയ തുക നിക്ഷേപിക്കുന്നത് തുടരുമെന്ന് ആൽഫബെറ്റും വ്യക്തമാക്കിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
