ഇസ്രായേലിൽ നെതന്യാഹു യുഗത്തിന് അന്ത്യമാകുമോ? ഗാഡി ഐസൻകോട്ടിന് പിന്തുണയേറുന്നു, പ്രഖ്യാപനം തിങ്കളാഴ്ചയെന്ന് പ്രസിഡന്‍റ്

ടെൽ അവീവ്: ഇസ്രായേലിൽ നീണ്ട കാലത്തെ ബെഞ്ചമിൻ നെതന്യാഹു ഭരണത്തിന് അന്ത്യമാകുന്നു. പ്രതിപക്ഷ സഖ്യനേതാവും യാഷർ പാർട്ടി മേധാവിയുമായ ഗാഡി ഐസൻകോട്ട് പുതിയ പ്രധാനമന്ത്രിയാകുമെന്ന് ഏകദേശം ഉറപ്പായി. പാർലമെന്റിലെ 67 അംഗങ്ങളുടെ പിന്തുണ ഉന്നയിച്ചാണ് ഐസൻകോട്ട് സർക്കാരുണ്ടാക്കാൻ അവകാശവാദം ഉന്നയിച്ചിരിക്കുന്നത്. സർക്കാരുണ്ടാക്കാൻ ആരെയാണ് ക്ഷണിക്കുക എന്നതിൽ പ്രസിഡന്റ് ഐസക് ഹെർസോഗ് ഞായറാഴ്ചയോ തിങ്കളാഴ്ചയോ അന്തിമ പ്രഖ്യാപനം നടത്തും.

ഇസ്രായേൽ പാർലമെന്റായ നെസ്സെറ്റിലേക്ക് നടന്ന തെരഞ്ഞെടുപ്പിൽ കേവലഭൂരിപക്ഷമായ 61 സീറ്റുകൾ ആർക്കും നേടാനായിരുന്നില്ല. തുടർന്ന് പ്രതിപക്ഷത്തെ പ്രമുഖ പാർട്ടികളായ യാഷർ, ടുഗെദർ, ദ ഡെമോക്രാറ്റ്‌സ്, യിസ്രായേൽ ബെയ്‌റ്റീനു എന്നിവ അടങ്ങുന്ന 48 അംഗ പ്രതിപക്ഷ സഖ്യത്തിനൊപ്പം അറബ് പാർട്ടികളായ ജോയിന്റ് ലിസ്റ്റ് (11 സീറ്റ്), റാം പാർട്ടി (8 സീറ്റ്) എന്നിവർ പിന്തുണ നൽകിയതോടെയാണ് ഐസൻകോട്ടിന്റെ ബലം 67 ആയി മാറിയത്. മറുവശത്ത് ഭൂരിപക്ഷം പ്രതീക്ഷിച്ച നെതന്യാഹുവിന്റെ സഖ്യത്തിന് 46 പേരുടെ പിന്തുണ മാത്രമാണ് ലഭിച്ചത്. സഖ്യകക്ഷിയായ യുണൈറ്റഡ് തോറ ജൂതമതം പാർട്ടി ഒപ്പം നിൽക്കാതിരുന്നതും തീവ്ര വലതുപക്ഷ പാർട്ടികളുടെ നിലപാടുകളുമാണ് നെതന്യാഹുവിന് തിരിച്ചടിയായത്.

എന്നാൽ 67 പേരുടെ പിന്തുണയുണ്ടെങ്കിലും സഖ്യസർക്കാർ രൂപീകരണം ഐസൻകോട്ടിന് അത്ര എളുപ്പമാകില്ല. ഭരണത്തിന്റെ ഭാഗമാകാതെ പുറത്തുനിന്ന് പിന്തുണയ്ക്കാനാണ് അറബ് പാർട്ടികളുടെ തീരുമാനം. അതേസമയം, അറബ് പാർട്ടികളുടെ പിന്തുണ തേടുന്ന സഖ്യവുമായി സഹകരിക്കില്ലെന്ന നിലപാടിലാണ് വലതുപക്ഷ പാർട്ടിയായ യിസ്രായേൽ ബെയ്‌റ്റീനുവിന്റെ നേതാവ് അവിഗ്‌ഡോർ ലിബർമാൻ. കൂടാതെ, യുണൈറ്റഡ് തോറ ജൂതമതം പാർട്ടി ഉന്നയിക്കുന്ന നിർബന്ധിത സൈനിക സേവന ഇളവുകൾ സംബന്ധിച്ച ആവശ്യങ്ങളിൽ പ്രതിപക്ഷ സഖ്യത്തിൽ ഇപ്പോഴും ഭിന്നത നിലനിൽക്കുന്നുണ്ട്.

നെതന്യാഹുവിന്റെ ലിക്കുഡ് പാർട്ടി അറബ് പാർട്ടികളുടെ പിന്തുണയോടെയുള്ള പ്രതിപക്ഷ നീക്കത്തിനെതിരെ നിയമപരമായും രാഷ്ട്രീയമായും ശക്തമായ പ്രചാരണം ആരംഭിച്ചിട്ടുണ്ട്. ഇരുകൂട്ടരുമായും ചർച്ച നടത്തുന്ന പ്രസിഡന്റ് ഹെർസോഗ്, നെതന്യാഹുവും ഐസൻകോട്ടും ചേർന്നുള്ള ഐക്യസർക്കാരിനുള്ള സാധ്യതകളും ആരാഞ്ഞിരുന്നെങ്കിലും ഐസൻകോട്ട് അത് പൂർണ്ണമായും തള്ളിക്കളഞ്ഞു.

Also Read: കാലാവസ്ഥ മാറുന്നു, കാനഡയിൽ നവംബറിലും വിട്ടുമാറാതെ കൊതുകുശല്യം; പിന്നിൽ എൽ നിനോ പ്രതിഭാസം?

നിയമപ്രകാരം പ്രസിഡന്റ് സർക്കാരുണ്ടാക്കാൻ ക്ഷണിക്കുന്ന നേതാവിന് 28 ദിവസത്തിനകം ഭൂരിപക്ഷം തെളിയിക്കേണ്ടതുണ്ട്. ആവശ്യമെങ്കിൽ 14 ദിവസം കൂടി സമയം നീട്ടി നൽകാം. ഭൂരിപക്ഷം തെളിയിക്കാൻ സാധിച്ചില്ലെങ്കിൽ ഇസ്രായേൽ വീണ്ടുമൊരു പൊതുതെരഞ്ഞെടുപ്പിലേക്ക് നീങ്ങും. വരും ദിവസങ്ങളിലെ രാഷ്ട്രീയ നീക്കങ്ങൾ ഇസ്രായേലിന്റെ ഭാവി ഭരണത്തെ നിർണ്ണയിക്കുന്നതിൽ നിർണ്ണായകമാകും.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z