സ്ട്രോസ്ബർഗ്: ചെറിയ രാജ്യങ്ങളുടെ പരമാധികാരത്തിന്മേൽ കടന്നുകയറുന്ന വൻശക്തികളുടെ ഭീഷണികളെ ചെറുക്കാൻ കാനഡയും യൂറോപ്യൻ യൂണിയനും തമ്മിൽ ആഴത്തിലുള്ള പങ്കാളിത്തം വേണമെന്ന് ആവശ്യപ്പെട്ട് പ്രധാനമന്ത്രി മാർക്ക് കാർണി. വ്യാഴാഴ്ച ഫ്രാൻസിലെ സ്ട്രാസ്ബർഗിൽ നടന്ന യൂറോപ്യൻ പാർലമെന്റിനെ അഭിസംബോധന ചെയ്താണ് അദ്ദേഹം ‘ഭാവി സഖ്യത്തിന്’ ആഹ്വാനം ചെയ്തത്. യു.എസുമായുള്ള വ്യാപാര തർക്കങ്ങൾ നിലനിൽക്കുന്ന പശ്ചാത്തലത്തിലാണ് ജനാധിപത്യ മൂല്യങ്ങളും സാമ്പത്തിക സുരക്ഷിതത്വവും സംരക്ഷിക്കാൻ യൂറോപ്പുമായി കൂടുതൽ അടുക്കാൻ കാനഡ തീരുമാനിച്ചത്.
അമേരിക്കൻ പ്രസിഡന്റ് ഡൊണാൾഡ് ട്രംപിൽ നിന്നുള്ള സാമ്പത്തിക സമ്മർദ്ദങ്ങളും താരിഫ് ഭീഷണികളുമാണ് ഈ പുതിയ നീക്കത്തിന് പ്രധാന കാരണം. കാനഡയുമായി വ്യാപാര കരാറിൽ ഏർപ്പെടുകയാണെങ്കിൽ യൂറോപ്യൻ യൂണിയന് മേൽ കടുത്ത താരിഫുകൾ ചുമത്തുമെന്ന് ട്രംപ് മുന്നറിയിപ്പ് നൽകിയിരുന്നു. എന്നാൽ ഇത്തരം ഭീഷണികൾക്ക് വഴങ്ങില്ലെന്നും തങ്ങളുടെ പരമാധികാരവും വിപണി സ്വാതന്ത്ര്യവും സംരക്ഷിക്കാൻ പ്രതിരോധശേഷിയുള്ള സഖ്യങ്ങൾ ആവശ്യമാണെന്നും കാർണി വ്യക്തമാക്കി.
യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്ൻ കാനഡയ്ക്ക് യൂറോപ്യൻ യൂണിയനിൽ ‘അസോസിയേറ്റ് അംഗത്വം’ വാഗ്ദാനം ചെയ്തു. പൂർണ്ണ അംഗത്വം ലക്ഷ്യമല്ലെങ്കിലും ശാസ്ത്ര സാങ്കേതിക ഗവേഷണ പദ്ധതിയായ ‘ഹൊറൈസൺ’, വിദ്യാഭ്യാസ പദ്ധതിയായ ‘ഇറാസ്മസ്+’ എന്നിവയിൽ പങ്കാളികളാകാൻ കാനഡ താല്പര്യം പ്രകടിപ്പിച്ചിട്ടുണ്ട്. കൂടാതെ പ്രതിരോധം, ഊർജ്ജം, കൃത്രിമബുദ്ധി (AI), നിർണായക ധാതുക്കൾ തുടങ്ങിയ മേഖലകളിലും ഇരുവിഭാഗവും സഹകരണം ശക്തമാക്കും.
ഇതിനകം തന്നെ യൂറോപ്യൻ യൂണിയനുമായി നിരവധി സുരക്ഷാ കരാറുകളിൽ കാനഡ ഒപ്പുവെച്ചിട്ടുണ്ട്. ഇതോടെ 150 ബില്യൺ യൂറോയുടെ യൂറോപ്യൻ സുരക്ഷാ പദ്ധതിയായ ‘സേഫിൽ’ (SAFE) ചേരുന്ന ആദ്യ യൂറോപ്യൻ ഇതര രാജ്യമായി കാനഡ മാറി. പുതിയ പങ്കാളിത്ത കരാറിന്റെ അന്തിമ രൂപരേഖ കനേഡിയൻ പാർലമെന്റിൽ ചർച്ച ചെയ്ത് വോട്ടെടുപ്പിലൂടെ മാത്രമേ പാസാക്കൂ എന്ന് പ്രധാനമന്ത്രിയുടെ ഓഫീസ് അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
