വിന്നിപെഗ്: മാനിറ്റോബയിൽ പ്ലംബിംഗ് ജോലി പഠിച്ച് ലൈസൻസ് നേടാൻ ആഗ്രഹിക്കുന്ന ചെറുപ്പക്കാർക്ക് നിർബന്ധിത കോളേജ് കോഴ്സുകളിൽ പ്രവേശനം കിട്ടാൻ ഒരു വർഷത്തിലേറെ കാത്തിരിക്കേണ്ടി വരുന്നതായി പരാതി. തൊഴിലിൽ അടുത്ത ഘട്ടത്തിലേക്ക് കടക്കാനും ശമ്പള വർദ്ധനവ് ലഭിക്കാനും ഈ പഠനം പൂർത്തിയാക്കേണ്ടതുണ്ട്. നിലവിൽ 1,000-ത്തിലധികം പേർ ഈ മേഖലയിൽ രജിസ്റ്റർ ചെയ്ത് ജോലി ചെയ്യുന്നുണ്ടെങ്കിലും, പഠിക്കാൻ പ്രവിശ്യയിൽ ആകെയുള്ളത് 500-ൽ താഴെ സീറ്റുകൾ മാത്രമാണ്. ആവശ്യത്തിന് സീറ്റുകളില്ലാത്തതാണ് വിദ്യാർത്ഥികളെ വലയ്ക്കുന്ന ഈ പ്രശ്നത്തിന് പ്രധാന കാരണം.
നിയമപ്രകാരം പ്ലംബിംഗ് രംഗത്ത് പൂർണ്ണ യോഗ്യത നേടണമെങ്കിൽ നാല് ഘട്ടങ്ങളിലായി പ്രായോഗിക പരിചയത്തിനൊപ്പം എട്ട് മുതൽ പത്ത് ആഴ്ച വരെയുള്ള കോളേജ് ക്ലാസുകളും പാസാകണം. എന്നാൽ ജോലി പരിചയം പൂർത്തിയാക്കിയാലും കോളേജിൽ പ്രവേശനം കിട്ടാത്തതിനാൽ പലരും മാസങ്ങളോളം പഴയ തസ്തികയിൽ തന്നെ തുടരേണ്ടി വരുന്നു. പ്രവിശ്യയിലെ രണ്ട് പ്രധാന കോളേജുകളിലായി നിലവിൽ 475 സീറ്റുകൾ മാത്രമാണുള്ളത്. കുറച്ച് സീറ്റുകൾ പുതിയതായി കൂട്ടിയെങ്കിലും, പഠിക്കാൻ ആളുകൾ കൂടിയതോടെ ഇത് തികയാതെ വരുന്ന അവസ്ഥയാണ്.
Also Read : സാൻഡ്വിച്ചുകളിൽ ലിസ്റ്റീരിയ സാന്നിധ്യം: 28 ഉൽപ്പന്നങ്ങൾ വിപണിയിൽ നിന്ന് തിരിച്ചുവിളിച്ച് ഹെൽത്ത് കാനഡ
പഠനം വൈകുന്നതോടെ വിദ്യാർത്ഥികൾക്ക് കൃത്യസമയത്ത് മികച്ച ലൈസൻസോ (റെഡ് സീൽ) ഉയർന്ന ശമ്പളമോ ലഭിക്കുന്നില്ല. പ്രവിശ്യയിൽ പുതിയ കെട്ടിടങ്ങളും റോഡുകളും നിർമ്മിക്കുന്ന ജോലികൾ വേഗത്തിൽ നടക്കുന്നുണ്ടെങ്കിലും, ആവശ്യത്തിന് യോഗ്യതയുള്ള പ്ലംബർമാരെ കിട്ടാത്തത് കമ്പനികളെയും വലയ്ക്കുന്നുണ്ട്. കൂടുതൽ കോളേജ് സീറ്റുകൾ അനുവദിച്ചും അപേക്ഷാ രീതി കൂടുതൽ ലളിതമാക്കിയും ഈ പ്രശ്നം അടിയന്തരമായി പരിഹരിക്കണമെന്നാണ് വിദ്യാർത്ഥികളും കരാറുകാരും സർക്കാരിനോട് ആവശ്യപ്പെടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
