ഓട്ടവ: നിർമ്മിത ബുദ്ധി (AI) തൊഴിൽ മേഖലയിൽ വൻ മാറ്റങ്ങൾ വരുത്തുന്ന പശ്ചാത്തലത്തിൽ, കോളേജ് ബിരുദങ്ങൾക്കായി ലക്ഷക്കണക്കിന് രൂപയും വർഷങ്ങളും ചെലവഴിക്കുന്നത് ലാഭകരമാണോ എന്ന സംശയത്തിലാണ് കാനഡയിലെ വിദ്യാർത്ഥികൾ. ഈ അധ്യയന വർഷത്തിൽ രാജ്യത്തെ വിവിധ സർവകലാശാലകളിലേക്ക് ഇരുപത് ലക്ഷത്തോളം വിദ്യാർത്ഥികൾ എത്തുമ്പോഴാണ് ഉന്നതവിദ്യാഭ്യാസത്തിന്റെ യഥാർത്ഥ മൂല്യത്തെക്കുറിച്ചുള്ള ആശങ്കകൾ ഉയരുന്നത്. പഠിച്ചിറങ്ങിയാലും സുരക്ഷിതമായ ജോലി ലഭിക്കുമെന്ന ഉറപ്പില്ലാത്തതിനാൽ പഠനത്തോടൊപ്പം ബിസിനസ്സും മറ്റ് പ്രായോഗിക തൊഴിൽ പരിശീലനങ്ങളും കണ്ടെത്താനുള്ള തിരക്കിലാണ് ഒരു വിഭാഗം വിദ്യാർത്ഥികൾ.
പഠിക്കുന്ന വിഷയം ഏതായാലും, വെറും സർട്ടിഫിക്കറ്റ് കൊണ്ട് മാത്രം ഇനി ജോലി നേടാനാകില്ലെന്നാണ് റിക്രൂട്ട്മെന്റ് വിദഗ്ദ്ധർ നൽകുന്ന മുന്നറിയിപ്പ്. ഉദ്യോഗാർത്ഥിയുടെ കൃത്യനിഷ്ഠയും ജോലി ചെയ്യാനുള്ള ശേഷിയും വ്യക്തമാക്കാൻ ബിരുദം സഹായിക്കുമെങ്കിലും പ്രായോഗിക കഴിവും സാങ്കേതിക അറിവും ഇല്ലാത്തവരെ തൊഴിലുടമകൾ പരിഗണിക്കുന്നില്ല. പഠനകാലത്ത് തന്നെ ഇന്റേൺഷിപ്പുകൾ, പാർട്ട് ടൈം ജോലികൾ, സ്വയം സംരംഭങ്ങൾ എന്നിവയിലൂടെ തൊഴിൽ പരിചയം നേടേണ്ടത് ബിരുദധാരികൾക്ക് അത്യാവശ്യമായി മാറിയിരിക്കുകയാണ്.
ALSO READ; മാസങ്ങളോളം ശല്യം ചെയ്തു; അമേരിക്കയിൽ ഇന്ത്യക്കാരിയെ വെടിവച്ചുകൊന്ന് 22-കാരൻ ജീവനൊടുക്കി
മറുവശത്ത്, മുൻതലമുറയെ അപേക്ഷിച്ച് വൻ തുക കടം വാങ്ങിയാണ് വിദ്യാർത്ഥികൾ ഇന്ന് പഠനം പൂർത്തിയാക്കുന്നത്. കാനഡയിൽ ഒരു വർഷത്തെ ശരാശരി ട്യൂഷൻ ഫീസ് നിലവിൽ $7,734 ഡോളറാണ് (ഏകദേശം 4.7 ലക്ഷം രൂപ). ഇത് 20 വർഷം മുൻപത്തേക്കാൾ 76 ശതമാനം കൂടുതലാണ്. പഠിച്ചിറങ്ങുന്ന പകുതിയോളം വിദ്യാർത്ഥികൾക്കും ശരാശരി 23 ലക്ഷത്തോളം രൂപ ($38,000 ഡോളർ) കടബാധ്യതയുണ്ട്. എങ്കിലും, ബിരുദമില്ലാത്തവരെ അപേക്ഷിച്ച് ബിരുദധാരികൾക്ക് വിപണിയിൽ 55 ശതമാനത്തോളം ഉയർന്ന ശമ്പളം ലഭിക്കുന്നുണ്ടെന്നത് ആശ്വാസകരമാണ്. സമാന യോഗ്യതയുള്ള രണ്ട് പേരിൽ നിന്ന് ഒരാളെ തിരഞ്ഞെടുക്കേണ്ടി വരുമ്പോൾ ഇപ്പോഴും ബിരുദമുള്ളവർക്ക് തന്നെയാണ് മുൻഗണന ലഭിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
