ഓട്ടവ: കാനഡയിലേക്ക് താൽക്കാലിക റെസിഡൻസ് വിസകൾക്കായി അപേക്ഷിക്കുന്നവർക്കുള്ള കാത്തിരിപ്പ് സമയത്തിൽ വീണ്ടും വർദ്ധനവ്. സെപ്റ്റംബർ 16-ന് IRCC പുറത്തുവിട്ട ഏറ്റവും പുതിയ പ്രൊസസിംഗ് വിവരങ്ങൾ പ്രകാരം സൂപ്പർ വിസ, വർക്ക് പെർമിറ്റ്, സ്റ്റഡി പെർമിറ്റ് എന്നിവയുടെ കാത്തിരിപ്പ് സമയത്തിലാണ് പ്രധാന മാറ്റങ്ങൾ വന്നിട്ടുള്ളത്. സെപ്റ്റംബർ 9-ലെ കണക്കുകളുമായി താരതമ്യം ചെയ്യുമ്പോൾ യു.എസ്, നൈജീരിയ തുടങ്ങിയ രാജ്യങ്ങളിൽ നിന്നുള്ള അപേക്ഷകർക്ക് സമയം കൂടിയപ്പോൾ, പാകിസ്താനിൽ നിന്നുള്ള സൂപ്പർ വിസ അപേക്ഷകർക്ക് വലിയ ആശ്വാസമായി കാത്തിരിപ്പ് സമയം ഗണ്യമായി കുറഞ്ഞിട്ടുണ്ട്.
വർക്ക് പെർമിറ്റ് വിഭാഗത്തിൽ യു.എസ് അപേക്ഷകരുടെ സമയം ഒരു ആഴ്ച വർദ്ധിച്ച് 3 ആഴ്ചയായപ്പോൾ, കാനഡയ്ക്കുള്ളിൽ നിന്ന് അപേക്ഷിക്കുന്നവർക്ക് ഒരു ദിവസം കുറഞ്ഞ് 110-ൽ നിന്ന് 109 ദിവസമായി. ഇന്ത്യയിൽ നിന്നുള്ള വർക്ക് പെർമിറ്റ് അപേക്ഷകർക്ക് പ്രൊസസിംഗ് സമയം മാറ്റമില്ലാതെ 10 ആഴ്ചയായി തുടരുന്നു. പാകിസ്താൻ (8 ആഴ്ച), നൈജീരിയ (10 ആഴ്ച), ഫിലിപ്പീൻസ് (7 ആഴ്ച) എന്നീ രാജ്യങ്ങളിലെ സമയത്തിലും മാറ്റമില്ല. ഈ വിഭാഗത്തിൽ കാനഡയ്ക്ക് പുറത്തുനിന്നുള്ള അപേക്ഷകൾക്ക് 60 ദിവസവും ഉള്ളിൽ നിന്നുള്ളവയ്ക്ക് 120 ദിവസവുമാണ് IRCC ലക്ഷ്യമിടുന്ന ഔദ്യോഗിക സർവീസ് സ്റ്റാൻഡേർഡ്.
സ്റ്റഡി പെർമിറ്റുകളുടെ കാര്യത്തിൽ കാനഡയ്ക്കുള്ളിൽ നിന്നുള്ള അപേക്ഷകർക്കും നൈജീരിയക്കാർക്കും സമയം ഒരു ആഴ്ച വർദ്ധിച്ച് യഥാക്രമം 8 ആഴ്ചയും 10 ആഴ്ചയുമായി മാറി. ഇന്ത്യയിൽ നിന്നുള്ള വിദ്യാർത്ഥികൾക്ക് മാറ്റമില്ലാതെ 5 ആഴ്ചയായി തുടരുമ്പോൾ യു.എസ് (6 ആഴ്ച), പാകിസ്താൻ (7 ആഴ്ച), ഫിലിപ്പീൻസ് (5 ആഴ്ച) എന്നീ രാജ്യങ്ങളിലും മാറ്റങ്ങളൊന്നുമില്ല. വിസിറ്റർ വിസകളിൽ കാര്യമായ വ്യതിയാനങ്ങളില്ല. ഇന്ത്യക്കാർക്ക് പ്രൊസസിംഗ് സമയം 31-ൽ നിന്ന് 29 ദിവസമായി കുറഞ്ഞപ്പോൾ, നൈജീരിയക്കാർക്ക് 87 ദിവസമായും പാകിസ്താൻകാർക്ക് 75 ദിവസമായും ഫിലിപ്പീൻസ് അപേക്ഷകർക്ക് 21 ദിവസമായും അല്പം വർദ്ധിച്ചു. യു.എസ് വിസിറ്റർ വിസ സമയം 16 ദിവസമായി കുറഞ്ഞപ്പോൾ കാനഡയ്ക്കുള്ളിൽ നിന്നുള്ളവർക്ക് 11 ദിവസമായി തുടരുന്നു.
സൂപ്പർ വിസ വിഭാഗത്തിലാണ് ഏറ്റവും വലിയ മാറ്റങ്ങൾ കണ്ടത്. യു.എസിൽ നിന്നുള്ളവർക്ക് കാത്തിരിപ്പ് സമയം ഏഴ് ആഴ്ചയിലധികം വർദ്ധിച്ച് 116 ദിവസമായും ഫിലിപ്പീൻസിൽ നിന്നുള്ളവർക്ക് 90 ദിവസമായും ഉയർന്നു. എന്നാൽ പാകിസ്താനിൽ നിന്നുള്ള അപേക്ഷകർക്ക് പ്രൊസസിംഗ് സമയം അഞ്ച് ആഴ്ചയിലധികം കുറഞ്ഞ് 132 ദിവസത്തിൽ നിന്ന് 95 ദിവസത്തിലേക്ക് എത്തി. ഇന്ത്യക്കാർക്ക് ഒരു ദിവസത്തിന്റെ വർദ്ധനവോടെ സമയം 70 ദിവസമായി. കാനഡയ്ക്ക് പുറത്തുനിന്ന് മാത്രം അപേക്ഷിക്കാവുന്ന സൂപ്പർ വിസയുടെ ഔദ്യോഗിക സർവീസ് സ്റ്റാൻഡേർഡ് 112 ദിവസമാണ്.
ALSO READ ; വിലക്കയറ്റത്തിലും നികുതിപ്പൂട്ടിലും വീർപ്പുമുട്ടി കനേഡിയൻ റെസ്റ്റോറന്റുകൾ
IRCC പ്രസിദ്ധീകരിക്കുന്ന പ്രൊസസിംഗ് സമയം ഒരു ഗ്യാരണ്ടിയോ നിർബന്ധിത സമയപരിധിയോ അല്ല, മറിച്ച് അപേക്ഷകളുടെ നിലവിലെ സ്ഥിതിയും മുൻകാല കണക്കുകളും അടിസ്ഥാനമാക്കിയുള്ള ഏകദേശ പ്രവചനമാണ്. എന്നാൽ സർവീസ് സ്റ്റാൻഡേർഡ് എന്നത് 80% അപേക്ഷകളും പൂർത്തിയാക്കാൻ വകുപ്പ് സ്വയം നിശ്ചയിച്ചിട്ടുള്ള ലക്ഷ്യമാണ്. 2026-ന്റെ ആദ്യ ഏഴ് മാസങ്ങളിൽ 18.3 ലക്ഷത്തിലധികം അപേക്ഷകൾ തീർപ്പാക്കിയെങ്കിലും, ജൂലൈ 31 വരെയുള്ള കണക്കനുസരിച്ച് 3.94 ലക്ഷത്തിലധികം അപേക്ഷകൾ ഇനിയും കെട്ടിക്കിടക്കുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
