പ്രിൻസ് എഡ്വേർഡ് ഐലൻഡ്: പ്രിൻസ് എഡ്വേർഡ് ഐലൻഡ് പ്രൊവിൻഷ്യൽ നോമിനി പ്രോഗ്രാം (PEI PNP) പുതിയ സെലക്ഷൻ റൗണ്ട് പ്രഖ്യാപിച്ചു. സെപ്റ്റംബർ 17-ന് നടന്ന ഡ്രോയിലൂടെ 195 അപേക്ഷകർക്കാണ് പ്രൊവിൻഷ്യൽ നോമിനേഷനായുള്ള ക്ഷണം ലഭിച്ചത്. പ്രവിശ്യയുടെ സാമ്പത്തിക വളർച്ചയ്ക്ക് ആക്കം കൂട്ടുന്നതിനായി ലേബർ ഇംപാക്ട്, പി.ഇ.ഐ എക്സ്പ്രസ് എൻട്രി എന്നീ രണ്ട് വിഭാഗങ്ങൾ വഴിയാണ് ഉദ്യോഗാർത്ഥികളെ തിരഞ്ഞെടുത്തത്.
യൂണിവേഴ്സിറ്റി ഓഫ് പ്രിൻസ് എഡ്വേർഡ് ഐലൻഡ് (UPEI), ഹോളണ്ട് കോളേജ്, കോളേജ് ഡി എൽ ഐൽ എന്നീ പ്രവിശ്യയിലെ മൂന്ന് പ്രമുഖ വിദ്യാഭ്യാസ സ്ഥാപനങ്ങളിൽ നിന്ന് പഠിച്ചിറങ്ങിയ അന്താരാഷ്ട്ര വിദ്യാർത്ഥികൾക്ക് ഈ ഡ്രോയിൽ പ്രത്യേക മുൻഗണന നൽകിയിട്ടുണ്ട്. ഹെൽത്ത് കെയർ, ട്രേഡ്സ്, മാനുഫാക്ചറിങ് തുടങ്ങി തൊഴിലാളി ക്ഷാമം നേരിടുന്ന മുൻഗണനാ മേഖലകളിൽ ജോലി ചെയ്യുന്നവർക്കാണ് അപേക്ഷിക്കാൻ അവസരം ലഭിച്ചത്.
നോമിനേഷൻ ലഭിച്ചവർക്ക് കാനഡയിലെ സ്ഥിരതാമസത്തിനുള്ള (PR) അപേക്ഷ നൽകാൻ സാധിക്കും. കൂടാതെ, ലേബർ ഇംപാക്ട് വിഭാഗത്തിലുള്ളവർക്ക് 2026 ജൂൺ 9 മുതൽ നിലവിൽ വന്ന പുതിയ താത്കാലിക ഫെഡറൽ ഇളവ് പ്രകാരം, പി.ആർ അപേക്ഷയുടെ അക്നോളജ്മെന്റ് ഓഫ് റെസീപ്റ്റിനായി (AOR) കാത്തുനിൽക്കാതെ തന്നെ നേരത്തെ ബ്രിഡ്ജിങ് ഓപ്പൺ വർക്ക് പെർമിറ്റിന് (BOWP) അപേക്ഷിക്കാനും അർഹതയുണ്ടായിരിക്കും. ഇൻവിറ്റേഷൻ ലഭിച്ച ഉദ്യോഗാർത്ഥികൾ 30 ദിവസത്തിനുള്ളിൽ പി.ഇ.ഐ ഓഫീസ് ഓഫ് ഇമിഗ്രേഷനിൽ പൂർണ്ണമായ അപേക്ഷ സമർപ്പിക്കേണ്ടതുണ്ട്.
Also Read : യുഎസ്-കാനഡ വ്യാപാര യുദ്ധം: കായിക മേഖലയിലും വൻ തിരിച്ചടി
2026-ൽ ആകെ 12 ഇമിഗ്രേഷൻ ഡ്രോകൾ നടത്താനാണ് പ്രവിശ്യ ലക്ഷ്യമിടുന്നത്. ഈ വർഷം ഇതുവരെ നടന്ന 9 ഡ്രോകളിലായി ആകെ 1,229 ക്ഷണങ്ങളാണ് ലേബർ ഇംപാക്ട്, എക്സ്പ്രസ് എൻട്രി വിഭാഗങ്ങളിലായി നൽകിയിട്ടുള്ളത്. അതേസമയം, ബിസിനസ് ഇംപാക്ട് വിഭാഗത്തിൽ ഈ വർഷം ഇതുവരെ സെലക്ഷൻ റൗണ്ടുകളൊന്നും നടന്നിട്ടില്ല. ഈ വർഷത്തെ ഇനി വരാനിരിക്കുന്ന ഡ്രോകൾ ഒക്ടോബർ 15, നവംബർ 19, ഡിസംബർ 17 എന്നീ തീയതികളിൽ നടക്കുമെന്നാണ് അധികൃതർ വ്യക്തമാക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
