ഓട്ടവ: ബുധനാഴ്ച അവതരിപ്പിച്ച ആപ്പിളിന്റെ പുതിയ ഫോൾഡബിൾ സ്മാർട്ട്ഫോണായ ‘ഐഫോൺ ഡ്യുവോ’യ്ക്ക് കാനഡയിൽ അമേരിക്കയേക്കാൾ 10 ശതമാനത്തോളം വില വർധിച്ചത് വലിയ ചർച്ചകൾക്ക് വഴിവെച്ചിരിക്കുകയാണ്. അമേരിക്കയിൽ ഈ ഫോണിന്റെ പ്രാരംഭ വില 1,999 യുഎസ് ഡോളർ ആയിരിക്കെ, കാനഡയിൽ നികുതിക്ക് മുമ്പ് 2,999 കാനഡിയൻ ഡോളർ മുതൽ 4,799 ഡോളർ വരെയാണ് നിരക്ക്. എന്നാൽ ഇതിന് കാരണം ഇരുരാജ്യങ്ങളും തമ്മിലുള്ള പുതിയ താരിഫ് നയങ്ങളല്ലെന്നും കനേഡിയൻ വിപണിയിലെ വാങ്ങൽ രീതി കണക്കിലെടുത്ത് കമ്പനി ഈടാക്കുന്ന അധിക ലാഭവിഹിതമാണെന്നും സാമ്പത്തിക വിദഗ്ധർ വ്യക്തമാക്കുന്നു.
അമേരിക്കൻ ഉൽപ്പന്നങ്ങൾക്ക് കാനഡ ഏർപ്പെടുത്തിയ പ്രതികാര താരിഫുകളാണ് വിലക്കയറ്റത്തിന് കാരണമെന്ന വാദം വിദഗ്ധർ തള്ളി. ഐഫോണുകൾ ചൈനയിലാണ് നിർമ്മിക്കപ്പെടുന്നത് എന്നതിനാൽ ഇവ അമേരിക്കൻ ഉൽപ്പന്നങ്ങളുടെ പട്ടികയിൽ പെടുന്നില്ലെന്ന് ടൊറന്റോ സർവകലാശാലയിലെ സാമ്പത്തികശാസ്ത്ര പ്രൊഫസർ ജോസഫ് സ്റ്റൈൻബർഗ് ചൂണ്ടിക്കാട്ടി. ഒരു ഉൽപ്പന്നത്തിന്റെ നിർമ്മാണ രാജ്യം ഏതാണോ അതിനെ അടിസ്ഥാനമാക്കിയാണ് താരിഫ് നിശ്ചയിക്കുന്നത്. കൂടാതെ കാനഡയിലേക്ക് നേരിട്ട് അമേരിക്കയിൽ നിന്ന് വലിയ തോതിൽ ഐഫോണുകൾ ഇറക്കുമതി ചെയ്യുന്നില്ല. അതിനാൽ കസ്റ്റംസ് നികുതികൾ ഇതിന്റെ വില വർധനവിന് കാരണമാകുന്നില്ല.
ALSO READ: യുകെയും കാനഡയും ഔട്ട്!; ഇന്ത്യൻ വിദ്യാർത്ഥികളുടെ പുതിയ റൂട്ട് ഇതാണ്!
AI സാങ്കേതികവിദ്യയുടെയും ഡാറ്റാ സെന്ററുകളുടെയും വളർച്ച കാരണം ആഗോളതലത്തിൽ ഉണ്ടായ മൈക്രോചിപ്പ് ക്ഷാമവും ഉൽപ്പാദനച്ചെലവ് വർധിച്ചതും ഫോണിന്റെ പൊതുവായ ഉയർന്ന വിലയ്ക്ക് കാരണമായിട്ടുണ്ടെന്ന് വ്യാപാര നയവിദഗ്ധൻ വെർണർ ആൻറ്റ്വൈലർ വ്യക്തമാക്കി. എങ്കിലും കനേഡിയൻ വിപണി വലിപ്പത്തിൽ ചെറുതാണെങ്കിലും പ്രീമിയം ഉൽപ്പന്നങ്ങൾക്ക് കൂടുതൽ തുക നൽകാൻ ഇവിടുത്തെ ഉപഭോക്താക്കൾ തയ്യാറാണെന്ന കമ്പനികളുടെ കണക്കുകൂട്ടലാണ് ഈ വിലവ്യത്യാസത്തിന് പ്രധാന കാരണം. പുതിയ സിഇഒ ജോൺ ടെർണസ് അവതരിപ്പിച്ച ഈ ഫോൺ ഒക്ടോബർ 17 മുതൽ പ്രീ-ഓർഡറിനും ഒക്ടോബർ 23 മുതൽ വിപണിയിലും ലഭ്യമാകും. വിഷയത്തിൽ ആപ്പിൾ ഇതുവരെ ഔദ്യോഗികമായി പ്രതികരിച്ചിട്ടില്ല.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
New iPhone duo at steep prices in Canada; is the tariff to blame?
