ഡൽഹി: ഉയർന്ന റാങ്കിംഗുള്ള പ്രമുഖ സർവകലാശാലകളിൽ പഠിക്കുക എന്നതിലുപരി, കോഴ്സ് കഴിഞ്ഞാൽ മികച്ച ജോലിയും നല്ല വരുമാനവും ഉറപ്പുനൽകുന്ന രാജ്യങ്ങളിലേക്ക് ഇന്ത്യൻ വിദ്യാർത്ഥികൾ കൂട്ടത്തോടെ ചുവടുമാറ്റുന്നു. പ്രമുഖ എഡ്-ടെക് പ്ലാറ്റ്ഫോമായ ‘അപ്ഗ്രേഡിന്റെ’ (upGrad) ഏറ്റവും പുതിയ റിപ്പോർട്ടിലാണ് വിദേശപഠന രംഗത്തെ ഈ ശ്രദ്ധേയമായ മാറ്റം വ്യക്തമാക്കുന്നത്. പ്രവേശനച്ചെലവ് കുറവാണെന്നതും പഠനശേഷം ജോലി കണ്ടെത്താൻ എളുപ്പമാണെന്നതും കണക്കിലെടുത്ത്, ഇന്ത്യൻ വിദ്യാർത്ഥികളുടെ ഏറ്റവും പ്രിയപ്പെട്ട പഠനകേന്ദ്രമായി യൂറോപ്യൻ രാജ്യമായ ജർമ്മനി മാറിയിരിക്കുകയാണ്.
2025 ജനുവരി മുതൽ 2026 ജൂൺ വരെയുള്ള കാലയളവിൽ വിദേശപഠനം ആഗ്രഹിച്ച 53,800-ഓളം വിദ്യാർത്ഥികളിൽ നിന്ന് ശേഖരിച്ച വിവരങ്ങളുടെ അടിസ്ഥാനത്തിലാണ് ഈ പഠനം തയാറാക്കിയിരിക്കുന്നത്. റിപ്പോർട്ട് പ്രകാരം അപ്ഗ്രേഡ് വഴി വിദേശത്തുപോയ വിദ്യാർത്ഥികളിൽ 51 ശതമാനം പേരും തിരഞ്ഞെടുത്തിരിക്കുന്നത് ജർമ്മനിയാണ്. പഠനത്തിനെത്തുന്നവരിൽ 49 ശതമാനം പേരും മികച്ച തൊഴിലവസരങ്ങൾക്കാണ് ഒന്നാം സ്ഥാനം നൽകുന്നത്. കാലങ്ങളായി മുന്നിലുണ്ടായിരുന്ന അമേരിക്ക, യുകെ, കാനഡ, ഓസ്ട്രേലിയ തുടങ്ങിയ രാജ്യങ്ങളിൽ പഠനച്ചെലവ് ഉയർന്നതും വിസ നിയമങ്ങൾ കർശനമാക്കിയതുമാണ് വിദ്യാർത്ഥികളെ ജർമ്മനി, ഫ്രാൻസ്, സ്പെയിൻ തുടങ്ങിയ യൂറോപ്യൻ രാജ്യങ്ങളിലേക്ക് ആകർഷിക്കുന്നത്.
പഠനത്തിനായി തിരഞ്ഞെടുക്കുന്ന കോഴ്സുകളിലും വലിയ മാറ്റങ്ങൾ ദൃശ്യമാണ്. വിദേശത്ത് പഠിക്കാൻ ആഗ്രഹിക്കുന്ന പത്തിൽ ഏഴ് വിദ്യാർത്ഥികളും 30 ലക്ഷം രൂപയിൽ താഴെ ബജറ്റ് ഉള്ളവരാണ്. മാത്രമല്ല, വലിയ നഗരങ്ങളെക്കാൾ ചെറുപട്ടണങ്ങളിൽ നിന്നുള്ള (ടയർ 2, ടയർ 3) വിദ്യാർത്ഥികളാണ് (60%) ഇപ്പോൾ വിദേശപഠനത്തിന് മുന്നോട്ടുവരുന്നത്. തൊഴിൽ വിപണിയിലെ മാറ്റങ്ങൾ കണക്കിലെടുത്ത് ആർട്ടിഫിഷ്യൽ ഇന്റലിജൻസ് (AI), സയൻസ്, ടെക്നോളജി (STEM) കോഴ്സുകൾക്കാണ് ഇപ്പോൾ വിദ്യാർത്ഥികൾക്കിടയിൽ കൂടുതൽ പ്രിയമെന്നും അപ്ഗ്രേഡ് വൈസ് പ്രസിഡന്റ് പ്രണീത് സിംഗ് ചൂണ്ടിക്കാട്ടുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
